Read pokoot ESEKEL 5 Bible Online

ESEKEL 5 - pokoot bible

ESEKEL 5

¹Kilö ECHOTYON, “Wero chi, chenga rotwo möt nyo ngatip lö kat aipöghisyeghö irwaka ngachamungu nko puteku. Atolapay ipim pute ompö ratili aichaghachagh kïlïkwï tororyon sömök.

²Ipel kareranta nyo pö sömök ompö kwenu kanasyan, otini kewonyö osiswo kirikat. Atolapay icheng kareranta anka itïghotö iwitöy kanasyan, atolapay icheng kareranta nyinö köngotï aimutmutan aitö kïkat yomat. Ongwisunan chokenyu ayonotegha chane.

³Icheng pute tïkwïte airotyï kel pö sïra,

⁴atolapay icheng walaka ailösyï ma kïnöghö. Ngwïno nyu ma atoni nyo ghömu koro Israel kïmïkul.”

⁵Lentöy Echotyon TORORÖT, “Arosa kaghan Yerusalem kïtöpö kwenu punton nko koros cho kiwit nyinte.

⁶Wölo kipeny pipö Yerusalem kiyomisut kïtïl pipö punton akïpeny kiyomisutköchan kïtïl koros cho kiwit nyinte, otinö kitagh kirurutköchan akïtagh kïrip kiyomisutköchan.

⁷Kïlenyona lentöy Echotyon TORORÖT, ompöwölo otï morïpekwanye kirurutköchan, kï kaghachitukwa tya kïtïl puntonichï kiwitekwa, angetakwa arïp otöptino puntonichoni.

⁸Kïlenyona lentöy Echotyon TORORÖT, kyonörekyokwa nyoman, amungekwa ompö tawu puntonichï.

⁹Oghwokwa kïgh nyo tomönye aghan su amoghanye ngat ompöwölo kyaghachitukwa nyoman.

¹⁰Kïlenyona omöy pich monekwa ompö akwa akwam monïngö papotïnekwa. Oghan ngalechï ompö akwa akï pich cho köngötï ompö akwa otoytoyonan kïghömï ngwïny.

¹¹“Kïle ato ochan Echotyon TORORÖT nyo satate owonyokwa lömïs nyo puryö kisyonöt ompöwölo kosïmnyonökwa Konyan ompö tïkukwa cho ghach nko sïmnyontönenkwa.

¹²Owonyokwa cho le kareran akonga ompö amal nko ompö kikar, kuwany chok kareranta anka nyo pö sömök. Atolapay otoytoyan kareranta anka nyo pö sömök kïmï ngwïny kïmïkul orupan chane chok.

¹³“Pïntoy nyu le nyete nörekyenyan nyo onörekyinan chane nyoman, tökunkïtï nyu chane lö ani ECHOTYON nyo kamwagh ompö kililat otini kyonörekyan chane nyoman.

¹⁴Oghinyi kungat Yerusalem lïkuna kïratyan akïroröchinyi puntonï cho kiwitinyi nko ompö könyi pich löwïr cho weröy.

¹⁵“Oghinyi le kïgh nyo pö arasï nko sasat akïtöngönchï puntonï cho kiwitinyi, otini korwokunyi ompö nörekyö nko sïngiryö nyo gha amunginyi. Ani ECHOTYON nyo kamwagh.

¹⁶Otini koyotwokwa möronkinyan nyo mi koti pekat, owonyekwa. Otösan okenwokwa pekatis kïnomnyö kuwangekwa, akaran kuwonyö kaplawachtina omisyewutkökwa.

¹⁷ Okonokwa pekat nko tyonkïn kwamenekwa monïng. Wonyokwa amal nko rïmö nko chok. Ani ECHOTYON nyo kamwagh.”