Read pokoot OSEA 4 Bible Online

OSEA 4 - pokoot bible

OSEA 4

¹Atera ngölyonto ECHOTYON, pïchï pö Israel, ompöwölo tïng ECHOTYON kigheghchin ompö pïchï möngöy koronï. Ompöwölo mökïminye man anta kisyonöt anta sïkunöto Tororöt ompö koronï.

²Kïpoto mumos cho kinyïghï kor, wölo melö chi nyo rïpöy nko putintön nko pörisyö nko chorsyö, akwigh cheporesnan. Mökïminye rïmö kïgh kïkïröy nko pörchö nyo melö wonyot.

³Kïlenyona peköy koronï kïma nyu kïgh anka tïkwïl nyo mi ori. Meghsot tyonkïn lömïs nko törit nko ompö chini le kaghagh tïkwïl.

⁴Wölo lentöy ECHOTYON, “Merwokyï chi anta gheghchï chi, ompöwölo ogheghchini we tïsin.

⁵Ipïtenyi pöghet, akupïtöy werkoyontö tïkwïl nko nyi oghö, apöran yongu Israel.

⁶Kikuwongwï piköchan ompöwölo menkïtcha kïgh, ompöwölo kataghakwa chïreryö, kïlenyona otöghokwa tïkwïl. Melö tochikwa tïsichan ngat, ompöwölo kowutyeghekwa kiyomisut pö Tororötïngwo, kïlenyona owutyeghonan tïkwïl monekwa.

⁷“Kïle wölini changta tïsï, kïtösöy nyoni tagh kwighwanïn ngokï, owöghökan ye nyu ororyengwa kïlïkwï arasï.

⁸Kam chane ropöwo ngokiko piköchan akïngörekyï ato ngoki.

⁹Wölo kighchini pich nko tïsï laras. Omungan aghokyï chane kïrïp kegh nko ighisyewutkökwa cho ghach.

¹⁰Omisïyi chane wölo melö pïghyongi, ighöy cheporesnan, wölo melö chongitu chane ompöwölo melö lïmöy chane ngala ECHOTYON.”

¹¹Lentöy ECHOTYON, “Nyoröy dipay* cho pö köny nko cho relach pich mötöw!

¹²Tepöy piköchan ket nyo kakipat kiporunöt! Kuporchï nyu lïkïp kïgh nyo mököy chane! Ighöy lenyoni ompöwölo kip chane mïkulöwu cheporesnan kïmasta, kïpa nyu chane kwigh cheporesnan akïpïstö Tororötïngwa.

¹³Tötoy chane amöros ompö kutïngkot nko ropöw ompö ket cho tïnkusöch, ompöwölo kiwur nyo karam. “Nka nyoni ighöy tipikwa kïlïkwï cheporestin akwigh mïror cho kipöy kwigh alomi.

¹⁴Momunganye tipikwa ato igh cheporesnan anta mïrorkökwa ato igh cheporesnan, ompöwölo kamastekwa mïrön arïpata kor cho le cheporestin agham nko chane aropchï amörostin tororötinekwa. Akï pkonöy pich cho mötïngcha pköchin kuwonsot.

¹⁵“Nko kochikwa cheporestin pipö Israel, wölo magh pipö Yuda ntökïpeny tïkwïl. Mapa asagha Kilkal anta apusta Petel Apen, amam muma ompö atoni ompö kaynata ECHOTYON nyo satate.

¹⁶Oghïghech mötöwöy pipö Israel le sïkïryö nyo körom. Pöghöy nyu ECHOTYON chane ye le wara kechir ompö wölo pöro.

¹⁷Kinomnyö pipö Israel nko körkeyïntin. Apakadena chane!

¹⁸Otini kigha kumïn akïtömesyö, kwighata cheporesnan akïchama kegh arasï kïtïl konyït.

¹⁹Kutïtoy yomat chane kupotyö atökïnam chane arasï ompö amörostinekwa.