Read pokoot YEREMIA 7 Bible Online

YEREMIA 7 - pokoot bible

YEREMIA 7

¹Kiyoktanïn ECHOTYON owö oghyongö kuka Kö pö Tororöt, amwochï pich lö, “Akwa pipö Yuda löwïr, cho olïtu köyete tasagha Tororöt, atera ngölyonto ECHOTYON Kimuktoghin, Tororöt pö Israel! Oghïtenö ortïnekwo awaghach otöptinekwo atopïswokwa amanga koronete.

⁴Orip mater ngalechï pö putintön lentöy, ‘Kö pö Tororöt nyete! Momechanye kïgh, Kö pö Tororöt nyete!’

⁵“Oghïtenö ortïnekwo awaghach otöptinekwa. Agha man ompö kwenungwo kïtenö osis.

⁶Mopïr to nko pönon nko mïsïktin, amamïlta kisön pö pich cho mötïng lelut ompö koronete. Okïr masagh tororötin walaka tömopchï kegh nyarïl.

⁷Ato owöghökisyökwa löwïr lenyoni, opïswokwa amanga koronete kyotönön könyisyok papotïnekwa.

⁸“Wölo, atï nyu katwaytekwa kegh ngala putintön cho puryö tösunöt.

⁹Kochorsyekwa arïmisyö agh cheporesnan awolwolisyö ompö putintön apelchï Paal* amöros asagh tororötine walaka cho monkïtökwanye.

¹⁰Atomuchö, apkanakwa oghyongö tawunyan ompö köyï pö saghat kïkurtegho kaynenyan amwagh lö, ‘Momechanye kïgh, kalya!’ Aletakwa agh tïkuchoni töghanïn kisön.

¹¹ Ayo, kalïkwï so köyï kïkurtegho kaynenyan köpöno chorï? Molenchï kegh mosïwïyanye kïgh anka tïkwïl nyo oghekwa.

¹² Ape nyu Syilo, kanasyantenyan nyo kyakïlan köny lö kïsoghenanïn tasïwena wölo kyanyartan ompö ngoki piköchan, pipö Israel.

¹³Anyï ye kaghakwa tïkuchoni löwïr kigh chane, akï kïrkegh kyongölonwokwa kïnyïl cho chang, kimaterakwanye. Kyolan ompö okurokwa, wölo mongitönchanïkwanye.

¹⁴Kïlenyona, oghchinan köyete pö saghat kïkurtegho kaynenyan, akï nyï omontokwa kegh, le wölo kyoghchan kanasyanta Syilo. Oghan lenyoni ompö köyete kyokonokwa nko papotïnekwa le wölo kyaghan ompö Syilo.

¹⁵Otulenokwa tawunyan le wölo kyotulön pikökwa cho pö ara Epraim lömïs.

¹⁶“Akï nyi ye we Yeremia, mesoghchï pïchï amerirchanïn tosyonchan chane, ompöwölo moterunyinye.

¹⁷Mesïwïyenyinye so tïkwïn cho ighöy chane ompö kanastina Yuda nko kanasyanta Yerusalem?

¹⁸ Rïngu kwen monïngö, kuna mot papotïne, kïtïntïr yotïnö pïsye chi kigho makatin cho kïropchini tororötïngwa nyo le korka nyo kighöy Pöytoghinto Yïm. Atolapay, kïpighchï dipay* le ropöw tororötine walaka akïlentöy tökïngwonchanïn.

¹⁹Wölo lenchini kegh so ngwonchinanïn choni? Ewo, möngwonchinanïnye ompö nyo le kite! Kepchï kegh chane pat ngwonïn nko arasï!

²⁰Kïlenyana, kamwaghan ante Echotyon TORORÖT lö, arosa, omïlchinan yete nörekyenyan, omïlchinan ptangengmöt nko tyonkïn nko keti wuw nko pagh cho tökïmi paren. Nöghöy nörekyenyan nyoman nyo memukönye chi kïnuk.”

²¹Lentöy ECHOTYON Kimuktoghin, Tororöt pö Israel, “Ne mokulkulyö pat ropöwekwo choni nko amörostine cho kïpelöy atolapay am akwane panye?

²²Ompöwölo, atanya kyamïtunan papotïnekwa koro Misri, melö kyangalanan, amotönönye chane kirurut anka tïkwïl nyo pö amörostin cho kïpelöy nko ropöw.

²³Wölo kyomwochan chane lö, ‘Atera kutinyan talïkwan Tororötïnkwa, alïkukwa piköchan, arïp ngalechï löwïr omwowokwa atonyorunö pöghisyö nyo karam.’

²⁴Wölo melö kiter kutinyan akipechï kwigh kïrïp kegh nko kinonutkökwa kegh nko tighintöno mïkuliskökwa cho kinyïghï ghöyityö akuyoda kegh löt nyo kötö petöy tagh.

²⁵Kïngeta atanya kingetunö papotïnekwa Misri nko ye, kyoyokwan kïtenö osis mötworichan cho le werkoy,

²⁶wölo kimayangakwanye ater ngalechan, alïkukwa pich cho oghïghe mötöwö atolapay aghakwa cho ghach tya kïtïl papotïnekwa.

²⁷“Kïlenyona Yeremia, imwochinenyi chane ngalechete löwïr wölo melö terunyi. Ikurenyi chane, wölo melö ngitönunyi.

²⁸Ilenchinenyi nyu chane, ‘Ochikwa pich cho melö kiter kuti ECHOTYON Tororötïngwa, amachamcha kïpïstö or nyo gha kïrkegh sitöt nyo kyonyorukwa. Melö tochikwa pich cho ghönote, amökengölononye kwenunkwa ngölyontononi.’

²⁹“ ‘Akwa pipö Yerusalem! Arwaka mötöw asönön! Oriryeghenö kutïngkot parak le ato kama chi, ompöwölo kataghakwa ECHOTYON, akwa pïnï kotyorï nörekyenyi!’

³⁰“Kegh pipö Yuda tïkwïn cho ghach ompö tawunyan otï kepï körkeyïntino tororötinekwa kïlïtï köyï kïkurtegho kaynenyan akusïmnyon.

³¹ Atolapay kïpa Mpöghoghyo Inom akïtek ato kïpelo amöros ompö Topet, atökïpela monekwa, wor nko tipïn le amöros. Anyona nyu kïgh nyo melö kyomwochan chane amengwïnye mötïnyan kïgh nyo lata nyoni.

³²Kïlenyona nyu, itïtoy ato melö tökeghöy atoni ‘Topet,’ anta ‘Mpöghoghyo wero Inom,’ wölo ‘Mpöghoghyo Meghat.’ Wölini wölo kïtïpchini pich ompöwölo tenö atoni mökïminye karerana wölo kïtïpchini pich.

³³Lïku mïntïrichtino pïchoni omisyo törit nko tïpö wudïn amöminye chi nyo pkongöy.

³⁴ Owongan kililïyöto ngörekyö nko roröt ompö kanastina Yuda nko kanasyanta Yerusalem, amakelïmönye ngörekyo kensyö ompöwölo lïku koro surkwen.