Read pokoot ESEKEL 13 Bible Online

ESEKEL 13 - pokoot bible

ESEKEL 13

¹Kungwïnchanïn ngölyonto ECHOTYON, kïlenchanïn,

²“Wero chi, ngora werkoy pö Israel. Lenchinö chane cho rwotïtoy ngalekwa opïn kïter ngölyonto ECHOTYON.”

³Lentöy Echotyon TORORÖT, “Heywey werkoy chï pö putintön ngaleko mötöwöyikwa opïn amömi kïgh nyo kasïwa.

⁴Lenye werkoykökwa chepkonöw ompö kïratis we Israel.

⁵Melö kip kïrïp adoketis cho ponkos anta tek nïyet cho kirulyö tökïgheta kegh pich ato ngwïn poryot ompö asis ECHOTYON.

⁶Ngölonöy chane putintön akïngoröy mötöwekwa putintön, ato lentöy kölö ECHOTYON, akwanyï melö kayonta ECHOTYON chane, könöy nyu lö kötepuntochini ECHOTYON ngalekwa.

⁷Osïwïyekwa sïwïyaghtina putintön angorakwa putintön otini olentekwa kölö ECHOTYON akwanyï melö kongölonwekwa.”

⁸Kïlenyona lentöy Echotyon TORORÖT, “Ompöwölo le otinö putintön ngalekwa nko sïwïyaghtinekwa oghöchinokwa nyoman.

⁹Omungan nyu werkoy chï mwoghöy putintön akïngoröy ngala putintön. Melö tomitenökwa atotuyot piköchan kururöy kegh amökïminye kaynötutkökwa nko cho pö pipö Israel, amomïlisyonekwanye koronï. Ato onkïtukwa lö ochan Echotyon TORORÖT.

¹⁰ Kilïs werkoy piköchan, kilentöy, ‘Kalya,’ akwanyï melö mi kalya. Nyini katek piköchan nayat kïnget werkoychï kimala relnoy.

¹¹Nyo lenchinö chane rulöy nayatunkwa nyo motïny. Anyona ilat nyo ropönöy takarïs nko yomat nyo wiröy nayatunkwa.

¹²Atolapay nyini körul nayatu, ketepenekwa nyu lö, ‘Kipö ne amalenakwa relnoy nya?’ ”

¹³Kïlenyona lentöy Echotyon TORORÖT, otyorunan ilat nko takarïs ompö nörekyenyan tökuwurta nayatunï.

¹⁴Orultenan nayatunï kïrkegh kikïmala relnoy tökïngotï kitorutyenyi kwïle. Akïnyini körul kuwonyekwa lömïs ato onkïtunö lö ochan ECHOTYON.

¹⁵Oghan kïpïntö nörekyenyan ompö nayatunï nko chane cho kimala relnoy. Atolapay olenchokwa kirul nayatunï nko pïchini kimala relnoy,

¹⁶nko werkoychay kingor akïsïwa sïwïyaghtin lö mi kalya Yerusalem akwanyï melö mi kalya nyonikïny. Mwoghöy Echotyon TORORÖT.

¹⁷Kïlenchanïn ECHOTYON, wero chi ngora koru Israel cho le werkoy cho mwoghöy ngala mötöwekwa opïn.

¹⁸Lenchinö chane lentöy Echotyon TORORÖT, “Heywey koruchï nopchini morïn akïrötyï mötöwöy anankis pö tïpö chepsoköynön tökïpana pikö walaka. Omökekwa opöghisyenö tïkuchoni orïmenö piköchan, asïkönö?

¹⁹Kokonanïkwa arasï ompö piköchan, alïs lö tökenyorunö matay kwïle nko makatin tïkwïte aparakwa pich cho kömïchini kïsöpchö, apïstekwa kïsöpchö cho kötomeghot ompö putintönenkwa.”

²⁰Kïlenyona lentöy Echotyon TORORÖT, “Otoghan nyoman tïkuchoni pö pönut korötchikwa kegh tomughenö apana pich. Opokpokan ompö morikwa, atyaktan pïchï löwïr cho kyolekwa kïpönöy kïpa le törit.

²¹Opokan anankischï körtonekwa löwïr, asörwan piköchan ompö morikwa. Onkïtunekwa nyu lö ochan ECHOTYON.

²²“Kïle wölo kyaghakwa chi pö man kïma mu kïrkegh tomönye aghan nyinte kïma mu, arompörökwa chemwokïyon kïtas tagh nko ortïnechi cho ghach tömösörï kegh.

²³Kïlenyona melö tosïwïyekwa sïwïyaghtinekwa chay pö putintön anta angor ngal le su. Osörunan nyu piköchan ompö morikwa, atonkïtunökwa nyu lö ochan ECHOTYON.”