Read pokoot ESEKEL 34 Bible Online

ESEKEL 34 - pokoot bible

ESEKEL 34

¹Kungwïnchanïn ngölyonto ECHOTYON.

²Kïlenchanïn, “Wero chi, nya kïngor möt mösöw cho pö Israel lenchinö chane lentöy Echotyon TORORÖT. Heywey mösöwechï pö Israel, oyongekwa kegh opïn. Melö so kötöngöy mösöwö kyakikwa tya?

³Omekwa mwowöyi aloköy sïroko kyak cho lölöng, ayengekwa cho okwoghöch, wölo melö okomönekwa kyaki lasiny.

⁴Melö kötayangakwa chona le chankulan amasararakwanye cho ketongu amelö kyaropakwa cho kimïrisyö amayarakwanye cho kepotyö wölo angetakwa aghapghap apayta nyo gha.

⁵ Kïlenyona kïtoytoyö ompöwölo kimöminye mösöwonta, kwam tïpö wuw kïchïpo.

⁶Kitoytoyö kechiryechan akupotyö kïghömï kutïngkot nko komos löwïr, kitoytoyechï kechiryechan ngwïny kïmïkul akï puryö chi nyo kiyarata chane.

⁷“Kïlenyona, akwa mösöw atera ngölyonto ECHOTYON.

⁸Lentöy Echotyon TORORÖT le ato osopan melö lïku kechiryechan panya tyonkïn cho pö wuw ompöwölo mötïngnye mösöwon, ompöwölo melö kayarata mösöwechan kechiryechan, kayang kegh mösöwö opïn melö kötö kïyang kechiryechan.

⁹Kïlenyona nyu akwa mösöw, atera ngölyonto ECHOTYON.

¹⁰Lentöy Echotyon TORORÖT ompöwölo melö tökwani nko mösöwechi, omökenan chane kisön pö kechiryechan, ayonan chane tömökuyokwïyi kechiryechan. Amelö tökïyongöy kegh chane tïkwïl. Osörunan kechiryechan ompö kutïwekwa tömökwomöy chane kokay.

¹¹“Kïlenyona lentöy Echotyon TORORÖT, owetan ante oyörotoy kechiryechu, ayakwïy ante.

¹²Le wölo yokwïytoy mösöwontö kyakichi, oyokwïyan kechiryechan lenyoni. Osörunenan chane wölini kïtoytöyechï löwïr ompö asispa kïruntï nko turï.

¹³Owetan omïtuno chane punton aghamïtuna koros kïpka korengwa kegh. Oyokwïyan chane kutïngkoti Israel aghegh kori pöghon, akïghömï wölo möngöy pich.

¹⁴Omolchinan wölo mi suswö, omchini kutïngkoti Israel parak. Oketïyi nyu tökïruyö wölo mi suswö cho karamach ompö kutïngkoti Israel.

¹⁵Olïkunan ante mösöwonteto kechiryechu nyo oyokwïyi kïpïghyö. Mwoghöy Echotyon TORORÖT.

¹⁶“Oyörotenan nyo kepot, ayokï nyo kamasta, asop nyo kömïrö arosöy nyo le chankulan orosan nyu nyo akwagh akï tïyam oyokuyenan chane man.

¹⁷“Lentöy Echotyon TORORÖT, kïnyïl akwa okwotïnyu, ani nyo orwokyini kech nko kech anka, mökol nko kwoghe.

¹⁸Kamakwa sus cho karamach, angetakwa atyakatyak suswe cho köngötï! Kagheghakwa pögh cho karamach, aturulökwa atyakatyak pöghe cho köngötï!

¹⁹Ayo, omöchekwa so kwam kechiryechan sus cho kiketyakatyak, akïgha pögh cho kiketurul?

²⁰“Kïlenyona lentöy Echotyon TORORÖT, ani kegh nyo okïlöy kech nyo akwagh nko nyo le chankulan.

²¹Ompöwölo owirekwa atimo kuy chona le chankulan ntökïtenö otoyekwa lö tya.

²²Osörunan nyu okwotïnyu, amelö tökïlïku panya tyonkïn arwokyï chane.

²³ Atolapay otönön chane mösöwon akonga, mötworintenyan Daudi. Komönöy chane akïlïkwï mösöwontengwa.

²⁴ Alïkwan ante Echotyon TORORÖTïngwa, akïlïkwï mötworintenyan Daudi yetïntöngwa, ani ECHOTYON nyo kamwagh.

²⁵“Oman muma* nko chane nyo pö kalya ayonan tïpö wudïn ompö korengwa. Atökïmang surkwen ompö kalya, akwaketa kechir kïchïpo.

²⁶Osoyönan chane nko koros cho kewit kutïngtönyan nyo tïlil. Oyokyinan chane rop otini kösyökï, kïlïkwï pkopïs pö kisoyonöt.

²⁷Akïrïryö akwa ket ompö wuw akwakwaghit ngwïnya, kïmöngisyö nyu ompö kalya. Kunkïtï nyu lö ochan ECHOTYON otini köngötiyön mchokingwa asörunan chane mori pich cho kigh chane sekey.

²⁸Melö tökïlïku chane panya punton, anta am tïpö wuw chane. Möngisïyi ompö kalya, amöminye chi nyo tökwotyegho chane.

²⁹Otöninan chane kor nyo rïröy tïkwïn löwïr nyo melö tökukoryot kokay ompö korengwa anta roröchï puntoni.

³⁰Kunkïtï nyu lö ochan Echotyon TORORÖTïngwa nyo omitan nko chane, akï piköchan pipö Israel. Mwoghöy Echotyon TORORÖT.

³¹“Ochikwa kechiryechan, kechiryeko acheytanyan. Ochan nyu Tororötïnkwa.” Mwoghöy Echotyon TORORÖT.