Read pokoot OSEA 1 Bible Online

OSEA 1 - pokoot bible

OSEA 1

¹ Kingwïnchï ngölyonto ECHOTYON Osea wero Peeri, ompö osiswo Usia nko Yotam nko Aas nko Esekia pöytoghi Yuda nko ompö osiswo Yeropoam wero Yeoas pöytoghinto Israel.

²Kinya ECHOTYON kïngölonchï pipö Israel otini kïlenchï Osea, “Wïyö ipö korka nyo le chepores, akïyiwun monïng cho karkegh nko kame, ompöwölo kegh koronï cheporesnan nyo gha otini kipïstö ECHOTYON.

³Kïwö nyu akwip Komer chepö Diplaim, kïsïkisyö kïyï worö.

⁴ Kïlenchï ECHOTYON Osea, ‘Kurenö kaynenyi Yesrel,’ ompöwölo lekït achopan kong pöytoghinto Israel ompö kisön cho kimïlta kukötanyi Yeu ompö Yesrel, atawanyan paytaghpa Yeu.

⁵Omïreghan kïwanti Israel asisoni ompö mpöghoghyo Yesrel.”

⁶Kïsïkisyö Komer ngat akïyï cheptö, kïlenchï ECHOTYON Osea, “Kurenö kaynenyi, ‘Nyo Mökisyonchï,’ ompöwölo melö tosyonchinan ngat pipö Israel, anta olöstoghchï chane.

⁷Wölo osyonchinan pipö Yuda. Ani, ECHOTYON Tororötïngwa, nyo osöru chane, wölo melö ompö kari lïk cho lata chokon anta kotï anta ompö angoletin nko kotikwa.”

⁸Otini kiwany Komer kulïkuy cheptanyi, kïsïkisyö ngat akïyï worö.

⁹Kïlenchï ECHOTYON Osea, “Kurenö kaynenyi, ‘Mönyinyanye,’ ompöwölo melö tökïpiköchan pipö Israel amelö tochan Tororötïngwa.”

¹⁰Wölo chongitu nyu pipö Israel le ngayam ompö sörömu nanam, cho mökimukönye kepim anta kiyit. Wölay kilenchï Tororöt chane, “Mochikwanye piköchan,” wölo itïtoy ato lenchini, “Ochikwa monïngo Tororöt nyo satate!”

¹¹Kituyot nyu atoni pipö Yuda nko cho pö Israel, atolapay kegh chane kïkïlchï kintöghoghintengwa nyo le akonga, yetu chane akwowesöchitu ompö korengwa, ompöwölo lïku asispa Yesrel asis nyo wow!