Read pokoot OSEA 10 Bible Online

OSEA 10 - pokoot bible

OSEA 10

¹Kilenye Israel sapipu nyo pïchigh nyoman nyo yinöy akwechi kuten. Le otini kiyï sapipun kïlïkwï, kïtösöy tagh kïtekyini kegh wölay kïpelo amörostin. Le wölini kitas tagh korengwa kïlïkwï, kïminöy chane tïkwïl wölo sogho.

²Kinyïghï mïkuliskökwa putintön Nyo mïchini kuchen kegh ngongöy nyu Tororöt wölay kïpelö amörostin akuwur pchörinekwa.

³Lentöy nyu chane, “Melö kïtïngöcha pöytoghin, ompöwölo melö kiwöghecha ECHOTYON. Idonecha ne nya pöytoghintö?”

⁴Ngölonöy ngal kwïle chane, akuwolwolisïyi kwïle amömi kïgh nyo ighöy kikungwïn kirwokö le ködöwï cho kapita par.

⁵Mïghyot pipö Samaria ompö körkeyïn pö mogh Pet Apen. Riryot pikachi ompö moghoni, akiriryot tïkwïl tïsï cho kopöghisyeghchini ompöwölo kiweghö moghoni ororyö.

⁶Kipöy körkeyïn pö mogh kïwö Asirya, kipchini pöytoghin le ropöw. Nyoru pipö Epraim arasï akinam arasï Israel nko körkeyïntanyi.

⁷Kipöy pöytoghinto Samaria, le perta ket nyo ipöy pögh.

⁸ Kiwuröy wölo sogho pipö Israel körkeyïntin ompö Apen. Pito nyu sekut nko koto wölo kipelo amöros lenchini kutïngkot, “Akartecha.” Akïlenchï komos, “Orulchecha.”

⁹ kyaghakwa ngokï kö we Israel kingeta nyini le Kipea. Akitomönye, tökïmi kwighöy ngokï owonyokwa nyo motïny ompö Kipea.

¹⁰Owechinan pïchï kimostoy, atö sitöt Ghömïtöy kegh puntonï akïpar chane ompö ngokikwa.

¹¹Epraim ki mösör nyo kikinet kïcham kitïgh pagh orötyinan mchokyon katïnyi nyo nyalnyal wölo oghan Epraim kuchut chempo eghin, ay, chutöy Yuda chempo sempara.

¹² Akatkata köromnyö ompö tösunötengwo atonyorunö akwa chomnyogh nyo mewonyotnye. Angora parenichay kiruyö ompöwölo ketomtö ato kïyöröy ECHOTYON ye tökungwïn kïropönï kisoyönut.

¹³Kyakatkatakwa ghöyïn olökwa kireyut, kamakwa ye nyu akwa putintönengwo ompöwölo kyamantekwa kegh nkarinekwa nko chongïn pö pipö lïk.

¹⁴Kïlenyona ngwïnchini piköku kimömöto poryot. Akenyornyoroy wölo ighïponenyi, le wölo kiwurta Syalmani Pet Arpel ompö poryot, akenga kor nko monekwa lömïs

¹⁵kidonekwa nyu nyoni we pipö Petel ompö ngokikwa cho möngörï kïpöröy nyu pöytoghinto Israel kiwasan nyo mötïng.