Read pokoot YEREMIA 43 Bible Online

YEREMIA 43 - pokoot bible

YEREMIA 43

¹Otini kyomwochan pïchay ngalechini löwïr kimwowanïn ECHOTYON Tororötïngwa kumuchö,

²kïlenchanïn Asaria wero Osyaya nko Yoanan wero Karea nko pikö walaka cho le menï, “Kemïrönyi put. Melö keyokunyi ECHOTYON Tororötïncha lö nyonö mwowecha lö mapa Misri.

³Kinkïtöcha lö, Paruk, wero Nerya nyoni kechöchoyinyi tökïnamecha akïparecha pipö Papilonia anta rangecha Papilon le pïnot.”

⁴Kïlenyona nyu, melö kiter Yoanan nko yetïntino lïkos pö Yuda nko pich löwïr ngölyonto ECHOTYON nyo kitagha mapegha korengwa Yuda.

⁵Atolapay kumït Yoanan nko yetïntino pöytoghi Yuda ngötunön pö Yuda löwïr cho kiwuwunö koros löwïr cho kitoytoyechï kïpa koro Misri. Kimït monïng nko mïrön nko kor nko tipi pöytoghin nko pich löwïr cho kipïsï Nepusaradan, yetïn pö ripi pöytoghinto Papilon, mori Kedalia wero Aikam kuköto Syapan. Kimïtanïn tïkwïl nko Paruk wero Nerya. Kïlenyona kipeny chane ngölyonto ECHOTYON otini kipa ntökwit kanasyanta Tapanes ompö koro Misri kïmöngisyö.

⁸Akwoto kyomitan Tapanes, kïlenchanïn ECHOTYON,

⁹“Chenga koghïn cho echön, aitïpchï kukat nyo kïlïto kö pö paytaghpa Parao, ompö Tapanes kurosu pipö Yuda.

¹⁰Atomuchö, ilenchï pïchoni pö Yuda lö kamwaghan ante ECHOTYON Kimuktoghin, Tororöt pö Israel lö, omïtunan Nepukadnesa, pöytoghinto Papilon, nyo le mötworintenyan, Ngwïnöy kutöni ngacharunyi pö paytagh kughyongö paraku koghichï kotïpchan yi akïparta emenyi nyo pö paytagh koghichoni parak.

¹¹Ngwïnöy kïtïpöy koro Misri kuwonyo lömïs. Wongöy sömewö chona kikemwa lö wonyegho sömew, kerang le ratan chona kikemwa lö kïrongöy le ratan akepar chona kikemwa lö wonyegho ngot.

¹²Opelonan ma korichay sogho pipö Misri tororötinekwa. Pelöy ma tïkwïl tororötinechoni Nepukadnesa koro Misri kïtïlilit le wölo chïkïlöy mösöwonta ato kwöghtoy tïlis ompö sïrenyi akïwechï kegh chi nyo kilotisyö.

¹³Ngwïnöy kurulöy korïn cho kikïtek kïpa chak akï cho kinono ngala köny ompö kanasyanta Eliopolis nyo mi koro Misri atolapay kïpel korïn cho sogho pipö Misri tororötinekwa.”