Read pokoot ESEKEL 30 Bible Online

ESEKEL 30 - pokoot bible

ESEKEL 30

¹Kungwïnchanïn ngölyonto ECHOTYON,

²kïlenchanïn, “Wero chi, ngorsyenö lö lentöy Echotyon TORORÖT, Oriryenö, alentöy, ‘Heywey nyï asista!’

³Kilekïtit asisoni, kikïrikï asispa ECHOTYON. Lïku asisoni asispa kïruntï, asispa pörcho pipö koros.

⁴Anyona pörsyö kechumchï Misri, akerelchï nyarïl Etopya, ato kïpöröy Misri akep sïkönötenyi akepïstö kore kïlïkwï kïratyan.

⁵“Wonyot nyu lömïs Etopya nko Lipya nko Lud nko Arapia kïmïkul nko Lipya nko pich löwïr cho kinam kegh tïkwïl.”

⁶Lentöy ECHOTYON, “Wonyot pich cho kengöroköy Misri lömïs akuwonyö menöto owesyenyi kïngeta Mikdol ntökwit Aswan wonyot chane lömïs ompö chok. Mwoghöy Echotyon TORORÖT.

⁷Tökïlïkwï Misri kïratyan le koros cho le kïratis, kïlïkwï kanastinechi kanastin cho le kïratis le kanastin walaka.

⁸Atökunkïtï nyu chane lö ochan ECHOTYON otini kapelan ma Misri akuwonyö kingörokichi löwïr.

⁹“Oyontenan asisoni pich cho pïrtït kïpa kwotyeghö pipö Etopya cho lenchini kegh kïmi kalya. Nömöy chane tapan asis pö kinyarata Misri ompöwölo itïtoy asisoni nyo mötïny.”

¹⁰Lentöy Echotyon TORORÖT, “Owonyan sïkonoto Misri ompö owesyo Nepukadnesa, pöytoghinto Papilon.

¹¹Ngwïnöy nyinte nko lïkenyi nyo körom nyoman, pkonöy kunyornyoröy koro Misri pöröy chane kurïnkïtit mïntïruch kore.

¹²Atolapay oghan lalwa Nile kïyam atönan kore mori mwokïyis aghan korononi kïlïkwï kïratyan nko kïgh anka tïkwïl nyo mi ori ompö mori pich cho le to. Ani ECHOTYON nyo kamwagh.

¹³“Lentöy Echotyon TORORÖT, onyornyoran körkeyïntin ompö Mempis akupot pöytoghinto Misri, atolapay otönön körkoryö koro Misri.

¹⁴Oghan koro Patros kïlïkwï kïratyan, apelan kanasyanta Soan, atolapay orwokyan kanasyanta Tepes.

¹⁵Onörekyinan kanasyanta Pelusium nyo awes ompö Misri, aparan pipö Tepes cho möngörï.

¹⁶Opelan Misri akuwongu Pelusium nyoman akurulöy nïyetwo Tepes kuchut pögh.

¹⁷Wonyot mïrön pö Eliopolis nko Pipeset ompö chok akerang koru kïpa pïnotön.

¹⁸Tuwitu koro Teapnees otini kaparan pöyunöto Misri akuwonyö kwolötenyi pö owesyenyi, tïpoy nyinte poltoy akerang pikö kïpa pïnotön.

¹⁹Orwokyinan amungön Misri, nkïtu nyu chane lö ochan ECHOTYON.”

²⁰Kungwïnchanïn ngölyonto ECHOTYON ompö asispa mut nko odeny arawa tagh ompö könyi mut nko odeny nyo pö pïnotönencha.

²¹Kïlenchanïn, “Wero chi, kyarïngan ewu Parao pöytoghinto Misri, möminye chi nyo karop akïsarar tökïsöp akumï kïnam chok ngat.

²²Kïlenyona, lentöy Echotyon TORORÖT ghöchinanïn pöytoghinto Misri. Owetan ye oriyöy ewune kwodeny nyinö kötö kïkaram tökïchïnta choke.

²³Atolapay otoytoyan pipö Misri kïghömï punton akïghömï koros.

²⁴Ochïchiman pöytoghinto Papilon atönön nyinte chokenyan. Wölo oriyan ewuno Parao kïnyarïl tökïma ompö tawu punyontenyi.

²⁵Oghan ewuno pöytoghinto Papilon kïchïchïm aghan ewuno Parao kïnyörkölölitu. Otini kotönön nyinte chokenyan akïpara Misri kunkïtï nyu chi anka tïkwïl lö ochan ECHOTYON.

²⁶Otoytochinan pipö Misri kïghömï punton akighömï koros, tokunkïtï chane lö ochan ECHOTYON.”