Read pokoot YEREMIA 50 Bible Online

YEREMIA 50 - pokoot bible

YEREMIA 50

¹ Kimwowanïn ECHOTYON paraku Papilon, paraku pipö Papilonia lö,

²“Amwatïtena lökoyechï kïghomï koros, osïtö pentera yïm, amwatïta! Amwagha, amawïny kïgh nyonikïny lö, ‘Kikerïnta Papilon, kimïgh akïnam arasï tororötïngwa Pel, potönöy tororötïngwa Merodak. Kiketyartyar körkeyïntinechay soghöy chane kunyorisyö.’

³“Ompöwölo, ngwïno korö okumpö löt kïporyegho Papilon akunyar kekarkegh nko surkwen. Ryöghöy akïtoyeghö pich nko tïpö wudïn korononi, kïlenyona puryö chi anta tyompö wuw nyo möngöy korononi.”

⁴Lentöy ECHOTYON, “Itïtoy ato tuyo kegh pipö Israel nko cho pö Yuda, akïpkonchanïn. Pkonöy kïlokyonu otini mi kïyöranïn, ani nyo ochï Tororötïngwa.

⁵Tepöy or nyo wetöy Sayon* akïpa kutang wölini atolapay kwam muma* lö, kïlinyot nko ani, amöminye nyo ngötighöy kokay.

⁶“Karkegh piköchan nko kechir cho kimötö mösöwekwa kupotyechï komos akïtompöroryö kïpusata kutïngkot ntökïwutyeghö kaw.

⁷Kipar piköchan chi anka tïkwïl nyo kinyorï chane. Kisïrpön pungkökwa lö mökïtïng lelut kïpöröy chane kïlentöy, ‘Ompöwölo kigh chane ngokï ompö tawu ECHOTYON nyo le komönintengwa nyo pö man akï nyo kikönöy papotïnekwa.’

⁸ “Akwa pipö Israel, oryöwunenö koro Papilon! Angetena koro Papilonia lawel. Akarakegh nko kwagha nyo nyoghöy ngaror tagh!

⁹Ompöwölo owïkunan koros cho owesöch cho mi okumpö löt kïpa kïporyeghö akïrïnta koro Papilon. Pipö sakas chane nyoman, wutïtoy kotï cho möpetönye ngwïny amörotunye kaw manamanï pany.

¹⁰Kïngötöröy tïpö pipö Papilonia akïchengöy ngötöri tïku le wölo kachamta.” Mwoghöy ECHOTYON.

¹¹Lentöy ECHOTYON, “Akwa chï kangatar tïku piköchan! Kïrkegh kongörekyö aturonchö, adangony le mösor cho könyorï suswon, ateghyö le kïrpö angole,

¹²nyoru arasï koro sïrumpenkwa, nömöy mïghötö korononi lö chïrïm! Lïku Papilon kor nyo mö le ompö koros löwïr. Lïku kor nyo tïyame akï surkwen.

¹³Ompö nörekyenyan lïku Papilon kor nyo mömöngönye chi, surkwen nyinöna! Otyot pich cho weröy Papilon, akïmïghyö otini kasïwa moyokachi!

¹⁴Akwa cho onkït poryo kotï lasiny, arika Papilon kuwit. Owutö chane kuwonyechï kotï, ompöwölo keghwanïn ngokï.

¹⁵Okikö kikiköto poryot ompö wop tïkwïl kikïkonï kegh ye nyu Papilon kenam. Kikïrulyö teköwechi kikerultö nïyetuchi. Omitan ante ECHOTYON otökisïyi, oghchinan Papilon lenyini kighchï koros walaka.

¹⁶Mochömchï pich kïleta kösïgh ompö Papilon, amopïsï pich kwipï rotwöyi kasa ato rïr pagh. Kiwagh to pung chay kipka kupokï Papilon, kiwagh ntökïtenö kuyoda kegh kïpa kughegh korengwa, kiryögh kïsor pikökwa.

¹⁷“Karkegh pipö Israel nko kechir cho sökosöy ngötïny kïtoyö. Kinya kïporyeghö chane pöytoghinto Asirya anyï ye kapar kïrïngarïng chane ko Nepukadnesa pöytoghinto Papilon.

¹⁸Kïlenyona, kamwaghan nyu ante ECHOTYON Kimuktoghin, Tororöt nyo pö Israel lö, omungan pöytoghinto Papilon nko pikachi le wölo kyomungön pöytoghinto Asirya.

¹⁹Atolapay oyokwan pipö Israel kïpka korengwa atökwam omisyo parenikwa cho mi kutïng pö Karmel nko cho mi okumpö Pasyan. Ghömöy chane tïkwïl omisyo pareni cho mi komos pö Epraim nko Kiliad.

²⁰Otini ketïta osiswechoni, mönyorchininye chi ngokï koro Israel anta Yuda ompöwölo olöstoghchinan ngötunön choni ngokikwa löwïr.” Mwoghöy ECHOTYON.

²¹Kilö ECHOTYON, “Apusa koro Merataim, ape apara. Opokyinö tïkwïl pipö Pekod, apara pikökwa kuwonyö lömïs. Kamwaghan ante ECHOTYON lö, mïchini ape agha lenyini kamwaghan.

²²Kïlïmo kikiköto poryot kor kïmïkul, wechï kiwonyö pich!

²³Töngönchin kelïm lö körul Papilon, Papilon nyaye kipar koros walaka kïsisyö! Kalïkwï Papilon mïnanian ompö koros löwïr!

