Read pokoot DANIEL 2 Bible Online

DANIEL 2 - pokoot bible

DANIEL 2

¹Kurwotïtö Nepukadnesa ompö könyi odeny ompö paytaghtanyi. Nyini kyotyö kupotö rïwöntö akusus kegh nyoman.

²Kïlenyona kïmwatïta pöytoghintö kekurï chemöwostin nko ngorï nko ponï nko pipö Papilonia cho ngöghomöch atökïmwochï pöytoghin kirwotïtoghtanyi. Kïpka pïchay akughyongö tawunyi.

³Kïlenchï chane, “Korwotïtan kirwotïtogh nyo kesus mïkulöwunyan nyo omökan onkïtune lö ne kirwotïtoghtö.”

⁴Kïlenchï pïchay pö Papilonia pöytoghin ompö ngala Aram,[1] “Isöp kokay, we pöytoghin, mwowecha, mötworiku kirwotïtoghtö atökemwowunöcha waghakatenyi.”

⁵Kuyokyï pöytoghintö pïchay lö, “Kamutan akonga lö, ato momwowanïkwanye kirwotïtoghtö nko waghakatenyi, ketörotörokwa akengany korikwa kïlïk kïratis.

⁶Wölo ato omwowanïkwa kirwotïtoghtö nko waghakatenyi okonokwa ropöw nko konyït nyo mamïnïngnye. Kïlenyona omwowanïn kirwotïtoghtö nko waghakatenyi.”

⁷Kuyokyï pïchay pöytoghintonay panta nyo pö odeny lö, “Mwowunö, we pöytoghin kirwotïtoghtö atö kemwowunöcha waghakatenyi.”

⁸Kuyokyï pöytoghintö lö, “Onkïtön nyo pö nyoman lö omökekwa pat orentene ngal kwïle, ompöwölo pö man ngölyontonay kamutan

⁹lö, ato momwowanïkwanye kirwotïtoghtö onyorukwa löwïr sitonini le akonga. Ompöwölo kyolïmchinekwa lö kelïsalïsa ani, atömöne kïsisitu ngala. Kïlenyona omwowanïn kirwotïtoghtö, atonkïtwan nyu lö omukekwa omwowanïn waghakatenyi.”

¹⁰Kuyokyï pïchay pöytoghin lö, “Möminye chi, we pöytoghin, ompö ngwïny nyo muköy ngölyontönï kemwaghanyi. Akï möminye pöytoghintö nyo awes nyo kitep chemöwostin anta ngorï anta ponï kïgh nyo lata nyï.

¹¹Kïlenyona aghïgh kïyï ketepanyi amöminye chi nyo muköy kïmwowunyi, kïpoto tororötin cho melö möngöy nko pich.”

¹²Kïnarek pöytoghintonay nyoman ompö ngalechoni akïmwatïta kepar pïchay ngöghomöch pö Papilon löwïr.

¹³Kïlenyona kïmwatïta kepar chane löwïr kïmi Daniel nko kongotichi tïkwïl.

¹⁴Kïngölonchï Daniel ompö chïreryö Ariok nyo kile yetïn pö ripi pöytoghin nyo kiwetöy kïpöröy pipö Papilon cho ngöghomöch.

¹⁵Kïtep Daniel Ariok lö, “Ompö ne tökïmut pöytoghintö kirwok nyo ngwan le nyï?” Kïlenyona kïmwochï nyu Ariok ngalechay.

¹⁶Kïwö nyu Daniel kïsom poroyïn pöytoghin nyo mwochini nyinte waghakata kirwotïtoghnay.

¹⁷Atolapay kïwö konyi akimwochï ngalechini kongotichi Anania nko Misyael nko Asaria.

¹⁸Kïmwochï kïsagh Tororöt pö yïm kusyonchï chane kuporchï wïngatanoni. Atömökïpar Daniel nko kongotichi nko pipö Papilon löwïr cho ngöghomöch.

¹⁹Kïlenyona keporchï Daniel wïngatanay ompö sïwïyagh oghö. Kïsal Daniel Tororöt pö yïm nyoman.

²⁰Kïlö Daniel “Nya kïsala kaynata Tororöt kokay nko kokay, ompöwölo ngöghom nyinte akwawes nyoman.

²¹Wöghököy osis nko könyis. Ngeto pöytoghï ngöcher akutöni walaka, töni ngöghomnyö cho ngöghomöch kutöni chïreryö cho chïreröch.

²²Poru tïkwïn cho wïngote nko cho pö töngönchin, nkït kïgh nyo mi wölo tuw, mi löpoyïn wölo mi nyinte.

²³Osölinyi, ayokunyi sörö, we Tororöt pö papotïnechan, ompöwölo kekonaninyi ngöghomnyö nko owesyö, keporwaninyi kïgh nyo kikïsomöcha aiporwechanyi ngala papotïnecha.”

²⁴Kïlenyona kïwö Daniel wölo mi Ariok nyo kimwochï pöytoghintö kïpar pipö Papilon cho ngöghomöch, akïlenchï, “Mepar pipö Papilon cho ngöghomöch. Mïtanïn owan wölö mi pöytoghin atö omwochan nyinte waghakata kirwotïtoghtanyi.”

²⁵Kumït nyu Ariok Daniel lawel wölo mi pöytoghintö, akïlenchï, “Konyorwan chi ompö pïnotchay kipkana koro Yuda nyo muköy kïmwowï waghakata kirwotïtoghtöngu.”

