Read pokoot AMOS 5 Bible Online

AMOS 5 - pokoot bible

AMOS 5

¹Atera tumi pö meghat otumenokwa we pipö Israel.

²Kikïchïnta Israel nyo le chepkïltït akepïsyï korenyi amömi chi nyo ngetöy nyinte kughyö.

³Lentöy Echotyon TORORÖT kanasyan nyo kiset pich cho le elpu akonga kïmïlisyö cho le pokol opïn kïlö anka nyo kiset cho le pokol kïmïlisyö cho le taman.

⁴Lenchini ECHOTYON pipö Israel opkonchanïn tosöpchenö.

⁵Wölo mapa Petel asagh amolïtöy Kilkal anta oghyö Persyepa ompöwölo petöy pipö Kilkal kïlïku pïnot akupot Petel.

⁶Ayara ECHOTYON tosöpchenö, tömengwïn le ma kuwany pipö Yosep. Pelöy ma pipö Petel lömïs akïpuryö chi nyo nuköy.

⁷Ompöwölo kawaghakakwa man kunyara aketïp man kupot.

⁸ Ayara ECHOTYON nyinte nyo kigh kokel, kigh Kaghis nko Kakoretaran akïwöghököy tuwïn nyo tuw löyuk kïlöpoyit lönga akïwaghach pöghet kïlïkwï oghö nyinte nyo kuru pögho nanam akïropönchï ngwïny kïmïkul.

⁹Nyornyoröy nyinte pich cho owesöch nko wölo aghïgh atïghö kwa kegh.

¹⁰Oreyekwa chi nyo ngölonöy man ompö kokwö.

¹¹Kïlenyona kïrkegh katek kori koghïn cho kipötöy melö omöngekwa nyonikïny. Kakatkatakwa sapipun cho karamach, wölo melö ogheghekwa dipaykakwa* nyonikïny. Ompöwölo opïrekwa mey, asara paghekwa pö nkanun.

¹²Onkïtön lö tya lelutkökwa nko wölo tenö ngokikwa, akwa cho onyörilöy kong pipö man, achengoy chane asoya, atïtïpöy ngala ptankeryan ompö kokwö.

¹³Kïlenyona sisöy chi nyo ngöghom atoni ompöwölo ghach osiswechoni.

¹⁴Agha nyu kïgh nyo karam melö nyo gha tosöpchenö atökïtöpö ECHOTYON, Tororöt Kimuktoghin nko akwa lenyini kyamwaghakwa.

¹⁵Atagha kïgh nyo gha acham nyo karam achïchïma man ompö kokwotïn, töptoy ana syonchini ECHOTYON, Tororöt Kimuktoghin, ngötunön pö pipö ara Yosep.

¹⁶Kïlenyona lentöy ECHOTYON, Tororöt Kimuktoghin nyo le Echotyon, anyona rira mi kokwo nko ortïn ompö kanastinekwa löwïr kimwochini pich cho le ngorï kïriryö akemwochï cho chïreröch.

¹⁷Akeriryegho pareni sapipun löwïr otini kokonokwa sitöt.

¹⁸Heywey akwa cho opïrchini kwitï asispa ECHOTYON! Ngörokekwa lö ne asisoni nya wey? Ompöwölo lïku tuwïn asisoni ompö akwa, melö löpoyïn.

¹⁹Lata ato rïpo chi ngotïny kïtuyö nko chepökerï anta lö olït kö kïtor moroya.

²⁰Ayo, mötuwitunye so asisoni pö ECHOTYON lömïs, asispa kiwuröt, amöminye löpoyïn.

²¹ Otoghan, asasan ichontinekwa amelö mïlanïn tuyotïnekwa cho tïlilöch.

²²Kïrkegh köropkanïn amörostinekwa cho kïpelöy nko ropöwo pagh melö ochöman kokay amotokanye ropöwo kalya cho pö kyakikwa cho okwoghöch.

²³Anateghena kiteghata tumwöyikwa melö oteran chöghöto pkurerunekwa.

²⁴Wölo nya kïnyïghï man ngwïny le pögh akuyinta man le lalwa.

²⁵ Kyoropkanïkwa amörostin nko ropöw könyiswechay le tömönut angwan ompö surkwen nya we pipö Israel.

²⁶Ompöwölo kasaghakwa Sakut tororötïnkwa nyo wow, nko Kaywan, tororötïnkwa nyo le kokelyan, chini kaghakwa akwane, okösönekwa nyu nyo mötïny.

²⁷Kïlenyona opokwa ape pïnotön koro Damaska wölona, mwoghöy ECHOTYON alekwa kaynenyi Tororöt Kimuktoghin.