²⁴Kïnaminyi lödak ngöghöp nyo kyorötyan arengu, we Papilon kïrkegh melö kinkïtönyi lö mi ne are wölo kyonyorunyi, atöninyi morichan ompöwölo kinyaghnyaghanyi kegh nko ani nyo ochï ECHOTYON.

²⁵Kayata konyan nyo kïrorchini kari lïk, angwïswan kari cho ngwonöch, cho opöghisyeghenan tasïwena nörekyenyan. Ompöwölo otïngön ante ECHOTYON Kimuktoghin achey, achey nyo mïchini aghan ompö koro Papilonia.

²⁶Akwa pung pö Papilon! Apkanena woptin löwïr apar nyinte Ayata töpotenikwo Angatara tïkwïn kukaposa le pagh cho kökitïkumchï töpot Anyara koronï kuwonyö lömïs! Motukyï kïgh nyonikïny!

²⁷Apara nyökon pö lïkengwa Amuta sïghinton le kechir cho pö yengsyö Nyarïl nyo tya ompö Papilon nya wey! Ompöwölo kikwitïta ato kïmungöy chane.

²⁸“Atere köny! Peru pich cho chïwïtyeghö Papilon akïpka kïmwatïtegha Sayon wölo töktoy ECHOTYON Tororötïnyo ompö pipö Papilon cho kinyar Konyi nyo pö saghat.

²⁹ “Okurunö pich cho nkït kïwutïtoy kotï kïpka kïpar Papilon. Arika kanastinechi lö tïlkwïch ntömömi ompö akong nyo muköy kïchïwït. Otönö chane lenyini kisom, aghchï chane lenyini kighchï pikö walaka. Ompöwölo kïsasanyi ECHOTYON Tororöt pö Israel nyo Tïlil.

³⁰Kïlenyona kïpörchini chumwakachi ortïna kanastinechi akepöröy pipö lïkenyi lömïs asisoni. Mwoghöy ECHOTYON.

³¹“Akwa pipö Papilon, kogh nyaye kyachopakwa kong pipö Israel nko Yuda.

³²Mi pïchay kirang pipö Israel nko Yuda le ratan kïmiröy chane möpechï kegh.”

³³Lentöy ECHOTYON Kimuktoghin, “Kakichop kong pipö Israel nko Yuda, ompöwölo machamcha pïchini kinam chane kïpïstö chane kïpa.

³⁴Awes tya Ghetintengwa akekuro nyinte ECHOTYON Kimuktoghin. Nyo pö nyoman owetan oporyeghchini chane ntökungwïn kalya korengwa wölo kungwïnchï nyarïl pipö Papilon.”

³⁵Lentöy ECHOTYON, “Kïpöröy pipö Papilonia, nko pich cho möngöy Papilon nko kintöghoghï nko pikachi cho ngöghomöch.

³⁶Kïpöröy chepsoköytinechi, cho ngoröy ngala sölwontön. Kïpöröy nyökonkachi kuwonyö lökïr!

³⁷Opöran angoletinekwa nko ngarin cho chutöy angoletinö opöran lïkos cho kikïsom koros walaka kipka kungarak chane atökïmïghyö le kor! Owonyan tïkwïl mökosyenyi kïngötöröy kïtuwit.

³⁸Opchinan pekat kïteny pögh! Ompöwölo kinyïghï Papilon körkeyïntinö cho soghöy pich akïcham kïmolï kïgh anka tïkwïl!

³⁹ “Kïlenyona, tïpo wudïn opïn cho kïnyoru kïmöngöy Papilon, tyonkïn cho lata suyï nko cheptusonkol. Puryö chi nyo möngöy su korononi kokay.

⁴⁰ Kïle wölo kyanyaran Sodoma nko Komora nko kanastin cho kilekïtinö, owetan ante ECHOTYON onyoröy Papilon ntömökïmi chi nyo ngötu kïmöngöy orinyi. Mwoghöy ECHOTYON.

⁴¹Arosa, achona pich cho pkonöy pkono kor nyo mi okumpö löt kor nyo awes Chang pöytoghï cho mi kïnopöy kegh ompö poryot setuno koros cho mi söremwok pö ngwïny.

⁴²Nömonu kïwantis nko ngötwö pich cho köromöch, amotïng kisyonchin. Tïköy ngwïny kughum le pögho nanam, Kikwigh kegh chane lö sïkatat, mi kïpsach kïporyegheninyi we Papilon!

⁴³Kalïm pöytoghinto Papilon lökoyechoni akïmïgh lö chïrïm kïlïkwï morïn pörköy, akïnam ngwonïn nyinte, ngwonïn nyo lata nyo pö korka nyo kïghöy.

⁴⁴“Arosa! Alatan ngötïny nyo kölïtunö wuw pö Yordan akuchumchï lö tursïs kechir cho oketïyi. Otulan lenyoni pipö Papilon kïpegha korengwa atolapay akïlan pöytoghin nyo kachaman ante ECHOTYON kïpayta korononi. Ompöwölo ngo nyo olentöy okongityo kegh nko ani? Anta ngo nyo lentöy omukanïn? Pöytoghin ne nyo ghyongo tawunyan akïtagh ngalechan?

⁴⁵Kïlenyona atera ngölyonto sitöt nyo katatan lö nyoru pipö Papilon nko wölo odenan pipö Papilonia. Nyo pö nyoman kichïto kat monekwa akep kïpo do. Otyot akïmïghyö nyoman pich löwïr.

⁴⁶Timtimo korö otini kakïrïnta Papilon nyo riröy kïlïm koroswo walaka.”