Read pokoot ESEKEL 16 Bible Online

ESEKEL 16 - pokoot bible

ESEKEL 16

²“Wero chi, porchinö Yerusalem tïkwïn cho ghach cho kikwigh.

³Aimwochï Yerusalem lö mwoghöy Echotyon TORORÖT lö, “Kikïyichini koro Kanan. Pö papongu pipö Amori, kï pö yongu pipö Ititi.

⁴Möminye chi nyo kimut sïrumpengu otini kikïyiyinyi anta mwatinyi tïlilitunö anta chïkeninyi partin anta yenïn.

⁵Möminye chi nyo kisyonchinyi kwighunyi tïkuchoni amöminye chi nyo kichaminyi wölo kikïwirchinyi sany, ompöwölo kikïmötinyi asisini kikïyiyinyi.

⁶“ ‘Otini kyaweran ato lekïto nyi, asïwinyi tyorsïye ompö kisönköku. Olenchinyi isöp lasiny

⁷aipit le ket nyo tïnkus nyo mamïnïng ailïkwï mïrar. Kïrïtunyi kitïn akïpit puteku, ompöwölo kichinyi chïrut.

⁸“ ‘Otini kyaweratinyi ngat, asïwan lö kömïchï kepinyi. Oyenan chïrutyengu kotinyan, ayomisön opinyi. Aman muma* nyo pö kensyö nko nyi, ilïkunyi nyinyan. Mwoghöy Echotyon TORORÖT.

⁹“ ‘Achengan pögh amwatinyi, awuntö kisönköku atolapay ayileninyi mwagh.

¹⁰Kyolokunyi sïro cho pïchigh nko kwegh cho pö menyon nko sïra katani nyo pïchigh nyo kiyeno kegh.

¹¹Olokunyi karïn cho pïchighöch, cho pö ewun nko sïrïmnyon nyo pö kat.

¹²Akoninyi kaymorïs nyo pö sör nko taghoy cho pö yitïn nko tenta nyo pïchigh.

¹³Kitïngönyi kari koltin nko silpa ailokenyi osis sïro pö katani cho kikïsïl nko karïn. Kyomenyi makatin cho kikigha pïsya nko kumat nko mwaghpa orolwö. Pïchighitunyi nyoman ntökïrich lïkunanyi koko pöytoghin.

¹⁴Kirumtenyi ompö punton akwompö pïchighyengu, ompöwölo ani nyo kyaghinyi pïchighituna. Mwoghöy Echotyon TORORÖT.

¹⁵“ ‘Wölo kikwolenyi kegh pïchighyengu nko kinkïtötengu ailïkunyi cheporesyan.

¹⁶Kipöghisyeghenyi sïroköku walaka aimina wölo isoghonyi körkeyïntin, aighanyi le chepores nyo töni kegh chi anka tïkwïl, kïgh nyo kitomönye kwigha amökwighonye.

¹⁷Kichenganyi karichan pö koltin nko silpa chay kyokoninyi, aighanyi körkeyïntin cho le mïrön aigh cheporesnan tïkwïl.

¹⁸Kichenganyi sïro chini pïchighöch kyokononinyi, aiyenö körkeyïntinechini, airopchinyi körkeyïntinechoni mwadanyan nko tïkuchay ngutoy cho onyïn kyokoninyi.

¹⁹Kyokoninyi omisyö, pïsya nko mwaghpa arol nko kumat, wölo kitötenyi le amöros tökïnguchï nyo anyïn körkeyïntinechini. Mwoghöy Echotyon TORORÖT.

²⁰“ ‘Atolapay ichenganyi moneku cho le wor nko tipïn cho kiyiywaninyi, aropchï körkeyïntin le amöros. Ki kïgh nyo mïnïng cheporesnan nyo kighanyi so,

²¹tökïlïku nyï ketïghönyi monechan airopchï chane körkeyïntin le amöros?

