Read pokoot ESEKEL 27 Bible Online

ESEKEL 27 - pokoot bible

ESEKEL 27

¹Kingwïchanïn ngölyonto ECHOTYON kïlenchanïn,

²“Wero chi, rira rirchinö Tiro.

³Lenchinö nyu Tiro nyo mi sörömu kuka nanam akwighöy mïnchïrïsnön nko pich cho möngöy söremwok pö nanam, lentöy Echotyon TORORÖT, Kemwaghanyi, we Tiro, lö ochï pïchigh.

⁴Mi möngengu nanam kwen, kitekinyi tekï ompö tïnganat.

⁵Kipöghisyegho keti kutïng pö Ermon kïlïku mpawtin, akecheng keti Lepanon kïlïkwï pchori.

⁶Akïcheng ket pö oak cho mi Pasyan takwigh oars, kegha wölo kighyongo ompö sörömu nanam ket cho pkono Kupro atolapay keluma kela pelöw.

⁷Kegha melineku katani cho mi karïn cho pkono Misri, cho kïsöwuno kï low akelö anankis pö tïrisyen cho lata akwa lamay cho pkono Kupro.

⁸Kötöy melin pipö Sidon nko Arpad pich cho kötöy melingu kï tïngan pö Semer.

⁹Pipö melingu pich cho ighöy partin pich cho kikineta Piplos, akïpka melino nanam kwaleninyi tïkwïn löwïr.

¹⁰“Kimi nko askarineku askarino Pasya nko Lud nko Lipya le piköku pö lïk. Kiwuso kopïyenikwa nko longokökwa nïyetköku, tökïkoninyi ororyö.

¹¹Kirip nïyetköku askarina Arpad akïrip apentineku askarino Kamad, kikach longokökwa akuwusö kopïyenikwa nïyetköku. Pïchoni cho kimininyi nyoman.

¹²“Kigh Tarsis mïnchïrïsnön nko nyi ompöwölo kichinyi makos ompö silpa nko karïn nko mapatin, iyalanyi tïkwïl tïkuku.

¹³Kighanyi mïnchïrïsnön nko pipö Yapan nko Tupal nko Mesyek, cho kyala tïkuku sekey nko kari taghoy.

¹⁴Kyaltenyi kariku iyala angoletin nko angoletino lïk nko sïkïröy cho pkono Pet Tokarma.

¹⁵Akwigh mïnchïrïsnön pipö Dedan nko nyi, kïkoninyi pipö koros cho chang kela pelöw nko tarakit.

¹⁶Kigh mïnchïrïsnön pipö Sirya nko nyi ompöwölo chang tïkuku nyoman cho olöy. Kighöy mïnchïrïsnön chane nko sïro pö katani nko cho lata akwa lamay cho kikïnap kesyankan nko rupin nko koghïn.

¹⁷Ki mïnchïrïsyontengu Yuda nko koro Israel kikigho mïnchïrïsnöne nkanuna Minit nko panagh nko mwowöy nko kumot nko mwoghwöyi sos.

¹⁸Kwigh Damaska mïnchïrïsnön nko nyi nko ompöwölo kitïngönyi tïkwïn cho chang cho sisinchö ompö dipaypa* Elpon nko puto kechir cho relach,

¹⁹nko dipay cho pkono Usal kulakwen nko tïkuku, karïn nko kasia nko kalamus.

²⁰Kyaleninyi Dedan sïro kirotyini angoletin tökepegho.

²¹Kyoltowunyi pipö Arapia nko yetïntino Kedar löwïr wara kechir nko mökol nko ngaror.

²²Kighanyi mïnchïrïsnön nko mïnchïrïs pö Syepa nko Raama, kïwaghaka tïkuku cho karamach pinsarin cho sisinchö nko koghïn cho pö olyot nyo wow nko koltin.

²³Kwigh Aran nko Kane nko Edom nko Asyur nko Kilmad mïnchïrïsnön nko nyi.

²⁴Kigh pïchï mïnchïrïsnön nko nyi ompö sïro cho pïchighöch nko sïro cho le pïlu cho kikïnap kesyonkön nko kapalin cho kikïsïlosïl akerata pörköy lö kïng.

²⁵ Ipunyi melino Tarsis tïkuku cho kyoltoy. Kïlenyona ilatenyi meli ompö nanam nyo kinyïghï tïkwïn.

²⁶Kipunyi piköku cho ipöy melineku nanam, kïwir yomo kongasis melingu kïlït nanam.

²⁷Potyegho nanam sïkönötengu löwïr nko ipi meline löwïr, nko pich cho ighotoy meli wölo kakarera nko mïnchïrïsköku löwïr ompö meli otini kölït meli pögh.

²⁸Potönöy koro ompö rira ipi melin.

²⁹“Pïstoy meli anka tïkwïl ipï löwïr akïwir kwoghyö kïpa kughyongö sany.

³⁰Akiriryö nyoman akwompö akwa kilokyö ompö ngwonïn akinyïra kegh terïtyon nko aryon mötöwöy.

³¹Akirwach mötöwöy akulach sarankwachtin akwompö nyi. Atolapay kïriryö ompö ngwonïn akïsönöniö ompö akwa.

³²Tumöy tum pö lok ompö parakungu lö, ‘Ngo nyo kikewurta le Tiro ompö kwenu nanam nya?

³³Kïngarak pich cho chang mïnchïrïsnönengu otini kiponyi kwoghyö koros kisïkönonö pöytoghï sïkönötengu ompö kor.

³⁴Kewonyechinyi ye nko meli nanam kwen, kuwonyö tïkwïl tïkuku cho kyoltoy nko mötworiku löwïr, kowonyechikwa pögh lömïs.’

³⁵“Kimïghyö pich löwïr cho möngöy sörömu nanam ompö wölo kikiwurtekwa kïmïghyö pöytoghikwa akuwöghisyö.

³⁶Kowonyekwa kokay kimïghyö mïnchïrïs löwïr ompö kor kïmïkul, ompöwölo wonyot chane tïkwïl.”