Read pokoot ESEKEL 12 Bible Online

ESEKEL 12 - pokoot bible

ESEKEL 12

¹Kungwïnchanïn ngölyonto ECHOTYON kïlenchanïn.

² “Wero chi, imöngenyi nko pich cho le tighï cho tïng konyïn wölo merosïtocha, tïng yitïn wölo mölïmöcha kïgh ompöwölo kanyasak chane.

³“Kïlenyona wero chi, rata kariku aiwuw pöghet kïsïwïyi pïchï. Iweghonyi korengu le pïnotyon iwetöy kore anka, kïsïwïyinyi chane. Töptoy pköchini ana kïgh kïrkegh kö pich cho le kanyasak.

⁴Ipunenyi kariku cho pö pïnotön sany pöghet kïsïwïyi chane, ato mi mönon wuw kïsïwïyi chane le chi nyo wetöy pïnotön.

⁵Ponchosö nayat kïsïwïyi chane telïtö relö, sany kïsïwïyi chane.

⁶Ikochenyi koriku pugh kïsïwïyi chane aiyen konyiku tömesïwa ngwïny. Ompöwölo kaghinyi lïkuna machey nyo pö pipö Israel.”

⁷Aghan lenyini kamwowanïn. Kyopkan korichan kïpka sany pöghet le kari pïnotyon anganyan nayatunay mönon ompö morichan, awan oghö nko karichu cho mi pugh kïsïwïyi chane.

⁸Kïlenchanïn ECHOTYON tökwogha

⁹“Wero chi, matepïnyinye so kanyasakchï pö Israel kïgh nyo keghanyi?

¹⁰Lenchinö chane lentöy Echotyon TORORÖT, ‘Pö ngalechï kintöghoghinto Yerusalem nko pipö Israel löwïr cho mi ori.’

¹¹Lenchinö chane ichinyi kiporunöt ompö chane. Oghchinan chane lenyini kaghan. Kinömöy chane akerang kïpa pïnotön.

¹²Akwipöy kintöghoghintengwa korichi ompö pugh ogho akïwö kurel nayat nyo kangany. Yentoy konyichi tömösïwa ngwïny ompö konyichi.

¹³ Atolapay nyu aluman nyinte netïnyi, kïnam nyu nyinte ngöghöpunyan atolapay opön Papilon koro Papilonia, amasïwanye wölini, akeporchini wölini.

¹⁴Atolapay otoytoyan pikachi löwïr kïghömï ngwïny kingörokichi nko pikachi pö lïk atolapay arupan chane chok.

¹⁵“Atökunkïtï lö ochan ECHOTYON otini kotoytoyan chane kïghömï punton nko koros.

¹⁶Oköngan kïchïwïtyö cho ngorï ompö chok nko pekat nko amal atö kïkötö sïmnyontönengwa löwïr ompö wölini mi chane, akunkïtï lö ochan ECHOTYON.”

¹⁷Kïlenchanïn ECHOTYON,

¹⁸“Wero chi, omisyenö ompö potana, ghegha pögheku ompö mïghö

¹⁹ailenchï pipö koronï löwïr lö, lentöy Echotyon TORORÖT, ompö pipö Yerusalem cho möngöy Israel, omisïyekwa ompö potana, aghegh pögh ompö mïghö. Kinyöngo korengwa tïku löwïr ompöwölo kikïlïkwï chelölos pich löwïr cho möngöy ori.

²⁰Akïlïku kïratis kanastina cho kimöngisyote, kïlïkwï kore surkwen. Onkïtukwa nyu lö ochan ECHOTYON.”

²¹Kïlenchanïn ECHOTYON,

²²“Wero chi, ompö ne tökïmwoghöy pipö Israel ngötïnyö nyo lentöy, ‘Pkonöy osiswö akuwer wölo puryö sïwïyagh ompö akonga nyo pïntoy lenyini kakïngor?’

²³Lenchinö chane lentöy Echotyon TORORÖT, ‘Owongan lökïr ngötïnyononi ompö Israel.’ Ailenchï, ‘Kikwitïta ato pïntoy sïwïyagh anka tïkwïl.’

²⁴“Kïngeta atoni mokïminye nyu putintön nko werkoynöno putintön ompö pipö Israel.

²⁵Ongölonan ECHOTYON akwigho lenyini melö tökerentoy, itïtoy ompö asiswekwa we pïchï le kanyasak. Lentöy Echotyon TORORÖT ongölonan ngölyon aghan lenyini kïpïntö.” Mwoghöy ECHOTYON.

²⁶Kïlenchanïn ECHOTYON ngat,

²⁷“Wero chi, rosa lentöy pipö Israel, sïwïyagh nyï imwochinenyi chane kïpö osis cho chang cho pkonöy, pö osis cho lowöch.

²⁸Wölo lenchinö chane lentöy Echotyon TORORÖT, ‘Möminye ngölyontenyan nyo ropu nyo kogh, opuntenan lawel lenyini kamwaghan.’ ” Mwoghöy ECHOTYON.