Read pokoot KIYITUT 10 Bible Online

KIYITUT 10 - pokoot bible

KIYITUT 10

¹Kilenchï ECHOTYON Musa,

²“Tanga kontin odeny cho silpa cho ikutenyi ato ikurenyi pich nko ato imökenyi kïwï.

³Nyini kakïkut kontinechoni kwodeny, kïpka pich kïtuyechï ato imitenyi le kuka Ema nyo mi ECHOTYON.*

⁴Wölo ato kïkut akonga kïtuyechini wölo imitenyi kintöghoghi ortïna Israel.

⁵Nyini kakïkut kontï nyo pö on, kïwï möngotïno cho mi okumpö kong asis.

⁶Nyini kakïkut nyo pö odeny, kïwï möngot nyo mi okumpö tagh, kïkutöy konti on otini tökïwï chane.

⁷Wölo kïkutöy kontine kwodeny atökïpka ato akonga pipö Israel löwïr.

⁸Akï werpö Aron cho kutöy kontine. Lïku kontinechoni kirurut ompö akwa pïnwöy cho töpkonöy.

⁹Ato opetekwa poryot ompö korenkwa, oporyegho pich cho köpïrekwa, okutekwa kontinechï, atö angarakakwa ECHOTYON Tororötïnkwa osörunenokwa punkökwo.

¹⁰Okutekwa kontin ompö osiswekwa cho pö ngörekyö le ompö Ichon pö Relïn pö Arawa nko ichontinekwa walaka, otini otötokwa ropöwekwa cho kïpelöy nko cho pö pöghisyö. Ongörokekwa nyu. Ochan ECHOTYON Tororöt.”

¹¹Kinget poltonay kimi Ema nyo mi ECHOTYON ompö asispa tömönut odeny nyo pö arawa odeny ompö konyi odeny kïngeta kïpkana pipö Israel Misri,

¹²kïwuwö pipö Israel surkwen pö Sinay, ntökwit surkwen pö Paran wölo kiwö poltonay kughyongö.

¹³Kitor chane kïwï panto tagh ompö ngölyonto ECHOTYON nyo kiwerï Musa.

¹⁴Kitor kïpa pipö Yuda ompö söpïchtöngwa aki Nasyon wero Aminadap nyo kile kintöghoghintengwa.

¹⁵Netanel wero Suar nyo kintöghoghchini pipö Isakar.

¹⁶Kï Elyap wero Elon nyo kintöghoghchini pipö Saplon.

¹⁷Nyini kikïngany ema, kutor nyu kïpa werpö Kersyon nko cho pö Merari cho kisïtöy Ema.

¹⁸Kïpa nyu pipö Rupen ompö söpïchtöngwa, aki Elisur wero Syedeur nyo kintöghoghchini.

¹⁹Syelumiel wero Surisyadai nyo kintöghoghchini pipö Simion.

²⁰Kï Elyasap wero Deuel nyo kintöghoghchini pipö Kad.

²¹Atolapay kïpa pipö Koat cho kisïtöy tïkwïn cho tïlilöch, kïnya ketek Ema kïtomö kwitïta chane.

²²Kïpa pipö Epraim ompö söpïchtöngwa, aki Elisyama wero Amiud nyo kintöghoghchini.

²³Kamaliel wero Pedasur nyo kintöghoghchini pipö Manase,

²⁴kï Apidan wero Kidyon nyo kintöghoghchini pipö Penchamen.

²⁵Sörömu nyu kïpa pipö Dan ompö söpïchtöngwa cho kiköru lötu söpïchiskö löwïr, aki Aieser wero Amisyadai nyo kintöghoghchini.

²⁶Pakiel wero Okran nyo kintöghoghchini pipö Asyer.

²⁷Kï Aira wero Enan nyo kintöghoghchini pipö Naptali.

²⁸Kirïp kegh lenyoni tatata pipö Israel nko söpïchiskökwa otini kiwuwöy.

²⁹Kïlenchï Musa Opap orötanyi wero Yetro nyaya pö Midyan, “Kïpetecha ye ketöngöy kor nyo kimwa ECHOTYON lö, okonecha. Kiyomis nyinte lö, oghwecha nyo karam, kepe tïkwïl atökechagha köromnyononi.”

³⁰Kïlenchï Opap Musa, “Mowetanye, omïlenan wölo mi piköchan.”

³¹Kïlö Musa, “Mepïstecha ompöwölo inkïtönyi wölo kïmöngecha ompö surkwen, ilïkunyi ripintencha.

³²Akï ato iwenyi nko acha, kechöghecha nko nyi tïkwïn cho konecha ECHOTYON.”

³³Kïwuwö chane Sinay kutïng pö ECHOTYON akïpa rutogh nyo pö osis sömök. Akimi osis lapay Santuku Muma* kuntöghoghchini chane atökïyörchï wölo möngöy.

³⁴Akimi poltonay pö ECHOTYON parakungwa pöghet otini kiwuwöy kutöngöy möngot anka.

³⁵Otini kikïsït Santuku Muma, kïlö Musa, “Ngeta ECHOTYON aitoyö punköku aikany kïryöghö tawungu chona reyinyi.”

³⁶Akï nyini kighyö, kïlö Musa, “Mïlena ECHOTYON wölo mi pipö Israel cho meyitisyotnye.”