Read pokoot AMOS 9 Bible Online

AMOS 9 - pokoot bible

AMOS 9

¹Asïwan Echotyon kughyongo kamasu ato kïpelo amörostin, kïlö, “Wira pchörino Kö pö Tororöt* tökuyotyot kot, kanya kïrulchï pich mötöwöy. Owonyan pikö cho kongotï ompö chok, melö mi ompö akong nyo rïpöy.

²Amöminye akong nyo chïwïtöy kïrkegh kïlïtöy ngwïny. Ongwïsunenan wölini kïrkegh kïlany yïm. Otyorunan chane kïpa ngwïny.

³Kïrkegh kïwïnya kegh kutïng pö Karmel parak, owetan oyöröy chane ompö wölini ntanam. Kïrkegh kïwïng kegh ompö konyichan ompö nanam ori, omwochinan tyompö pögh kïsïra chane wölini.

⁴Akïrkegh kïpa pïnotön koro pungkökwa, olenchinan chok kuwany chane ompö wölini lömïs. Atolapay orotyan chane lasiny, aghchï cho ghach, melö cho karamach.”

⁵Swongöy Echotyon, TORORÖT Kimuktoghin ngwïny kïyï le aykwanga akïsönön pich cho mi ori ngetöy koro akïrul le lalwa Nile.

⁶Teköy ECHOTYON katanyi yïm akutö kitoröte ngwïny chengöy nyinte pögho nanam akïmïlchï ngwïny. Kïkuro kaynenyi ECHOTYON.

⁷Kïlö ECHOTYON, “Melö so alatekwa pipö Etopya ompö ani we pipö Israel kyopunekwa koro Misri opunan Pilisti koro Kaptori opunan pipö Sirya Kir.

⁸Rosöy konyi Echotyon TORORÖT pöyunötin cho ighöy ngokï akuwongöy ompö ngwïny lömïs wölo melö wongöy pipö ara Yakopo.

⁹“Arosa omwoghan ngölyon atimtim pipö Israel ompö koroswo punton löwïr cho möngöy chane. Oseran pipö Israel le wölo sertoy chi pagh, möminye ompö akong nyo relöy ngwïny.

¹⁰Meghot mwokïyis pö piköchan lömïs ompö chok, chane cho lentöy, ‘Melö mi kïgh nyo gha nyo omecha.’ ”

¹¹ Lentöy ECHOTYON, “Itu asis nyo ongetan paytaghpa ara Daudi nyo kirul, atek ngat nïyetkö cho kirulyö le otini kimi tagh.

¹²Atö kïmïl koro Edom nyo kingotï nko punton löwïr cho kile chichan. Mwoghöy ECHOTYON nyo ighöy ngalechï.

¹³“Pkonöy osiswö cho kïngoröy pagh akïnyini lawel kwitï ilin, kïkany kengor sapipun, kwitu lawel ryökinto dipay.* Tökuno kutïngkot dipay cho onyïn akuyintoy ompö komos löwïr.

¹⁴Omïtunan pikachu Israel korengwa, pkonöy kïteköy akïmang kanastin cho kirulyö, akïkatkat sapipun akïgha dipayka.

¹⁵Okötkötyinan pikachu korengwa amelö tökengetöy chane kokay ompö koronï otöninan chane.”