Read pokoot YEREMIA 51 Bible Online

YEREMIA 51 - pokoot bible

YEREMIA 51

¹Lentöy ECHOTYON, “Arosa! Owïkunan yomöt nyo le kinyorin, ngwïnöy kunyoröy Papilon nko pikachi

²Oyokunan kinyorï cho petöy kunyoröy Papilon le wölo kutïtoy morïr köti pagh pkonöy kuwongöy tïkwïn lö mel ompö korononi poryegho Papilon wop ompö tïkwïl akuwany tïkwïn lö mel ompö asisto nyarïltangwa pkono kinyorichoni wop tïkwïl akïporyegho chane akuwany tïkwïn lö mel.”

³“Mopïsï pöroyïn pipö Papilon kïwutï kotï amopïsï kulak karïn nyo körto takat. Mosyonchï chumwakakwa! Apara lïkengwa lömïs!

⁴Kïpöröy kuwonyö ompö koro Papilonia akekotön walak ompö ortïna kanastinechi.

⁵Wölo mopïstenanye, pipö Israel nko Yuda. Ochan Tororötïngwa, ECHOTYON Kimuktoghin, kïrkegh kinyïghï ghöyityö koro Papilonia cho kegh ompö tawu Tororöt pö Israel nyo Tïlil.

⁶Arye apeghena Papilon, sörunö chi anka tïkwïl söpontöngu! Orip kegh momeghyö kwïle akwompö ngoki Papilon. Ompöwölo pöroyïntanyan nyete nyo otökisïyi, omungan pipö Papilon kïrïp kegh nko ngokikwa,

⁷ Lata Papilon mpalawu koltin nyo mi kumpa nörekyenyan. Kitömesyeghö koroswo ngwïny kïmïkul ntökupilyö

⁸Anyona ye nyu körul Papilon Kamutmuta lö tursïs! Osönönchinö nyinte! Opunö sakïtyan kenyïrena wölo chiröy, töptoy ostoy ana.

⁹ Kilö pipö koros walaka cho kimöngöy Papilon, ‘Kikïlecha kesopö Papilon wölo kesïwecha lö memukonye. Mïchinecha ye nyu kepïstenö nyinte akïmïla chi anka tïkwïl korenyi. Ompöwölo kikurwokyï Tororöt nyinte akikutö sitöt nyo ngwan nyoman Nyo möngötunye koronete kokay!’ ”

¹⁰Kïlo pipö Israel “Kikutökisyö ECHOTYON, akwighchï pipö Papilon lenyini kighwecha! Apkana kepe kemwatïtena ompö Sayon* ighisyewut cho pö ECHOTYON Tororötïnyo!”

¹¹Lentöy ECHOTYON, “Owïkunan pöytoghi Mede pkonöy kïpöröy Papilon otökisïyan ompöwölo kinyar Konyan. Alïta kotikwo! Ateka longoy!

¹²Osyolö yïm pentera poryot, orultenö nïyeti kanastina Papilon Atasa pich cho le ripï asat lö pich ne cho syepsïyi. Oghchinan ante ECHOTYON pipö Papilon lenyini kyamwaghan.

¹³ Wechï kinyïghï koronete pögh nko mökosyö! Wölo ye kikwitï osiswechi cho pö söröm kikechïchuk yomo kimïnytanyi.

¹⁴Kaman muma ante ECHOTYON Kimuktoghin ompö kaynenyan lö, onyïghitan Papilon nyo mötïny lïkos pö pung cho chang le talam. Kïlïmoy kiteghatengwa nyo pö turönö akï turönö nyo poru lö kikerïnta Papilon.

¹⁵“Nyinte ECHOTYON nyo kigh ngwïny ompö owesyenyi. Kipintit kor ompö ngöghomnyenyi, kighïto yïmwöy ompö chïreryenyi.

¹⁶Nyini kangalan kughumnyö pögh cho mi parak, akwigh poltoy kusupunö kegh söremwok pö ngwïny. Ighöy kiryal kulïwï lö chwat ato ropönöy akïyotï yomat kungwïna töpotinechi.

¹⁷Ato sïwa pich choni, kïlïmchï kegh lö kïchï sölwöy akïkwöng, nömöy arasï pïchay ighöy körkeyïntino koltin, ompöwölo tororötinechï le körkeyïntino kïpö puntintön tïkwïn ompö cho mötïng kimïny.

¹⁸Tïkwïn cho le kwïle akï tïpö lïs, kiwongöy chane lömïs ato kïmungöy chane.

¹⁹Wölo melö karkegh nko tïkuchoni Tororöt pö Yakopo. Ompöwölo nyinte nyo kigh tïkwïn löwïr, akïkïl pipö Israel kïlïkwï chechi kegh kïkuro kaynenyi ECHOTYON Kimuktoghin.”

²⁰Lenchini ECHOTYON Papilon, “Ichinyi kunyïkunyan aichï akonga ompö karichan cho pö lïk Kopöghisyegheninyi olïwö koros walaka kïmutmutisyö. Kopöghisyegheninyi orultö pöyunötin.

