Read pokoot YOEL 1 Bible Online

YOEL 1 - pokoot bible

YOEL 1

¹Kingwïnchï ngölyonto ECHOTYON Yoel wero Petwel.

²Atere poyï ngölyontonï, akïter chi anka tïkwïl nyo möngöy koronï. Kikwigha kïgh nyo lata nyete ompö osiswekwa anta osiswo papotïnekwa?

³Omwochinö monekwo kïyete atökïmwochï moneko monekwa, cho mwochini ngat pïnwöy cho pkonöy.

⁴Tïku par cho kipïstö nkutyan kwam talamnya. Chona kipïstö talamnya kwam kïperwö Chona kipïstö kïperwö kwam ptölök.

⁵Ay, akwa ptömösï ongetyenö alokyö. Ochoghö rira lapay ptamasispa dipay,* ompöwölo kikechïchuk, amökïlïtönye kutïwekwa.

⁶ Ompöwölo kepokyï talamnya korenyan le lïk köromöch nyoman ameyitisyocha akïngötipöch kelat le kela ngötïny akïtïng chamantin cho lenye cho pö koko ngötïny.

⁷Kikunyar ketiko sapipune chan akïnyaghaghnyagh ketichan walaka cho pö akwa. Kikwöl perka akuchunchï ngwïny.

⁸Osönönö le mïrar nyo loköy chi nyo kama nyo kötepöy nyinte.

⁹Mömicha ropöwo pagh nko tïsöw Kö pö Tororöt.* Ay, alokyenö nyu tïsï cho opöghisyechini ECHOTYON.

¹⁰Kinyorisyö parenï mi ngwïnya ompöwölo kinyorisyö pagh, akïyomö sapipun akï puryö mwagh.

¹¹Kiwöghisyö ngori paren kiteghyö ripi sapipun ompöwölo puryö nkanun nko matay, ay möminye kïgh nyo tökeköso par.

¹²Kiyomö keti sapipun akuwonyö keti akwa walaka. Kisilonchö keti akwa cho sisinchö ompö paren akïyomö löwïr. Akuwonyeghö pich ngörekyö.

¹³Ay akwa tïsï, alaka sïro cho poru lö omitekwa lok, oriryenö cho opöghisïyi ompö ato kïtïsisyegho. Olïtö Kö pö Tororöt alaka sarankwachtin kïyech, akwa chona opöghisyechini tororötïnyan. Ompöwölo mömicha ropöwo pagh nko cho kïgheghöy cho töketötoy kïpa Kö pö Tororöt.

¹⁴Mwatïtena kekïrur kïrurat nyo tïlil okurtenö tuyot nyo tïlil! Aghamïta kintöghoghï nko pipö Yuda löwïr kïpa Kö pö ECHOTYON Tororötïnkwa atökïrirchï nyinte.

¹⁵ Kikïlekïtit asispa ECHOTYON ato ipu Kimuktoghin kinyarat, Heywey, ghöyitu asisoni kïtya!

¹⁶Ayo kichö mapeghenechanye pagh kerose akupot ngörekyö ompö Kö pö Tororötïncha?

¹⁷Kömeghö kösïgh ompö ngwïny, mökïmicha pagh cho kitöni töpoton, akikïwïryö töpotoni, ompöwölo mökïrïrcha pagh.

¹⁸Wechï kiwongwï tyonkïn akïnyarïl tïch, ompöwölo kichop wölo oketïyi, akuwongwï ompö kechir tïkwïl.

¹⁹Nyi onkït nyo opchinan lokechu We ECHOTYON. Ompöwölo kikuwany ma sus ompö surkwen, kamel lyopötö keti akwa löwïr cho mi paren.

²⁰Lokyininyi tïkwïl tïpö wudïn ompöwölo kiyomö lalwatïna, akikuwany ma sus ompö surkwen.