Read pokoot AMOS 1 Bible Online

AMOS 1 - pokoot bible

AMOS 1

¹ Ngalana Amos chï nyo kile akonga ompö mösöw cho pö Tekoa, cho kimwa könyis odeny akwompö koro Israel ato kipoytoy Usia Yuda, kipöytoy Yeropoam wero Yeoas Israel kïtomö korïngring.

²Kïlö nyinte, “Tïloy ECHOTYON kutïng pö Sayon,* kïlïmo kutinyi nyo wow Yerusalem. Köyomö suswo kyak, mökïminye suswon kutïng pö Karmel.” Sirya

³Lentöy ECHOTYON, “Melö oyodeghonan sitöt Damaska ompö ghöyitwokachi cho kigh. Ompöwölo kilïwo Kiliad karïn cho kïtïgho pagh.

⁴Kïlenyona oyokyinan ka pöytoghin Asael kuwany nïyet pö Pen Adad.

⁵Omïreghan tömölöwonto Damaska, awanyan piko ompö mpöghoghyo Apen, nko nyinte nyo tïng lïpö paytagh ompö Peteden. Kïrongöy pipö Sirya kïpa pïnotön ompö koro Kir.” Mwoghöy ECHOTYON. Pilistia

⁶Lentöy ECHOTYON, “Melö oyodeghnan sitöt Kasa ompö ghöyitwokachi sömök tökwangwan ompöwölo kirang pikö löwïr kïpa pïnotön kitö chane pipö Edom.

⁷Kïlenyona oyokyinan ma nayatu Kasa kimeghö nïyetkachi lökïr.

⁸Owonyan pipö Asdod nko nyinte nyo tïng lïpö paytagh ompö Askelon. Owongan pich cho möngöy Ekron nko ngötunön pö Pilisti.” Mwoghöy Echotyon TORORÖT. Tiro

⁹Lentöy ECHOTYON, “Melö oyodeghonan sitöt Tiro ompö ghöyitwoköku cho pö kïnomnyö cho kigh ompöwölo kirang pikö löwïr kïpa pïnotön koro Edom amenancha muma pich cho tupchö.

¹⁰Kïlenyona oyokyinan ma nayatu Tiro kïnagh wölo kwolo kegh löwïr.” Edom

¹¹ Lentöy ECHOTYON, “Melö oyodeghonan sitöt Edom ompö ghöyitwokachi cho pö kïnomnyö ompöwölo kiyona werïngwa chok nyo mesyonchïnye kïnörekyï nyinte osis löwïr akirorchï mïkulöwunyi kokay.

¹²Kïlenyona oyokyinan ma Teman tökïpel nïyetwo Posra lökïr.” Amon

¹³ Lentöy ECHOTYON, “Ompöwölo kachama kegh pipö Amon ngokï, mopïstonanye omungöy chane. Kichukö ngötwö mutïno kor cho kimirsïyi ompö Kiliad, ato kiporyot lö tökïtasa korengwa.

¹⁴Kïlenyona otorenan ma nayatu Rapa, atökïnagh wölo ghupo kegh. Kïlïmöy asisoni rira nyo pö poryot, ngwonitu porye le köromnyo chepkiriri.

¹⁵Kipöy pöytoghintengwa nko yetïntinechi löwïr koro pïnotön.” Mwoghöy ECHOTYON.