²⁶Kïlenchï pöytoghintö Daniel nyo kïkuro kaynenyi anka Peltesyasar, “Imukenyi ntemwowanïn kïgh nyo kyasïwan ompö kirwotïtoghtönyan nko waghakatenyi?”

²⁷Kuyokyï Daniel pöytoghintonay lö, “Mömicha pich cho ngöghomöch anta ngorï anta chemöwostin anta cho rosöy kokel cho muköy ntökïmwowunyi wïngatanï ketepanyi.

²⁸Wölo mi Tororöt yïm nyo poru wïngut. Keporunyi ye nyu pöytoghin Nepukadnesa kïgh nyo igho ompö osis cho pkonöy. Omwowunyi ye nyu kirwotïtoghtö nko sïwïyaghtö nyo kisïwenyi ompö rïwon.

²⁹“Otini kirïwenyi we pöytoghin, kipka kinonut cho pö osis cho pkonöy, kiporunyi Tororöt nyo poru wïngut kïgh nyo igho.

³⁰Kakïngongwanïn wïngutyononi, melö ompöwölo ochan ngöghom kïtïl pich walaka, wölo tenkïtunönyi wöghökutye nko kinonutköku.

³¹“Kisïwenyi, we pöytoghin körkeyïn nyo wow tya nyo kighyongo tawungu nyo kwerkweröy, nyo kïmïghyot ato kiros.

³²Kikigha wölo le möt koltin cho pïchighöch, kegha takatunyi nko ewune silpa. Kegha muyenyi nko kïpesöyichi tay.

³³Kegha kelyechi karïn kïlïkwï wölnö tapes karïne karerana kïlïkwï karerana nyïngwïtyan.

³⁴Otini kiterosenyi kïchïnï kagh nyo möminye chi nyo kiswany akïwir kelyo körkeyïnay kïpasyangana wölay le karïn nko nyïngwïtyan.

³⁵Kïpasyangana tïkwïl wölay le karïn nko nyïngwïtyan nko tay nko silpa nko wölay le koltin akïlïkwï le morïr ompö ghatya pagh atay le kömöy, kungwïn yomat kïkutata kupotyö mömi wölo kïsöchini, wölo kïwaghaka koghay kïyetï kïlïkwï kutïng akulum ngwïny kïmïkul.

³⁶“Nyoni kï kirwotïtoghtö, kïmwowuchanyi ye nyu waghakatenyi.

³⁷Ichinyi we pöytoghin pöytoghinto pöytoghï, kikoninyi Tororöt nyo mi yïm pöyunöt nko owesyö nko kimukat nko ororyö.

³⁸Kighinyi nyinte paytena pich löwïr ompö ngwïny nko tyonkïn nko törit. Nyi nyu mötay pö koltin.

³⁹Nyini kewer paytaghtangu, kungwïn pöyunötö anka nyo melö awes le nyengu. Pöyunöte nyo pö sömök nyo rïpu, kï nyay le tay, pöytoy nyona nyu ngwïny kïmïkul.

⁴⁰Atolapay kungwïn pöyunötö nyo pö angwan, nyo anger le karïn, nyo tïghöy akïrïnta kïgh anka tïkwïl. Kïlenyona tïghöy pöyunötononi akïtyakatyak pöytoghi chinö walaka löwïr.

⁴¹Ato kelyechay kisïwenyi nko morichi le nyïngwïtyan kï karïn karerana, kï pöyunöt nyo chaghate, wölo chïchïmate ompöwölo mi kareranpa karïn nko nyïngwïtyan ori,

⁴²le wölo ki karïn nko nyïngwïtyan moriko kelyön karerana, kïlïku nyoni pöyunöte, owesitu akï nyörkölölitu.

⁴³Le otini kisïwenyi kinyornyoryö kegh karïna nko nyïngwïtyan, kïlenyona nyu nyornyoryot kegh chane ompö kensyö, wölo melö nomnyot ompöwölo melö nomnyot karïna nko nyïngwïtyan.

⁴⁴Ngetu nyu Tororöt nyo mi yïm pöyunöt anka ompö osiswo pöytoghichoni nyo memukönye chi ntökïpar amöminye paytagh nyo rïntoy, wölo pöröy pöyunötin löwïr kuwonyö akïtöpö kokay.

⁴⁵Kisïwenyi kïchïnuna kagh kutïng amaswany chi akïtïgh körkeyïnay kikigha karïn nko tay nko nyïngwïtyan nko silpa nko koltin kïpasyangana. Keporunyi Tororöt nyo awes tïkwïn cho ighisyot ompö osis cho pkonöy we pöytoghin, nka nyoni nyu kirwotïtoghtö nko waghakatenyi.”

⁴⁶Kïkïtïng Nepukadnesa ompö tawu Daniel akïmwatïta ketö nyinte ropöw akepelchï tïkwïn cho ngutöy cho onyïn.

⁴⁷Kïlenchï pöytoghintö Daniel, “Tororötïngu kï Tororöt pö tororötin akï Echotyonto pöytoghï akï ngonginto wïngut nyoman, ompöwölo kemukanyi ntengongwï wïngutyonï.”

⁴⁸Kutö nyu pöytoghintö Daniel konyït nyo wow nko ropöw cho chang echön. Atolapay kwigh nyinte kïpayta koro Papilon kïmïkul akïlïkwï yetïn pö pipö Papilon löwïr cho ngöghomöch.

⁴⁹Atolapay kïsom Daniel pöytoghin kwigh Syadrak nko Mesyak nko Apedneko kuntöghoghchï ngala koro Papilon. Wölo kudong nyinte kö pö kirwoko pöytoghin.