Read pokoot YEREMIA 38 Bible Online

YEREMIA 38 - pokoot bible

YEREMIA 38

¹Kilïm Syepatia wero Matan nko Kedalia wero Pasyur nko Yukal wero Syelemia nko Pasyur wero Malkia, Yeremia kïmwochini pich lö,

²lentöy ECHOTYON, “Chi anka tïkwïl nyo ngötu kanasyantanï kïmeghöy ompö ngot anta kömöy anta sömew. Wölo chi anka tïkwïl nyo töni kegh mori lïko Papilonia, kïsöpöy. Chömto kegh chichoni kenam, wölo melö kïtïghöy.”

³Akïlentöy, “Otöninan kanasyantanï mori lïko pöytoghinto Papilon nyo mötïny.”

⁴Atolapay kïpechï kintöghoghï pöytoghin akïlenchï, “Ompö ne tömokïtïgh chichete nya? Ompöwölo kötïgh pipö lïk nko pich löwïr cho tökïmi kanasyantanete ko ngala cho mwoghöy nyinte. Melö yörchini pich nyinte köromnyö, wölo ghöyïn kwïle.”

⁵Kuyokyï pöytoghin Sedekia kintöghoghichay lö, “Olentan mi chichoni morikwa nya, adena nyinte wölo kada.”

⁶Kilenyona keratanïn akereytanïn kö pö pögh nyo kipö Malkia, wero pöytoghin. Kilekïto köyoni pö pögh kö pö ripï. Melö kimi pögh köyoni pö pögh kïpoto norayon. Kïlenyona kikireytanïn ntolït norayon ori.

⁷Atolapay kïnyorï kut mötworinto ka pöytoghin nyo kikelat akungwïno Etopya akekuro Epedmelek lö kikereytanïn kö pö pögh. Kigho atoni pöytoghinto parasa atolekïtö Kuka Penchamen.

⁸Kïngeta Epedmelek ka pöytoghin akïwö kïnyorï akïlenchï pöytoghin,

⁹“Nyi we pöytoghintenyu nyo konyïtot, kegh pïchï kïgh nyo gha nyoman. Kereytö werkoyon Yeremia kïlït kö pö pögh. Meghchini wölini ompö kömöy nyo mötïny ompöwölo melö tökïmi wölo rumunö makatyanta ompö akong kanasyantanete.”

¹⁰Atolapay kïlenchï pöytoghintö Epedmelek, “Wïyö nko pich sömök ato ape angwïsunena Yeremia kö pö pögh kïtomö kïma.”

¹¹Kïwö Epedmelek nko pïchay ka pöytoghin akïcheng sïro cho kiwïryö ompö wölo kïrorchini tïkwïn atolapay kurekwanïn sïrochay ompö pörköy.

¹²Atolapay kïlenchanïn, “Rötinö sïrochoni kwïlkwïlungu tömö amïn pörköyonona kichïteninyi.”

¹³Nyini kimuchö, kuchïtwanïn pïchay angwïn sany. Atolapay ketönanïn otöpö kö pö ripï nyo kyomitan tagh.

¹⁴Kimi ato kiyokwï pöytoghin Sedekia kepanïn onyorï nyinte. Kimi nyinte kukat nyo pö sömök nyo kïlïto Kö pö Tororöt.* Atolapay kïlenchanïn pöytoghin, “Mi kïgh nyo otepinyi amewïngenanïn ngölyon.”

¹⁵Olenchan nyinte, “Ato omwowunyi man, metïghanïnyinye? Anta omwowunyi kïgh, iterenyi?”

¹⁶Kuyomisanïn pöytoghin Sedekia ompö sison lö, “Omwoghan ompö kayna Tororöt nyo satate, nyo konecha söpon lö, motïghinyinye amotöninyinye mori pïchï möröy kïtïghinyi.”

¹⁷Kïlenyona olenchan Sedekia, “Lentöy ECHOTYON, Tororöt Kimuktoghin, Tororöt pö Israel, ato ichamtenyi kegh kerïntinyi aitö kegh mori kintöghoghi pöytoghinto Papilon, kïmedoninyinye chi kïgh amelö kïpelo ma kanasyantanï. Isöpenyi nko kongu kïmïkul.

¹⁸Wölo atomeghanyinye lenyoni, kungwïnöy lïko Papilonia kïpöröy akïpela ma kanasyantanï amechïwïtonenyinye morikwa.”

¹⁹Wölo kïlo Sedekia, “Owöghan pipö Yaudi cho kiryögh kïsor lïko Papilonia. Töptoy kitönanïn morikwa atolapay kuchopanïn kong chane.”

²⁰Olenchan nyinte, “Ewo, metöninyinye chi morikwa. Konyïtönyi ngölyonto ECHOTYON lenyini komwowunyi. Ato ighanyi lenyoni, kutenöy ngaleku amöminye kïgh nyo ominyi.

²¹Wölo mi kïgh nyo keporwanïn ECHOTYON ompö sïwïyagh lö igho atomechamtenyinye kegh.

²²Kiporwanïn kor cho kingötï ka pöytoghinto Yuda cho kikïrongöy kïpa wölo mi pöytoghinto Papilon. Kimwoghöy otini kikïrongöy lö, ‘Kongotiku cho kighananyi choni kalïsinyi akikïrïntinyi. Kïkany ye otï kölït kelyeku norayon, kïpïstinyi kïpechï kegh.’

²³“Atolapay olenchan, kipchini korukwa nko monïnge lökïr, pipö Papilonia. Kïkany nyï le nyi, mechïwïtenyinye. Kïnöminyi aketöninyi mori pöytoghinto Papilon akepel kanasyantanï kïnagh lö tïtu.”

²⁴Atolapay kïlenchanïn Sedekia, “Mekany kïlïm chi ngalechï kakïngalan tïkwïl tömokïtïghïn.

²⁵Ato lïm kintöghoghichan lö kakïngalanacha nko nyi akïpka kïtepinyi lö, ‘Ne ngalechï komwoghekwa nko pöytoghin? Mewïngenecha kïgh ato kemöröy söpon.’

²⁶Ilenchï chane, ‘Komitan osoghöy pöytoghin tömeyodanïn ngat owö chela nyo mi ka Yonatan atömomeghchï wölini.’ ”

²⁷Kïpka kintöghoghichay akïtepanïn lenyini kimwowanïn pöytoghin. Kipïstanïn chane ompöwölo melö kimi chi nyo kitera rochwa ngalanencha nko pöytoghin.

²⁸ Keripchanïn nyu kö pö ripï ntökïtenö asis nyo kikïrïnta akenam kanasyanta Yerusalem.