Read pokoot ESEKEL 9 Bible Online

ESEKEL 9 - pokoot bible

ESEKEL 9

¹Alïman ECHOTYON kuta lö, “Apkana yi pich cho opkonöy opöröy kanasyantanï nko karikwo.”

²Panini lawel kïlïtunö pich cho le mut nko akonga kuka Kö pö Tororöt* wölo to okumpö löt, akïtïng anka karïnenyi nyo pö kingarakat. Kimi nko chane chi nyo kiloköy sïra katani akitïng kïgh nyo kikiröy. Kipka chane akughyongö ato kïpelo amöros nyo kikigha tay.

³Kungwïna ororyö Tororöt pö Israel kerupimtinechay* kötöpo akutang kukanay kïlïto Kö pö Tororöt. Kïkur ECHOTYON chichay kiloköy sïra katani,

⁴ akïlenchï, “Weratena kanasyanta Yerusalem kïmïkul, aitö machey tokochu chi anka tïkwïl nyo kasïwa nyo gha akusus ngalechï ghach kakigha kanasyan.”

⁵Alïman Tororöt kïmwochini pïchay walaka lö, “Arïpa nyinte olïtö kanasyan, apörisyö, matuk chi ompö akonga, mosyonchï chi nyonikïny.

⁶Apara cho kiyositu nko karachina nko tipïn nko yotïn nko monïng. Wölo maswany chi anka tïkwïl nyo mi machey tokochunyi. Otorenö yete le Konyan.” Kutorö pïchay kintöghoghichay kimi kughyongo Kö pö Tororöt.

⁷Atolapay kïlenchï ECHOTYON chane, “Osïmnyonö Kö pö Tororöt, anyïghit körkerwok muntïruch.” Kïpa nyu pïchay akutor kïpar pich ompö kanasyan.

⁸Otini kimi chane kïpörisïyi, kïkyomitan atoni onkït. Okïtïngön, angurukan ntökwit tokochunyan ngwïny, ateghan lö, “Echotyon TORORÖT, kenörekyinyi so Yerusalem, nyo imökenyi ye pöre chi anka tïkwïl nyo köngötyï Israel?”

⁹Kïlenchanïn ECHOTYON, “Kikwigh pipö Israel nko pipö Yuda ngokï cho echön. Kikïmïlta kisön cho chang ompö kor akunyïghit ghöyityö Yerusalem. Mwoghöy chane lö, ‘Kikïpïstö ECHOTYON koronï amökïyongönye.’

¹⁰Motukanye chane amosyonchinanye nyonikïny, oghchinan chane lenyini keghchï pikö walaka.”

¹¹Kïmïla nyu chichay loköy sïra katani akïlenchï ECHOTYON, “Kaghan lenyaye kemwowaninyi.”