Read pokoot ESEKEL 33 Bible Online

ESEKEL 33 - pokoot bible

ESEKEL 33

¹Kungwïnchanïn ngölyonto ECHOTYON.

²Kïlenchanïn, “Wero chi, ngölonchinö piköku lenchinö. Ato opwan chok kungwïn kor akïyar pich ripintengwa

³akïnyini kasïwa ripintonona pung kïpkonöy akïkut kontï kuteghchï pich kwigh kegh,

⁴wölo ato maternye chi akepar nyinte kwomöy kisönkachi.

⁵Ompöwölo kilïm nyinte kiteghunöto kontï amaternye kwomöy nyinte kisönkachi ompöwölo antö kiter kiteghunöt kitö soru söpontanyi.

⁶Wölo ato sïwa ripin pung kïpkonöy amakut konti kuteghchï pich kïpïsyï pung kipka kipar pich. Meghöy chichini kakïpar ompö ngokichi wölo omöy kisönkachi ripintonay.

⁷“Kïlenyona nyu o wero, kyayaran ripin nyo pö pipö Israel nyi nyoni, otini kelïmanyi ngölyon ompö kutinyan, iwö imwochï chane kitewunöt nyo omwowunyi.

⁸Ato olenchan chemwokïyon, kimeghanyi we chemwokïyon, amewenyinye mwochinö nyinte iteghchï kïpïstö otöptanyi meghöy nyu chichoni ompö ngokichi wölo ominyi kisönkachi.

⁹Wölo ato iteghchinyi nyinte kïpïstö otöptanyi amachamnye kïter, kï meghöy ompö ngokichi, wölo kesörunyi söpontöngu.

¹⁰“Wero chi lenchinö pipö Israel, kikutungecha ngokicho nko lelutköcho akikïparech, kïsöpchot nyu lö ne ye?

¹¹Lenchinö nyu chane lentöy Echotyon TORORÖT le ato osopan, kïmelö mïlanïn megha chemwokïyon, wölo omökan kïpïstö nyinte ortïnechi cho ghach tökïsöp, owöghökisyenö pö ne omeghyenö kwïle nya Israel?

¹²“Kïlenyona wero chi, lenchinö piköku, melö soru chi pö man mantanyi ato töp tökïlel kwigh ngokï amelö meghöy chemwokïyon ompö ngokichi ato töp tökïpïstö ortïnechi cho ghach, amösöpönye chi pö man ompö mantanyi ato töp tökwigh ngokï.

¹³Kïrkegh olenchan chi pö man isopenyi wölo ato manta kegh mantanyi akwigh ngokï, kïmelö tökenonöy ighisyewutkachi cho pö man nyonikïny. Meghöy lenyini ompö ngokichi.

¹⁴Kïrkegh olenchan chemwokïyon, ‘Imeghenyi nyo motïny,’ wölo ato pïstö ngokichi akwigh nyo karam akï pö man,

¹⁵lenye ato yokwï tïkwïn cho kighyongchineghö pösön, anta yokwï kïgh nyo kichor, atolapay kïtöpö otöp nyo karam amegh ngokï, kï melö meghöy, wölo söpöy.

¹⁶Melö tökenonöy ngokichi cho kigh nyonikïny, ompöwölo kikwigh nyo karam akï pö man, kïlenyona söpöy nyinte.

¹⁷“Wölo, atï lentöy piköku, ‘Melö pö man ara Echotyon,’ akwanyï kïchï ortïnekwa cho melö pö man.

¹⁸Ato pïstö chi pö man mantanyi akwigh ngokï, kï meghöy nyo motïny.

¹⁹Kïnyïl kïpïstö chemwokïyon ngokichi akwigh nyo karam akï pö man kïsöpöy ompö nyoni.

²⁰Wölo atï ye olentekwa, ‘Melö pö man ara Echotyon,’ ye o pipö Israel orwokyinan chi anka tïkwïl kïrïp kegh nko otöptanyi.”

²¹Kungwïnchanïn chi nyo kipertegha Yerusalem asispa mut arawa taman könyi taman nko odeny nyo pö pïnotönencha, kïlenchanïn, “Kikïrul kanasyanta.”

²²Kyolïmchan kegh ewu ECHOTYON nangatunyi kïtomö kungwïn chichay kiperï kïnganganïn kut ECHOTYON otini itu chichay tökwogha, kïlenyona kiyatanïn kut, angalanan.

²³Kungwïnchanïn ngölyonto ECHOTYON.

²⁴Kïlenchanïn, “Wero chi, lentöy pïchï möngöy kïratis ompö koro Misri, ki chi akonga Apraam, akicheng kor kïtïl nyenyi, anyï ye kïchicha chang lïku nyincha korö nyo motïny.

²⁵Kïlenyona lenchinö chane lentöy Echotyon TORORÖT: Omekwa peny kïmi nko kisönkö atolapay asaghakwa körkeyïntin, amïltegha pich kisön, onyorukwa nyu kor lö ne?

²⁶Omontokwa kegh chokon, oghekwa ngal cho kïkïröy akïwetöy chi korketo pöröryenyi, onyorukwa nyu kor lö ne?

²⁷Mwochinö chane lö lentöy Echotyon TORORÖT le ato osopan wonyot pich löwïr cho möngöy kïratis ompö chok, atönan tyompö wuw kwam chi anka tïkwïl ompö ompölyon, kwam amal cho mi wölo aghïgh nko cho mi köpönot.

²⁸Oghan koronï kïtuwit kïpuryö chi ori ntökupot menotönenyi. Kïlïkwï koro Israel siriron puryö chi nyo weröy.

²⁹Kunkïtï nyu lö ochan ECHOTYON ompöwölo kaghan kor kïtuwit kïlïkwï kïratyan ompö ngalekwa cho kegh cho kïkïröy.”

³⁰Kïlenchanïn ECHOTYON, “Wero chi, ngöloneninyi piköku otinö kötuyeghö nïyet nko kukot akïlenchini kegh, ‘Wechara, apkana kepe ketera ngölyon nyo ngwïno ECHOTYON.’

³¹Akïpkonöy wölo imitenyi le ato pkonöy pung, akïtïpï tawungu le piköchan akïter ngal cho imwoghenyi, wölo melö ighöy ompöwölo poru ompö kutïwekwa lö chomöy, wölo sis wölo mi mïkulöwekwa.

³²Ilatenyi nyu kurinto tumwöy nyo tïng kut nyini kuröy nyoman nko kïgh nyo pïtöy kïrïr. Lïmöy nyu kïgh nyo imwoghenyi, wölo melö ighöy lenyini.

³³Otini köpïntö ngalechï lenyoni, kunkïtï nyu chane lö kichï kimi werkoyonta nko chane.”