²²Kewutyeghenyi so kegh? Menananyinye atanya kichinyi mïnïng, ato kichinyi chïrut nyo kilenyi walaka nko kisön?’ ”

²³Lentöy Echotyon TORORÖT, “Heywey! Heywey akwa chï kagh ghokï cho ghach le chï!

²⁴Kopechikwa atek korïn kurerang ortïn cho kïsogho körkeyïntin, agha cheporesnan ompö wolö töror.

²⁵Kyatekakwa wölo otöteghokwa amörostin tororötino putintön ompö sörömu ortïn aiwira terityon pïchighyengu otinini kepöghisyeghenyi ighena cheporesnan nko chi anka tïkwïl nyo kengwïnchinyi, ntökwanyi katasa tya cheporesnanengu.

²⁶Kyachamakwa ape pöröy nko pipö Misri, pörörisköku cho kiloyö nko pïrchin, aghakwa cheporesnan tïkwïl ntökwanyï kyanyalan.

²⁷“Ye nyu, okonokwa sitöt, achengenekwa kisoyönutköchan atolapay otonokwa mori melö relonekwa kong, ompö Pilisti cho otöptönkwa nyo pö cheporesnan.

²⁸“Kighanyi cheporesnan nko pipö Asirya tïkwïl, ompöwölo melö kimïchinyi chinö walaka kichinyi cheporesyantengwa.

²⁹Kighenyi cheporesnan nko mïnchïris pö Papilonia, wölo melö kimïchinyi ompö choni tïkwïl.”

³⁰Kilö Echotyon TORORÖT, “Kïchï nyi nyï kegh cheporesnan nyo metïng ompö arasï.

³¹Ketekanyi korin kurerang ortïn cho kïsogho körkeyïntin, aigha cheporesnan. Wölo melö kilatenyi cheporestin walaka, ompöwölo kitaghanyi ropïyen.

³²Ilatenyi korka nyo le chepores nyo chomöy pich walaka kïtïl pontenyi.

³³Töni mïrön ropïyen cheporestin, wölo ketönönyi ropöw nyo le nyi pich cho ichömenyi, ompöwölo imökenyi chane kïpkana wop anka tïkwïl kïpkonchinyi.

³⁴Ichinyi chepores nyo sis, möminye chi nyo kechikyinyi igha, ketönönyi pich ropïyen, möminye chi nyo koninyi! Kïlenyona ichinyi sis nyoman.”

³⁵Tera ye nyu chepkartayantanï ngölyonto ECHOTYON.

³⁶Lentöy Echotyon TORORÖT, “Kengwïsanyi sïroköku le chepores, aitönönyi kegh chamaneku nko körkeyïntineku, aitïghönyi moneku, aitö körkeyïntin le amöros.

³⁷Oghömïtunan chitoniku cho pö köny löwïr cho kichömenyi nko cho kitöghenyi. Oghan chane kuwitinyi, angwïsan sïroköku atökïsïwa chane chïrutyengu.

³⁸Orwokyininyi akwompö cheporesnanengu nyo kitïlanyi kasar nko kisön cho kimïltenyi, okoninyi sitöt ompö nörekyenyan nko sastaghnatenyan.

³⁹Otöninyi morikwa akurultoy chane wölay kighonyi cheporesnan, aisagha körkeyïntin. Chengöy chane sïroköku nko kariku cho karamach akïpïstinyi kïchïrut.

⁴⁰“Ipunyi pich cho möngörï kïwireninyi koghïn akïtörotöreninyi chokonikwa.

⁴¹Akïpel koriku akurwokyinyi ompö tawu kor cho möngörï. Oghinyi nyu pïstenö cheporesnan amökïminye ropïyen cho tetönenyi chamanköku.

⁴²Wonyot nyu nörekyenyan ompö nyi, akuwonyö sastaghnatenyan ompö nyi, akalyanan amelö tonörekan.

⁴³Kïle wölo kewutyeghenyi wölo kyanamtinyi atanya kichinyi mïnïng, aighaninyi anarekan ompö tïkwïn cho keghanyi. Kilenyona oghokeninyi ngalechi löwïr kighonyi?” Mwoghöy Echotyon TORORÖT.

