Read pokoot ESEKEL 1 Bible Online

ESEKEL 1 - pokoot bible

ESEKEL 1

¹ Kisïwa Esekel tïsin wero Pusi kiyata yïmö kïsïwa sïwïyagh, ki asispa mut nyo pö arawa angwan ompö könyi tömönut sömök ompö lalwa Kepar omitan koro pïnotyon.

² Ompö asispa mut nyo pö arawa ompö könyi mut kïmi pöytoghin Yeoakin pïnotön,

³kingwïnchï ngölyonto ECHOTYON Esekel tïsin wero Pusi ompö koro Papilonia ompö lalwa Kepar akimi owesyo Tororöt nko nyinte.

⁴Otini kyolan arosïta, asïwan pïchpïch kungwïna okumpö tagh nko polta nyo mamïnïngnye, akuryal yïmö kuwit ompö kiryal nyo lenye tay.

⁵ Atolapay kuchumuna kwen tyonkïn cho le angwan cho sötote, kilenye nyï wölo lata, kilata chi wölo le por,

⁶wölo kitïng anka tïkwïl tokochtin angwan nko kapepoy angwan.

⁷Kighïtoy kelyon lachïs akïtïng putïlöy le tany cho kwörkwör le tay nyo kakisït.

⁸Kitïng morïn angwan cho lata cho pö chi cho mi nko kapepoy chay le angwan ompö woptin angwan.

⁹Kiryam köpepokökwa löwïr, akwotini petöy kipetïtoy akonga amelö kiwöghököy porwöyikwa.

¹⁰Tïng kïgh anka tïkwïl ompö chane tokoch nyo sis, tïng tokochu chi ompö wölo le tagh, kïkarkegh tokoch ompö okumpö tagh nko tokochu ngötïny, kïkarkegh ompö okumpö löt nko nyo pö egh, kïkarkegh ompö okumpö löt, akïlenye tokoch nyo pö sich ompö okumpö patagh.

¹¹Lenye nyoni wölo lata tokochwekwa. Kighïtoy köpepokökwa cho le odeny kuryam, kuyenteghö köpepokö chinö walaka le odeny porwöyikwa.

¹²Wetöy tyonyoni anka tïkwïl kugheghöy wölini pörtoy amötïnye kiwaghaka ompöwölo ki chankonyïn.

¹³Kimi kïgh kwenu tyonchoni nyo kinoghöy lötonkor le tochtin cho pestoy. Kiryölsot le ilat.

¹⁴Kiryöghöy tyonchoni sötote kïpetöy tagh nko löt le kiryal.

¹⁵ Otini nyu kyomitan orosöy tyonchini sötote, asïwan koropetin angwan cho mi kamasu tyonchini.

¹⁶Kilata koropetinechay wölo kikida koghïn cho kwörkwör kikigh kïlentöy chi koropetin nyo mi korope anka ori.

¹⁷Otini kapa koropetin kipetöy kutöngöy woptin angwan amöwoghökisyö.

¹⁸Kitïng koropetinechay karïn cho tïng kerat koghöch cho westegho, kitïng konyïn cho chang koropenay.

¹⁹Otini kapa tyonchay sötote kïpa koropetinechay tïkwïl ompö kamasungwa. Akwotini kanget tyonchay sötote ompö ngwïny kïnget kelyo koropetin tïkwïl.

²⁰Pepetoy koropetinechay wölo ketang tyonchoni sötote ompöwölo mi mïkulis pö tyonchini sötote koropetin ori.

²¹Kïlenyona nyini kapesta tyonchay sötote, ato ghyongchö anta nget ompö ngwïny kwighöy lenyini tïkwïl koropetinechay.

²²Mi kïgh parakungwa nyo kimirï le kïtompïl wölo rel nyo köryol nyo mirmiröy.

²³Kighïtoy nyu tyonchay sötote köpepoykökwa ompö mïröt kutang wölo mi anka, atolapay kuyenö kegh anka tïkwïl köpepoy odeny wölini nko wölini.

²⁴ Akwotini kanget kïpa kughum köpepoyï le puseryon, kïtïl le Kimuktoghin akughum le kimömöto pipö lïk. Nyini keghyö kïmaman köpepokökwa.

²⁵Kungwïna chöghötö paraku kïyay kimirö kuryal kimi paraku tyonchay sötote akwotini keghyö akïmaman köpepokökwa.

²⁶ Kilenye kïyay kimirö ngacharu paytagh wölo le parak nyo karkegh nko kagh nyo kikuro Sapira akïtöpö kïgh ngacharunini nyo lenye chi nyo töror tya.

²⁷ Kiköryol kïngeta kïrut kutoch le tay nyo mirmiröy le ma kuwit, akilenye wölo porö kïngeta kïrut ma nyo kulöpochï nyinte lönga.

²⁸Lenye atay kömirö kïtompïlyö lenye nyoni wölo lata ororyo ECHOTYON.