Read pokoot YEREMIA 40 Bible Online

YEREMIA 40 - pokoot bible

YEREMIA 40

¹Kingölonwanïn ECHOTYON otini kityakanïn Nepusaradan, wowïn pö ripi pöytoghin ompö Rama. Kiratenanïn nyinte tagh sïrïmtin akwipanïn nko pich löwïr cho kikïnam ompö Yerusalem nko Yuda kepa koro Papilon.

²Kipanïn kamas Nepusaradan akïlenchanïn, “Kikakïmwa ECHOTYON, Tororötïngu lö owetöy onyoröy koronete

³akunka nyete ye kepunto ngölyontenyi. Keghisyö choni akwompö ngokï cho kyaghakwa ompö tawu ECHOTYON ompöwölo melö kyaghakwa lenyini kimwowekwa nyinte.

⁴Wölo ye, rosa, otyokan sïrïmtinechï kikïrata moriku atewechinö kegh. Ato imökenyi kepe tïkwïl Papilon, ingwïn kepe atowan oripinyi nyo karam. Kïkany mechamanyi kepe tïkwïl imukenyi töpchinö kegh. Nyengu kore, imukenyi wïyö wop anka tïkwïl nyo kecham.”

⁵Ompöwölo mamwaghanye kïgh, kïlenchanïn Nepusaradan, “Nyapanena aiwö itöpo nko Kedalia wero Aikam, kuköto Syapan nyo kikïl pöytoghinto Papilon kuntöghoghchï kanastin löwïr cho mi Yuda. Wïyö aimöngisyö tïkwïl ompö kwenu pikö walaka. Anta mönyona, imukenyi wïyö wop anka tïkwïl nyo kecham nyinte.” Kïlenyona kutö yetïn pö ripï omisyö nko ropöwon akïkany kïwö.

⁶Atolapay kïwö Yeremia Mispa wölo mi Kedalia akïmang nko nyinte nko pich cho kingötï.

⁷ Kilïm yetïntino lïkos pö Yuda nko askarinekwa löwïr cho kipkono sany lö kikïl pöytoghinto Papilon Kedalia kuntöghoghchï pich cho kimörangnye chi kïpa Papilon. Pïchoni kingötï kï pich cho le mey nko monekwa.

⁸Kïlenyona kïpechï yetïntinechay pö lïkos pö Yuda nko askarinekwa löwïr Kedalia ompö kanasyanta Mispa. Yetïntinechoni kï Ismael wero Netania nko Yoanan wero Karea nko Seraya wero Tanumet nko werpö Epay cho kipkono Netopa nko Yesania nyo pö ara pipö Maaka.

⁹Atolapay kukïninchi Kedalia chane kïlentöy, “Omwowokwa nyo pö nyoman lö mowöghisyö, omöngisyenö, apöghisyechï pipö Papilonia atökïrot ngalekwo nyo karam.

¹⁰Otöpenan ante Mispa atalïkwan kutinkwa tawu pipö Papilonia otini kapka wölete. Kïlenyona mïchinokwa ye osupö arorchï töpoton dipay* nko akwa nko mwowöy, amöngisyö kanastinechoni omikwa ye.”

¹¹Kilïm tïkwïl pipö Yaudi cho kimi Moap nko cho kimöngisïyi nko pipö Amon nko cho kimi Edom nko koros walaka, lö mi pipö Israel cho kichömchï pöytoghinto Papilon kïngötï koro Yuda akïlïm tïkwïl lö kikïl nyinte Kedalia kïlïkwï kintöghoghintengwa.

¹²Kïlenyona kïwuwunö pipö Yaudi koros löwïr cho kitoyechï akïmïlisyö koro Yuda akïpa Mispa wölo mi Kedalia. Atolapay kwilchï kegh sapipun nko akwa cho kyomöy osiswo kömöy cho chang nyoman.

¹³Atolapay kïnam kegh Yoanan wero Karea nko yetïntinechay pö lïkos pö Yuda cho pkono sany akïpa wölo mi Kedalia wölno le Mispa.

¹⁴“Ekenkïtunyi lö köyonï Palis, pöytoghinto Amon, Ismael wero Netania kungwïn kïparinyi nya?” Wölo melö kighan Kedalia ngalekwa.

¹⁵Atolapay kïmwochï ompö sison Yoanan wero Karea, Kedalia ompö Mispa lö, “Pïswanïn owan otïgh Ismael wero Netania amöminye chi nyo nkïtu lö kegha ne. Pö ne kïparinyi, akwigh pipö Yuda löwïr cho kighömïtï kegh wölï iminyi kïtoyö, akuwonyö pipö Yuda cho kingötï?”

¹⁶Wölo kuyokyï Kedalia lö, “Ewo, megh kïyoni! Melö pö man ngalechoni kemwaghanyi paraku Ismael!”