⁴⁴Kïlö ECHOTYON, “Pöghisyegho pich mwaghatanï ompö nyi Yerusalem, ‘Le wölo lata kame, kïlata cheptö.’

⁴⁵Ilatenyi chepto yongu, nyo reyöy pontenyi nko monechi. Ichinyi chepto ompö tipikwa cho kirey poyikwa nko monekwa. Yongu kï pö pipö Ititi, papongu kï pö pipö Amori.

⁴⁶“Cheptönkwa nyo wow Samaria nyo mi okumpö löt nko tipichi, cheptönkwa nyo mïnïng kï Sodoma nyo mi okumpö tagh nko tipichi.

⁴⁷Melö kirïpanyi ortïnekwa anta igh ghöyityengwa, wölo kiwaghakenyi ompö ato mïnïng, ainyara kïtïl chane ompö ortïneku.

⁴⁸“Lentöy Echotyon TORORÖT, kïle ato osöpan, meghnye cheptönkwa Sodoma nko tipichi ghöyityö nyo lenye nyï keghanyi nko tipiku.

⁴⁹Ghöyityö nyo kigh Sodoma, kï kikwol kegh nyinte nko tipichi, ompöwölo kitïng omisyö nyo kyomöy, akï möngöy ompö kalya, wölo melö kiyang pich cho le chopot.

⁵⁰Kikwol kegh chane akwigh tïkwïn cho ghach, kïlenyona anyaran chane lenyini kyasïwekwa.

⁵¹“Meghnye Samaria ompö nïsu ngokï cho keghanyi, keghanyi ngokï cho ghach tya kïtïl chane. Aighanyi chane kïpöyit man ompö tïkwïn cho ghach löwïr cho keghanyi.

⁵²Ipö nyu arasingu onkït, köghachitu ngokiku nyoman kïtïl cho pö tipikwa, nyo kegh chane kïpöyit man. Nya kïnaminyi arasï onkït, aisït nïkisyengu onkït, ompöwölo keghanyi tipikwa kïpöyit man.”

⁵³Kïlenchï ECHOTYON Yerusalem, “Otyokan naman pö Sodoma nko tipikwa nko naman pö Samaria nko tipikwa, atyakan namanköku cho mi kwenungwa.

⁵⁴Tepönyi arasï akïnaminyi arasï ompö tïkwïn löwïr cho kighanyi tökïsaghsagh tipikwa chane.

⁵⁵Kiyokyini nyu tipikwa Sodoma nko Samaria nko monekwa ngat ororyengwa le nyo pö tagh, akeyokyininyi tïkwïl nko tipiku.

⁵⁶Melö kisasanyi so cheptönkwa Sodoma atanya kikwolönyi kegh,

⁵⁷kïtomö kïrumtö ghöyityengu? Kekaranyi kegh nko nyinte ye nyu, köroröchinyi ye nyu pipö Edom nko pöröroskachi nko tipö Pilisti cho sösinyi ompö wop tïkwïl.

⁵⁸Kenyorunyi kïrïp kegh nko cheporesnanengu nko ghöyityengu.” Mwoghöy ECHOTYON.

⁵⁹Lentöy Echotyon TORORÖT, “Owunyi lenyini keghanyi, ompöwölo kesasanyi kiyomisutköku ainyaranyi muma.

⁶⁰Wölo oripan mumenyan nko nyi nyo pö atanya kichinyi monïng, aghan muma nko nyi nyo pö kokay.

⁶¹Inonenyi ngal cho kighanyi, aisïkenyi arasï otini kamïla cheptönkwa nyay mïnïng nko nyay wow. Oghan chane le tipiku, wölo melö kyaman muma lenyoni nko nyi.

⁶²Oman ngat mumenyan nko nyi atenkïtunönyi lö ochan ECHOTYON.

⁶³Olöstewunyi lelutköku löwïr cho kighanyi, wölo otini kenananyi, nöminyi kïgh kut ompö arasï.” Mwoghöy Echotyon TORORÖT.