²¹Olïwonan angoletin nko nkaritin cho chutöy, angoletino akï cho pegho pipö poryot, olïwonan tïkwïl pich cho pegho angoletine!

²²Otïghonan mïrön nko kor asilan kotwoni poy nko chumwak, atïghö wor nko tipïn.

²³Olïwenan mösöw nko kyakikwa nko ngorï nko eghin cho ngoro parenikwa anyaknyakan pöytoghï nko yetïntino lïkos.”

²⁴Lentöy ECHOTYON, “Owetan otököy ghöyïn kïsïwïyi chi anka tïkwïl ompö pipö Papilonia lenyini kighchï Sayon.

²⁵Ilatenyi kutïng nyo awes nyo le kinyorin, we Papilon. Kinyaranyi ngwïny kïmïkul. Wölo ichinyi punyontenyan nyoman. Kamwaghan ante ECHOTYON lenyoni. Osyolchininyi ewunyan, atyorunyi rökunenö koghichona mi parak, aghinyi kara kegh nko kutïng nyo kinagh lömïs,

²⁶ntömakïnyorchininye chi oringu kogh nyo kïteksyegho. Mörumunonye oringu kogh pö luch! Ikorenyi kegh nko kor nyo le surkwen kokay! Kamwaghan ante ECHOTYON lenyoni.

²⁷“Osyolö yïm pentera poryot ompö ngwïny akuta konti poryot kïlïm koroswö löwïr Omwochinö kïnap kegh kïporyegho Papilon Okurunö pöyunötin walaka kïpka kupokyï! Paytaghpa Ararat nko Mini nko Askenas Akïla yetïn kuntöghoghchï lïkoschoni löwïr Orongunö angoletin cho tenö talam!

²⁸Omwochinö koroschoni kïnap kegh akïporyeghö Papilon. Omwochinö pöytoghi koro Mede nko yetïntinekwa nko kintöghoghikwa. Kanya kïpetïta akonga nko lïkos pö koros walaka cho pöytoy koro Mede.

²⁹Wechï kipotan akupelpel terït koro Papilon ompö ngwonïn! Ompöwölo kamwaghan akonga ante ECHOTYON lö lïku koro Papilon surkwen nyo puryö chi nyo möngöy orinyi.

³⁰Kikelot lïko Papilon ompö poryot köwïnchï kegh wölo mi teköwekwa amökïtïngcha owesyö nyonikïny karkegh nko kor. Kikeriy kukot pö körin ompö kanastina Papilon, akepela ma korikwa cho möngöy.

³¹Köryöwï kiyoktoghï kïtapanï kegh, ipchini pöytoghinto Papilon lökoy lö, lenchini kikepar kanasyantenyi ompö wop tïkwïl.

³²Kikïnam pung wölay kyoghyegho lalwatïn akïpela ma teköwechi akikïmïgh lïkenyi.”

³³Lentöy ECHOTYON Kimuktoghin, Tororöt pö Israel, “Lata Papilon rökor, ato kïtïgho pagh. Tomtoy nyu ato kïngoghöy chane le pagh.”

³⁴Lentöy pipö Yerusalem, “Kingwïn Nepukadnesa, pöytoghinto Papilon kanasyantencha, atolapay kunyaknyakecha akï kïnïkughecha le ntara kunyïghit muyenyi tïkucha cho karamach.

³⁵Nya ketökï Papilon ghoyïn nyo kighwecha kikotönecha akïtïghenecha pich. Nya kïtïpï kisönköcha paraku pipö Papilonia.”

³⁶Kïlenyona lentöy ECHOTYON, “Oporyeghwokwa ante ompö ngalechete, otökwekwa pipö Papilon ompö ghöyïn nyo kighwekwa. Oghan nanamungwa kïteny akï tenyot tïkwïl lalwatïnekwa.

³⁷Orulan Papilon kutïkumisyö koghïn. Lïku möngot pö chepkonöw wölo kïsösöy akewöghöy kewer akï wölo puryö chi nyo möngöy ori.

³⁸Pororsot pipö Papilon le ngötuny akupkonsyö le wara ngötuny

³⁹Ato sïru mutïnö owetan opöghöy chane opöghonan kumïn kïtömesyö kumes. Ruyot nyu nyo mötïny kïngetyö. Mwoghöy ECHOTYON.

⁴⁰Oretenan chane kepa ketïgh le kech nyo kïpetöy keyengöy le makal anta kwagha nyo pö yengsyö.

⁴¹“Kakïrïnta Papilon lö ne nya wey! Papilon nyo kikwolöy ngwïnya kïmïkul! Kalïkwï nyo otyegho pipö koros ato sïwa!

⁴²Ghumonuy pung pö Papilon ato pkonöy Lata mirtino pögho nanam ompö chepkiriri cho pkonöy akulum kor kïmïkul.

⁴³Kalïkwï Papilon kor nyo otyot pich ato sïwa surkwen nyo kiyam puryö pögh akï puryö chi nyo möngöy, kor nyo mewerönye chi kokay.

