Read pokoot ESEKEL 31 Bible Online

ESEKEL 31 - pokoot bible

ESEKEL 31

¹Kungwïnchanïn ngölyonto ECHOTYON asispa tagh nyo pö arawa sömök könyi taman nko akonga nyo pö pïnotönencha.

²Kïlenchanïn, “Wero chi, lenchinö Parao pöytoghinto Misri nko pikachi löwïr, Ichinyi awes le ne?

³Okörkeyïnteninyi törokwo Lepanon, nyo tïng morïn cho pïchighöch nko rurwö nyo pïchigh, akï kogh nyoman.

⁴Kinyorï pögh cho kigh kïpit, kudwarï ompö pögh cho kighegho ighinkachi, kuyintegha pögh otini kipita, kuyinchï ket lapay cho pö wuw.

⁵Kïlenyona kïpit kikoghit nyoman kïtïl ket löwïr ompö wuw kudrö akïkoghöchitu mori, ompö pögh cho ghegho ighinkachi.

⁶Kitek töritwo löwïr korikwa morichi, kïyichï tïpö wudïn ghït pö ketichoni akuwurö puntoni ngwïny kïmïkul.

⁷Kipïchigh ompö wowïntanyi, nko ompö koghïn pö morichi. Kïröytö ngwïny ighinkachi, tökïnyorï pögh cho möngörï.

⁸ Möminye tarakit cho mi para Tororöt cho kimuko kekongityö tïkwïl, anta makany cho kidïrö morichi kïtïl ketoni. Amelö mi ket para Tororöt nyo kipïchigh le ketoni.

⁹Ani nyo kyagh nyinte kïpïchighitu morichi cho möngörï. Akïpïrchï keti Eden nyinte löwïr cho mi para Tororöt.

¹⁰“Kïlenyona lentöy Echotyon TORORÖT kïrkegh kïlö ochï kogh nyo kinam poltoy, akïkwol kegh mïkulöwunyi ompö koghïntanyi.

¹¹Otöninan nyinte mori pöytoghinto punton takwigh nyinte yitïn ompö ngokichi kegh nyinte, kyomötan nyinte nyoman.

¹²Torchini nyu ngwïny puntonï cho ghach akepïstö. Ghömu morichi cho kimirsyö nko söke kutïngkot nko mpöghoghöy ompö ngwïny. Kïpegha nyu pipö ngwïny kïmïkul rurwenyi.

¹³Kïmang nyu töritwo nko tïpö wuw ketay körul nko morichi.

¹⁴Ighisyot lenyoni tömömi ket anka nyo pito wölo mi pögh akïpit kïkoghit tökïnam poltoy. Kewonyö lömïs akïpa wölo petöy pich cho kimeghö nko chane cho röytoy ngwen.”

¹⁵Kïlenyona lentöy Echotyon TORORÖT, “Nyini köröytö ngwen aghan nanam kïrir akwompö nyinte, akaran pögho lalwatïnechi löwïr meyinta. Olumenan poltoy kutïng pö Lepanon kituwit akïsönöniö keti wuw löwïr ompö nyinte.

¹⁶Oghan punton kïpotonchö otini kalïm kïrul nyinte. Otini kowirchan ngwen kïröytö nko chane cho petöy parsïkon. Ngörechot keti Eden löwïr nko keti Lepanon löwïr cho pïchighöch nko ket löwïr ompö ngwïny cho gheghöy pögh ori.

¹⁷Röytoy chane tïkwïl ngwen nko nyinte wölini mi cho kikepar ompö pipö punton.

¹⁸“Möminye ket akong ompö keti Eden nyo kimustoninyï ompö ororyö nko owesyö. Wölo ye, kireytoninyi ngwen nko keti Eden, airï nko pich cho mapa tum cho kikipar ompö lïk. Ketoni kï Parao nko pikachi.” Mwoghöy Echotyon TORORÖT.