Read pokoot OSEA 11 Bible Online

OSEA 11 - pokoot bible

OSEA 11

¹Kyachaman Israel otini kile monïng, akurön nyinte kungwïna Misri.

²Wölo kïle otini kyokuran chane, kïmi kunokenanïn tya, akitas tagh kïpelchï amöros Paaltin,* akïpelchï tïkwïn cho ngutoy cho onyïn körkeyïntin.

³Ani nyu nyo kyanet Epraim kïwestö, ateteyan ompö morichu, wölo melö kipköchï lö ani nyo kyanam chane.

⁴Kyontöghoghchan chane ompö angwopö kisyonchin nko ompö angwopö chomnyogh. Kyangwïsan kotwöyikwa mchokin atöpan ngwïny apagh chane.

⁵Mïlisyot chane kutöngöy Misri tökïpayta pöytoghinto Asirya chane ompöwölo kitagh kïkötö

⁶chögho poryot ye kanastinekwa wonyot tekechtino or lömïs akuwonyö tötukökwa chi tigho kegh.

⁷Tökumönöy piköchan kïpïtanïn akïkïrkegh kïkur Tororöt nyo Töror tya kimemukönye kungarak chane.

⁸ Opïröneninyi lö ne nya Epraim, apïsteninyi lö ne nya Israel? Omukan lö ne taghinyi le wölo kyadan Adma, anta aghinyi lö ne le Sepoim? Möchömönye mïkulöwunyan kokay ngalechoni akïmi kïyetu kisyonötenyan ompö nyi.

⁹Oyodenan nörekyenyan melö towurtenan Epraim ompöwölo ochan Tororöt melö ochan ptangengmöt. Ochan Tororöt nyo Tïlil nyo mi nko akwa melö ongwïnan owonyokwa.

¹⁰Pkonöy piköchan kïrïpanïn otini kotïlön le ngötïny pkono werkachï ta kïpotonchöt otini kötïl ECHOTYON le ngötïny.

¹¹Pkonöy ompö ngörekyö le törit cho pkono Misri, le cheptuken cho pkono koro Asirya. Oyokyinan nyu chane kïpa kestonikwa ngat. Mwoghöy ECHOTYON.

¹²Lentöy ECHOTYON, “Kikuwitenanïn Epraim putintön akuwitenanïn Israel lïsa, akïtaghanïn Yuda, ani nyo ochï Tororöt nyo Tïlil.”