Read pokoot ESEKEL 45 Bible Online

ESEKEL 45 - pokoot bible

ESEKEL 45

¹Otini kachaghtekwa kor kïcheng pich kïrïpata kegh nko ortïn, angot kareran nyo kitïlilchini ECHOTYON, kor nyo nyo ngata kilomiten taman nko odeny nko nïsï ompö koghïn nko kilomiten taman ompö töpesïn.

²Lïku aranoni miten 250 kuwit ato kïteköy Kö pö Tororöt.* Ngötu kiroryo nyo le miten 25 ompö töpesïn kuwit.

³Ichöghenyi ompö paranï kilomiten taman nko odeny nko nïsï ompö kilomiten mut, atolapay ipim wölo kïteköy Kö pö Tororöt Wölo Tïlil Tya.*

⁴Lïku wölo tïlil ompö koronï. Pöyitu tïsï cho pöghisyechini ECHOTYON ompö Kö pö Tororöt, lïku wölo teköy korikwa kareran kïlïkwï karerana Kö pö Tororöt.

⁵Kïlïkwï karerana wölo pöyitu pipö Lawi cho pöghisïyi ompö Kö pö Tororöt akimi kanastina cho möngöy chane.

⁶Atolapay kechagh koronay tïlil kilomiten taman nko odeny nko nïsï ompö koghïn nko kilomiten odeny nko nïsï ompö töpesïn kïlïkwï kanastin cho möngöy pipö Israel.

⁷Kichöghöy akengot kor nyo möngöy pöytoghintö, pöyitu pöytoghin kïngeta rotyo wölay Tïlil okumpö ta akïrop ntökïnam nanampa Kwen akuwit okumpö kongasis kïnam rotyot akïpesyö nko wölo kikïchöghchï pipö Israel.

⁸Lïku koronï koro pöytoghin nyo pöytoy Israel tömöpïr piköchan, wölo kipïsyï ortïna pipö Israel, kïcheng wölnö köngötï kïrïp kegh nko ortïnekwa.

⁹Lentöy nyu Echotyon TORORÖT, “Nya kïten we pöytoghi Israel, opïstenö köromnyö nko pïröt atolapay agh man nko kïgh nyo tïlil. Opïstenö yonsyo piköchan ompö nyïngwïtyantengwa. Mwoghöy Echotyon TORORÖT.

¹⁰ “Opöghisyeghenö ratilin koghikwa cho pö man.

¹¹Mïchini kïkarkegh kipimöwonto tïkwïn cho yomot nko cho le pögh. Lïku kipimöwon nyo oror omer ompö kïgh anka tïkwïl. Omer 1 kï epa 10 akï patin 10.

¹²Chï kï wölolata kipimowekwa: kerostin 20 kï syekel 1, syekeltin 60 kï mina 1.

¹³“Lata chï wölo opimtokwa ropöwekwa: nkanun: 1 ompö 60 cho pö nkanun löwïr cho kakïl matay: 1 ompö 60 cho pö pagha matay löwïr cho kakïl mwaghpa arol: 1 ompö 100 nyo pö mwada kïmïkul nyo kengwïna ket (Opimonekwa pat: patin 10 kï omer 1 akï kor 1.) kechir: kech 1 ompö 200 ompö kori pipö Israel löwïr. “Opunekwa ropöwo pagh nko ropöw cho kïpelöy nko ropöwo pöghisyö taroptena ompö ngokikwa. Mwoghöy Echotyon TORORÖT.

¹⁶“Konu pich löwïr ropöwechï ompö koro Israel kutöni pöytoghin.

¹⁷Lïku nyu parakunyi kikonï ropöw cho kipelöy nko Ichontino Relïn pö Arawa nko Sapatotin* nko ichontin walaka löwïr cho pö pipö Israel. Konu nyinte ropöwon nyo pö ngokï nko ropöwo pagh nko ropöwo nko ropöwo pöghisyö cho pöyitu ngoki pipö Israel.”

¹⁸Lentöy Echotyon TORORÖT, “Ochengekwa ngaryan nyo lïpop otini körel arawa tagh atolapay otïlil Kö pö Tororöt.

¹⁹Chengöy tïsin kisönpö ropöwonto ngokï cho ngorï akïnyïra polowo kuka Kö pö Tororöt nko söremwoköyi ato kïpelo amöros kwangwan, akutö pölöwo kuka ori.

²⁰Ighonyi lenyoni ompö asispa mut nko odeny nyo pö arawa ompö chi anka tïkwïl nyo kegh ngokï ompö lelut anta sölwontön, tetïlilö Kö pö Tororöt.

²¹ “Omekwa ichonto Pasaka* ompö asispa taman nko angwan nyo pö arawa tagh, atolapay kyam makatyan nyo puryö mumar ompö osis mut nko odeny.

²²Konu asisoni pöytoghintö ngaryan nyo lïku ropöwonto ngokï, akwompö nyinte kegh nko pipö Israel löwïr.

²³Atolapay kïkonï ngartin cho lïpopöch mut nko odeny kïlïkwï ropöw cho kïpelöy ompö osis mut nko odeny, akïkonï kwagha nyo pö ngokï chi ompö osis mut nko odeny.

²⁴Atolapay kïkonï ropöwo pagh epa akonga cho pö egh anka tïkwïl nko epa akonga nyo pö makal anka tïkwïl nko akonga nyo mwagh ompö epa anka tïkwïl.

²⁵ Konu ngat pöytoghintö ropöw lenyaye ompö Ichon pö Tunkun cho toröy asispa taman nko mut nyo pö arawa mut nko odeny, konu ropöwo ngokï cho pö osis mut nko odeny lenyaye nko ropöw cho kïpelöy lenyaye nko ropöwo pagh nko mwaghpa arol lenyaye.”