⁴⁴Omungan Pel, tororöt pö Papilon otöpan kungungï kïgh anka tïkwïl nyo kinïkugh. Melö tökïsoröy koroswö akïsagh nyinte ngat. Kikïrulyö nïyet pö kanastina Papilon.

⁴⁵“Akwa pikachu, pipö Israel, oryöwunenö korononi! Osörunö kegh kïtomö anyaran Papilon ompö sïngiryenyan nyo ngwan!

⁴⁶Okilö kegh, amomïghyö ompö ngal cho olïmekwa kemwoghöy lö keghisyö chay könyinay kwighisyö chï könyinï, lö köporyö pöytoghinto nko pöytoghinte anka ngala ryöpöt nko poryot ompö kor.

⁴⁷Wölo nyo pö nyoman itu osiswö cho otyökotyökan tororötino Papilon Nömöy arasï korononi aketïghöy pikachi lömïs.

⁴⁸ Atoni nyu kïtum tum pö ngörekyö ngwïnya nko kïgh anka tïkwïl nyo mi orinyi Ngörökyini lö kakïrïnta Papilon, karïnta pich cho kapkana koros cho mi okumpö ewu löt, cho kapka kïporyeghö nyinte.

⁴⁹ Akï Papilon nyini kipar tagh pipö ngwïny cho chang wölo körul ye nyu ompöwölo kipar tagh pipö Israel.” Mwoghöy ECHOTYON.

⁵⁰Lenchini ECHOTYON pikachi cho mi Papilon, “Akwa cho kyochïwïtyeghö ngot, omïlisyenö nyete le ye, amonyïrtighisyö, anananïn kïrkegh kochï lowöch ompö kaw. Mowutyeghö kanasyanta Yerusalem.

⁵¹Kalïmakwa omwoghekwa lö, ‘Kökïlïmchicha kegh nyo gha akïnamecha arasï ompöwölo kapka pich walaka Kö pö Tororöt* akïlït kot wölo tïlil.’

⁵²Kïlenyona omwoghan ante ECHOTYON lö kikwit ato orwokan kewang körkeyïntino Papilon, kïriryö cho kanam sitöt ompö kore kïmïkul.

⁵³Kïrkegh kïlany Papilon yïm, akïwö kïtek wölo gheto kegh, oyonchinan kinyorin kïpar nyinte.” Mwoghöy ECHOTYON.

⁵⁴Lentöy ECHOTYON, “Atere rira nyo mi Papilon! Köriryö ompöwölo kakinyar koro Papilonia.

⁵⁵Onyoran ante ECHOTYON Papilon kïsï, amökïngongönye kutinyi nyo wow ngat. Keghumonï pungkachi le mirtino pögh cho chang, pkonöy kuteghyonu otini pokyini

⁵⁶akunyar koro Papilon Torchini morïn akïnam Papilon akïrïngarïng kotikwa. Ochan Tororöt nyo omungöy mwokïyis kïlenyona oghchinan Papilon kïrïp kegh nko ghöyïntanyi.

⁵⁷Oghan kïtömesyö yetïntinekwa cho pö lïk nko piko lïk tömesyot tïkwïl pikökwa cho ngöghomöch nko kintöghoghï löwïr. Nyoru rïwön nyo mökïngetyonye kokay. Kamwaghan ante nyo ochï Pöytoghin, ECHOTYON Kimuktoghin kaynenyan.

⁵⁸Rulsot nïyet pö kanastina Papilon cho töpesöch kïpelöy lömïs kukotichi cho koghöch. Kwïle pöghisyö nyo kegh pich, akawirta kegh koroswö kwïle. Ompöwölo sörömu tïkuchoni kï kepela ma.” Mwoghöy ECHOTYON Kimuktoghin.

⁵⁹Kitïng Sedekia pöytoghinto Yuda kingörokintenyi nyo kïkuro Seraya, wero Nerya, kuköto Maaseya. Ompö könyi angwan nyo pö paytaghtanyi kinomnyoto nyinte nko Seraya kïpa Papilon. Kïkany alïman lenyoni achengan pöroyïnoni oyoktö Seraya kwip ngölyon Papilon.

⁶⁰Kikyokirchan tagh ngal löwïr cho ngölono nyarïl nyo ngwïnchini Papilon nko walaka paraku Papilon kitapï.

⁶¹Olenchan nyu Seraya, “Nyini ketanyi Papilon, omökan somönchinönyi pich ngalechï löwïr

⁶²akwato iwany, isagh ECHOTYON lö, ‘Kiwaghanyi, we ECHOTYON lö inyorenyi koronete ntömökïminye kïgh anta ptangengmöt nyo möngöy orinyi. Lïku kore surkwen kokay!’

⁶³ Otini kewanganyi isomönchï pich ngalechoni kikikirchï kitapï, icheng kogh airötyï kitapu atolapay iwirchï pögho lalwa Yuparet aimwagh lö,

⁶⁴‘Nka nyete wölo lïku koro Papilon. Chïntoy nyo melö tökutoku ngat kokay. Lïku nyoni ompö kinyarat nyo ipchini ECHOTYON.’ ” Ngalechï kï sörömu ngala Yeremia.