Read pokoot ESEKEL 48 Bible Online

ESEKEL 48 - pokoot bible

ESEKEL 48

¹Chï kï kaynötut pö ortïna pipö Israel: pöyitu Dan kïngeta nanampa Kwen kuwer Etlon ompö okumpö löt, akïnam or ntökwit Lepo Amat, akïnam Asar Enon ntökwit rotyo Damaska nko Amat, lïku nyoni rotyenyi kïngeta okumpö kongasis nko okumpö ta.

²Nyoru Asyer kareran akonga akïchagh rotyot nko Dan kïngeta okumpö kongasis nko to.

³Kïnyorï Naptali kareran akonga, choghöy rotyot nko Asyer ompö okumpö kongasis ntökwit ta.

⁴Kïnyorï Manase kareran akonga, chöghöy rotyot nko Naptali ompö okumpö kongasis ntökwit ta.

⁵Nyoru Epraim kareran akonga, chöghöy rotyot nko Manase ompö okumpö kongasis ntökwit ta.

⁶Kinyorï Rupen kareran akonga, chöghöy rotyot nko Epraim ompö okumpö kongasis ntökwit ta.

⁷Nyoru Yuda ntökwit kareran akonga, chöghöy rotyot nko Rupen kïngeta kongasis ntökwit ta.

⁸Kïchöghöy kore nyo rïptoy nyo pö Yuda akechöghchini ortïn kïkarkegh. Kïmutöy kilomiten taman nko odeny nko nïsï ompö koghïn kïngeta okumpö kongasis kughegh okumpö ta akïkarkegh lenyoni ompö töpesïn kïngeta okumpö ewu löt kughegh okumpö ewu tagh. Kïteköy Kö pö Tororöt* ato le kwen.

⁹Kitïlilchini ECHOTYON atoni, kilomiten taman nko odeny nko nïsï ompö kilomiten taman.

¹⁰Nyoru tïsï kareran nyo pö wölo tïlil. Lïku karerantangwa nyo le kilomiten taman nko odeny nko nïsï kïngeta okumpö kongasis nko okumpö ta akï kilomiten mut kïngeta okumpö löt nko ewu tagh.

¹¹Pöyitu nyï tïsï cho ngotote werpö Sadok kïrïp chane kirurutköchan, akïtagh kïmasta otini kimasta pipö Israel nko Lawi.

¹²Lïku karerantangwa kegh ompö koronini kikengot aketïlil tya.

¹³Nyoru pipö Lawi nyingwa kore okumpö ewu löt nyo pö wölo könyorï tïsï, nyo le kilomiten taman nko odeny nko nïsï ompö koghïn kïngeta kongasis kughegh ta, akï kilomiten mut ompö töpesïn kïngeta ewu löt kughegh ewu tagh.

¹⁴Melö kyoltoy kokay anta kïwaghak nko anka anta kitötö, ompöwölo tïlil ompö ECHOTYON amelö mito anka nyo karam kïtïl nyete.

¹⁵Wölinö kingötï le kilomiten taman nko odeny nko nïsï kïmelö tïlil wölo pöyitu pich löwïr kïpöghisyeghö kïmang aketö kanasyanta kwen

¹⁶nyo karkegh wölini nko wölini miten 2,250 wop anka tïkwïl.

¹⁷Kitöni tömkö nyo le miten 125 kuwit woptino kanasyan.

¹⁸Kore wölnö köngötï otinö kiketek kanasyan ompö okumpö tagh ompö wölay tïlil kï kilomiten mut nko odeny nko nïsï ompö okumpö kongasis akï kilomiten mut ompö odeny nko nïsï ompö ta, kïlïkwï wölo ngoröy pich cho möngöy kanasyan.

¹⁹Ngoröy chi anka tïkwïl nyo möngöy ori kïrkegh kö ngo.

²⁰Lïku wölo ngotote kilomiten taman nko nïsï wölini nko wölini kimi nko wölini kökiketek kanasyan.

²¹Pöyitu nyu pöytoghin nyoni kongotï ompö woptin odeny ompö wölay tïlil nko kanasyan, kïngeta kongasis nko ta nko wölo möngöy tïsï nko pipö Lawi. Ngeto kongasis akïwö kutang rotyot ompö kongasis akutang ta kïnam nanampa Kwen

²²akuyokwï rotyo Yuda ompö okumpö tagh nko rotyo Penchamen.

²³Nyoru ara Penchamen kareran akonga kïngeta kongasis nko ta

²⁴kïnyorï Simion kareran akonga, choghöy rotyot nko Penchamen kïngeta kongasis nko ta.

²⁵Kinyorï Isakar kareran akonga, kïchagh rotyot nko Simion kïngeta kongasis nko ta.

²⁶Kinyorï Saplon kareran akonga, choghöy rotyot nko Isakar kïngeta kongasis nko ta.

²⁷Kinyorï Kad kareran akonga, choghöy rotyot nko Saplon kïngeta kongasis nko ta.

²⁸Ngeto rotyo Kad ompö okumpö tagh Tamar ntökwit pögho Meripat Kades, akï rop lalwa Misri ntökwit nanampa Kwen.

²⁹Koronï nyu nyo ichöghchinenyi ortïna pipö Israel, kïrïp kegh lenyoni. Mwoghöy Echotyon TORORÖT.

³⁰ Chï kï kukot taman nko odeny cho pö kanasyan, ki miten 2,250 nayat akonga ompö nïyet angwan, akïtïng anka tïkwïl kukot sömök. Kïkurtegho kukat anka tïkwïl kaynata ortïna pipö Israel. Kikïkurteghö or nyo mi okumpö löt kayna ara Rupen nko Yuda nko Lawi, kïlö, ara Yosep nko Penchamen nko Dan cho kimöngöy nayat okumpö tagh, kïlö Simion nko Isakar nko Saplon nko kïlö ara Kad nko Asyer nko Naptali cho kimang okumpö ta.

³⁵Ki miten 9,000 koghïn pö nayat, kekur kayna kanasyan kïngeta atoni, “Mi ECHOTYON atoni.”