Read pokoot YONA 4 Bible Online

YONA 4 - pokoot bible

YONA 4

¹Wölo kïnarek Yona nyoman ompöwölo melö kicham ngalechoni.

² Kïlenyona kïsagh Yona lö, “ECHOTYON, melö so kïyete nyay kyamwaghan atanye kyomitan korenyan? Nka nyay kyapertan lawel atang Tarsis. Ompöwölo kyonkïtön lö ichinyi Tororöt pö chomnyogh nko kisyonöt, amelö nyïmnyïm kïnarek, akï nyo mi kïpsach kïmolchï kamas sitöt nyo kötetöni chi.

³ Kïlenyona ECHOTYON paranïn. Osoghinyi lö, nya ameghan, ompöwölo kaykay ameghan kïtïl osöpön.”

⁴Kuyokyï ECHOTYON lö, “Ilentenyi so kagh kïgh nyo karam otï inörekenyi?”

⁵Kïnget Yona kïweghö kanasyantanay kutang okumpö kongasis kïtek kïyole tunku ompö wölini akuwurö atoni, akïkany lö ne nyo igho ompö kanasyantanay.

⁶Atolapay kupit ECHOTYON Tororöt töpöngwö, akwigh kïkarta Yona kïlïkwï rurwenyi kïlïmchï kegh nyo karam. Kïngörökyï nyu Yona nyoman töpöngwonay.

⁷Wölo nyini kiyech asïyech kuyokwï ECHOTYON nkutyan kungwïn kwam töpöngwonay, kïsilön lenyini.

⁸Nyini kipusï asis, kuyokwï Tororöt yomöt nyo kila nyo kingwïna kongasis. Kïpel asis Yona möt nyo kirich kïryalta. Kïlenyona kïsom meghat kïlentöy, “Kaykay ameghan kïtïl osöpön.”

⁹Wölo kïlenchï Tororöt Yona, “Ilentenyi so kagh kïgh nyo karam nörekyinö töpöngwonï?” Kïlö Yona, “Owöy, kaghan nyo karam anarek, nyo omökan ompö amegh!”

¹⁰Atolapay kïlö ECHOTYON, “Isyonchinenyi töpöngwö nyo melö kekatkatanyi, amelö keghanyi kïpit, kïgh nyo kipitï oghö akonga atolapay kïma asïyech.

¹¹Ayo, mömïchinanïnye so osyonchï Ninawi, kanasyantanay wow, nyo mi pich cho tïlöy 120,000 cho melö nkït kïgh nyo karam nko nyo gha nko ompö kyak cho chang?”