Read pokoot AMOS 8 Bible Online

AMOS 8 - pokoot bible

AMOS 8

¹Kuporwanïn Echotyon TORORÖT koropo akwa.

²Kïlenchanïn, “Amos, kesïwenyi ne?” Olenchan, “Köröpo akwa cho kirïrö.” Atolapay kïlenchanïn ECHOTYON, “Ketïta sörömu piköchan pipö Israel, amomïkukönchinanye ngat ompö ghöyityengwa.

³Lïku tumwöyi Kö pö Tororöt* rira asisoni. Mwoghöy Echotyon TORORÖT. Chongitu mïntïruch kïnyam, kïwirchini sany nyo mölïmönye chi.”

⁴Atere ngalechï akwa cho opïröy ptankeris, awany mey ompö kor,

⁵alentekwa, “Oyï ato meghöy arawa tökyaltena paghecho? Oyï ato wonyot Sapato* tökyaltenacha nkanunecho nya? Kyoltonecha akepel pich ompö ratilin cho pö lïs.

⁶Kimukechanyu kyole mey le sekey ompö silpa, akyal ptankertin ompö kwegh cho pö kel akonga, akyalta nkanunecho cho ghach ompö olyot nyo wow.”

⁷Kikuwalwal kegh ECHOTYON nyo meno kegh Yakopo lö, “Melö owutyeghonan ighisyewutkökwa cho ghach.

⁸Yotyotöy korö ompö ngalechi akïsönön chi anka tïkwïl nyo möngöy ori. Ngetöy le pögho lalwa Nile akïröytö le pögho lalwa Misri.”

⁹Lentöy Echotyon TORORÖT ompö asisoni, “Oghan asis kïröytö nyini keghyö akïtuwit korö nyini le pöghet kwen.

¹⁰Oghan ichontinekwa kïlïkwï rira, kïlïkwï tumwöyikwa löwïr lok. Oghokwa alaka sarankwachtin, angwïl mötöw, le pich cho lokyini megha monïng le akonga kïpoto, akï ngwonitu nyarïl asisoni lakat.

¹¹“Arosa, pkonöy osiswö cho oyokunan kömöy kungwïn kor, melö kömöyu omisyö anta maral, wölo kömöyu kelïm ngölyonto ECHOTYON. Mwoghöy Echotyon TORORÖT.

¹²Ryöghsetoy pich kïngeta nanam ntökwit nanam, kïngeta okumpö löt ntökwit okumpö tagh, morotoy ngölyonto ECHOTYON, wölo mönyorucha kokay.

¹³“Wongöy maral nyu asisoni mïror cho pïchighöch nko chumwak.

¹⁴Wonyot lömïs pich wolwolo kegh Asyima nyo pö Samaria akïlentöy, ‘Le ato söpöy tororötïngu, we Dan,’ anta ‘Le ato söpöy tororöt pö Persyepa.’ ”