Read pokoot OSEA 2 Bible Online

OSEA 2 - pokoot bible

OSEA 2

¹Kïlenyona, okurenö nyu werkökwo pipö Israel, “Pipö Tororöt,” akurö, “Chamanpa ECHOTYON.”

²Monechu, ogheghchinö yongwo ogheghchinö yongwo ompöwölo melö tökïkorkenyan nyinte amelö tochan santenyi. Ogheghchinö tökïpïstö kilomatanyi nko cheporesnanenyi.

³Kïkany ato möpïstönye, ochïrutan nyinte kïtöpo lenyini kingwïna muyeto kame. Oghan nyinte kïyam le kew oghan nyinte le surkwen, opörenan nyinte maral.

⁴Mosyonchinanye monechi, ompöwölo monïngo cheporesnan chane.

⁵Ompöwölo kegh yongwa cheporesnan, kökonï arasï yongwa nyo kimir chane. Ompöwölo kilenchï kegh, “Orïpotonan chamankachu cho pöghanïn akïkonanïn puto kech nko sïro pö katani nko mwagh nko dipay.”*

⁶Kïlenyona owokonan arenyi kato, awach kasar atökupot wölo weröy nyinte.

⁷Ato lentöy oyonotoy chamankachi, kïmönyorunye. Kïkany kïlö oyöröy, kïmönyorunye chane. Atolapay kïlö, “Omïlonan ngat wölo mi chitönyan nya kipö tagh, ompöwölo kyomitan nyo karam atanye kitïl ye.”

⁸Ompöwölo melö kinkïtï nyinte lö ani nyo kyotö nyinte pagh nko dipay nko mwowöy, anyïghïtyi ropïyen nko koltin cho kipöghisyeghö kïsagha Paal.*

⁹Kïlenyona, oyodonan nyu paghechu osiswo kasa, ayoda dipaykachu ompö osiswekwa, asara nyinte sampunyan nko sïrenyan pö katani nyo keyeno chïrutïntanyi.

¹⁰Ochïran nyinte kïchïrutit ompö tawu chamankachi akï möminye chi nyo söruno nyinte ewunyan.

¹¹Owonyan ngörekyenyi nko sapkenechi cho pö relïntino arawa nko ichontino Sapatotin* nko nyoroghtïnechi löwïr cho pö saghat.

¹²Onyoran akweko sapipunechi nko keti cho kimwa nyinte lö, “Achï ropöwechan cho kökonanïn chamankachu,” ompöwölo kapaghan chane, owöghökan nyu kïlïkwï wuw atökwam tïpö wudïn.

¹³Ochopan kong nyinte ompö osis cho ropchini Paal amörostin akïmina kegh karïn yitïn cho pïchighöch akïwö kïrïpata chamankachi, akïwutyeghenanïn, mwoghöy ECHOTYON.

¹⁴Kilenyona nyu, owetan olïsolïsöy nyinte, amït kïwö surkwen, angölonchï nyinte ompö tölosyö.

¹⁵ Atolapay oyokyan nyu parenichi pö sapipun, aghan mpöghoghyo Kömpölelyö kïlïkwï kuka kikönöt. Rïpotonanïn nyinte le atanye kitökïle mïrar, le atakinye kingetunö koro Misri.

¹⁶Kuranïn nyu nyinte asisoni lö, “Chitanyu.” Amelö tökïkuranïn ngat, “Paaltanyu.”

¹⁷Ompöwölo melö tochömchinan nyinte ngat kïngölono kaynata Paal.

¹⁸Oman nyu muma* asisoni nko tïpö wudïn nko törit nko tïkwïn cho chuto kegh ngwïny akwompö chane, atömökïswany ngat piköchan. Ochengonan kari lïk löwïr korengwa nko chokon nko kïwantis, apïsyan piköchan kïmöngisyö ompö kalya wölo tïghume.

¹⁹Opinyi we Israel lïkuna korkenyan kokay, opinyi ompö man nko ompö kighanat, oporunyi chomnyogh nyo möminye söröm nko kisyonchin, aghinyi lïkuna nyinyan kokay.

²⁰Opinyi ompö kighanatenyan lïkuna nyinyan kokay, atenkïtunö lö ochan ECHOTYON.

²¹Oyokunan asisoni sowutko pikachu, terchini nyu yïmö ngwïny sowutkachi. Mwoghöy ECHOTYON.

²²Atolapay kïropönchï ilat ngwïny, tökïrïryö pagh ngwïny nko dipay nko mwowöy. Ghömöy nyu choni möchut pö Yesrel.

²³ Oghan pikachu kïmang korononi, akïtösisyö. Osyonchinan chane cho “Melö kisyonchini,” aghan chichan cho kikiyitöy lö, “Melö piköchan.” Yoku nyu chane kïlentöy, “Ichinyi Tororötïncha.”