Read pokoot AMOS 4 Bible Online

AMOS 4 - pokoot bible

AMOS 4

¹Atere ngalechi koruchï pö Pasyan cho omitö kutïng pö Samaria cho opïröy mey arey ptankeris atyakata chona mötïng kïgh cho olenchini chitonikwa, opkecha kumïn keghegha.

²Kikuwalwal kegh Echotyon TORORÖT le ato tïlil nyinte lö: Pköchinokwa osiswö cho kikodonekwa sartin kechutok chi anka tïkwïl ompö akwa kekodo sartï le koghoghwö.

³Kichutokwa ntatakwa nïyet wölo pankase, akewirchokwa sany. Mwoghöy ECHOTYON.

⁴Apkana Petel agha ngokï, apa atas ngokï ompö Kilkal. Opunö amörostinekwa tökwoghö chik, apï karerantinekwo pö taman asisto sömök.

⁵Aroptena ropöwo sörö cho pö makatin cho kakitö mumar, akwol kegh amwatïta kelïm lö, karoptekwa ompö konunöto kegh, ompöwölo ochömekwa oghe lenyoni, akwa pipö Israel! Mwoghöy Echotyon TORORÖT.

⁶Kyokonokwa kömöy ompö kanastinekwa wölo moyokukwanye kegh wölo omitan. Mwoghöy ECHOTYON.

⁷Kyaratan ilat ompö akwa kïtomö aro sömök tökekosisyö otöninan rop kanasyan akonga omulön rop kanasyante anka ropönchini paren walaka, wölo melö ropönchini paren walaka.

⁸Kirwata pich cho kiwonyö nko maral. Ngeto kanasyantanï kïpa nyinö kïyöroto pögh wölo mönyorïcha cho ghömöy, wölo moyokukwanye kegh wölo omitan. Mwoghöy ECHOTYON.

⁹Kyawiran parenikwa chepkïrïri nyo pö pekat lïku parenikwa pö sapipun surkwen, omöy talamnya ketikwa pö makany nko arol, wölo moyokukwanye kegh wölo omitan. Mwoghöy ECHOTYON.

¹⁰Kyotyorwokwa sömewut le chay kimi koro Misri kyaparan monekwa ompö chok arangan angoletinekwa kïpa kor anka. Kyaghan oröryo kanasyantenkwa kïlïtokwa sörun, wölo moyokukwanye kegh wölo omitan. Mwoghöy ECHOTYON.

¹¹ Kyawanyakwa walaka le wölo kiwangta Tororöt Sodoma nko Komora. Kyalatekwa machey nyo kakïchengunö ma, wölo moyokukwanye kegh wölo omitan. Mwoghöy ECHOTYON.

¹²Kïlenyona lenye nyu nyoni wölo odonekwa we pipö Israel agha kegh nyu taryama nko Tororötïngwo.

¹³Tororöt nyinte nyo kigh kutïngkot nko yomat. Nyinte nyo ngongchini ptangengmöt kinonutkachi. Nyinte nyo wöghököy pöghet kïlïkwï tuwïn. Akï nyo kïwestegho paraku yïm. Kïkuro kaynenyi Tororöt Kimuktoghin.