Read pokoot LOK 4 Bible Online

LOK 4 - pokoot bible

LOK 4

¹Melö tökukwörkwersot koltinecha le nyo kipö tagh! Kötoyechï koghïn cho pö olyot nyo wow ortïna kanasyan karkegh nko koghi Kö pö Tororöt* atanya kirul.

²Ki pïchighöch chumwakayi Sayon* kikiyitöcha lö karkegh nko koltin cho kwerkwersot, wölo ye karkegh nko töreni nyïngwïtyan.

³Olentan nkït suyon kurerïyi warechi wölo ghach piköchan, karkegh nko cheptusonkoltin cho möngöy surkwen.

⁴Köpïsyï chane mnyarkiltinekwa kïmeghö ompö kömöy nko maral somöy monïnge omisyewut wölo möminye chi nyo töni chane kïgh.

⁵Kömeghö ompö ortïna kanasyan pich cho kyomöy tïkwïn cho okwoghöch. Kesankwach pich cho kile sïkön samï cho kökipukunö korïn atökïnyorchï tïkwïn cho omöy.

⁶ Könyorï piköchan sitöt nyo wow kïmolï nyo kinyorï Sodoma, kanasyan nyo kinyar Tororöt ompö pöroyïn nyo tangogh amemuka kïnam chi kegh möt ompö sönönöt.

⁷Ki pïchighöch yetïntinekwa nyoman, ki tïlöy takarïs akï relach kïtïl chö, ki pich cho le tïngan akwowesöch, ki pich cho kikaramach kisön.

⁸Wölo ye tuwöch porwöy kïtïl wos menkïtunye chi lö ngo ato weröy ortïna kanasyan. Kichönkwïlyö chane kïruyö ko sany, kiyomö ontöyi porwöyikwa le kwenta.

⁹Kingwangwa megha chok ompö poryot kïtïl megha kömöy, ompöwölo kichönkwïlyö nyo kogh akutupï kong meghat ompö rörchin pö omisyö.

¹⁰ Kingwïnchï piköchan nyarïl nyo mamïnïng, nyarïl nyo kigh yotïn cho kiyongöy monekwa kugha monekwa akwam.

¹¹Kimïlï ECHOTYON nörekyenyi kïmïkul, nörekyö nyo ngwan lakat, akïpela ma kanasyanta Sayon kïnagh kuwonyö lö körpïs.

¹²Melö kimi chi anta pöytoghin ompö ngwïny, nyo kighönöy lö kimuköy pung kupokï akïlïtï kukoti kanasyanta Yerusalem.

¹³Wölo kigha lenyoni ompö ngoki werkoyichi, kigha lenyoni ompö ghöyityo tïsichi. Kimïlta chane kisön pö pich cho puryö lelut.

¹⁴Kitompöroryö werkoyichoni nko tïsï ompö ortïna kanasyan le chepkarotin Kikikïlïkwï chane sïmnyon ompöwölo ki pröch chane morïn. Kilïkwï sïmnyon ntökïkïr kegh pich maswany chane.

¹⁵Kiteghchï pich chane kïlentöy, “Anaka! Ape, ochikwa sïmnyon! Moswongöy pich!” Nka nyay kiwusötö chane kïghömï koros amelö mi chi nyo kitach chane ompö kestonikwa.

¹⁶Kitoytoyö ECHOTYON chane, nyo melö kitökïyang chane ngat melö kitokïkonyït nyinte tïsï amelö kitökuporchï ngat kintöghoghikwa tokoch nyo karam.

¹⁷Kikïtopönöcha kuchiryecha konyïn kikichalacha rïwön tökenyorunö kingörokut, kingörokut nyo metunye! Kikikönecha kingörokut kungwïna kore anka, kor nyo kimemukönye kïsörwecha ompö pung.

¹⁸Kisöpchecha pung ntömökemukechanye kepa sany ompö ortïna kanasyan. Kikesïwecha lö kikuwonyö osiswecha, kiketacha söröm.

¹⁹Ki pïrtït pungköcha kïtïl sichtin cho mïröy yïm kiyonotecha kepusa kutïngkot, kimirecha akupulchecha ompö surkwen.

²⁰Kitorchï chane morïn pöytoghintencha nyo kikïl ECHOTYON, kikitwoytocha kegh pöytoghintononi le kimïny nyo ighecha kesöpchenö. Akï nyo kikikönecha lö nyinte onkït, nyo sörwecha ompö pungköcho.

²¹Akwa pipö Edom nko cho pö Us cho owökecha! Ne mongörekyö, aturonchö nya? Wölo tomönye kite itwokwa tïkwïl nörekyo ECHOTYON nyo metukokwanye! Otömesyokwa, achïr sïro apa kïchïrutöch ompö arasï!

²²Kikemuny Sayon ompö ngokichi akikumuchö melö tökerongecha ngat kepe pïnotön wölo melö lenyoni ompö nyi we Edom, tökïsis kïmunginyi ECHOTYON ngongu nyinte ngokiku kipka sany.