Read pokoot KIYITUT 11 Bible Online

KIYITUT 11 - pokoot bible

KIYITUT 11

¹Kitor pich kïngwïrngwïronchï ECHOTYON ompö kömpölelutkökwa. Nyini kilïm ECHOTYON, kïnyala akuyokwï ma nyo kipel kareranpa möngot.

²Kïlokyï pich Musa, kïsagh Musa ECHOTYON kumis, nyo kumis nyu ECHOTYON mayay.

³Kekurö kaynata atoni Tapera ompöwölo kinagha mapa ECHOTYON kwenungwa.

⁴Kimito pich walaka cho kimi nko pipö Israel. Akitïng mïnyas nyo pö peny, kïlokyö pipö Israel tïkwïl akïlö, “Kïmökecha peny nyo kyomöy!

⁵Kikyomecha kaghagh cho pö kwïle ompö Misri

⁶Wölo mökïtïngetechanye ye owesyö, amöminye kïgh nyo kyomöy kïpoto manechï pat.”

⁷Ki körökegh Mana nko kösïghyonto mosyon nyo rel.

⁸Kichïnchini möngot oghö nko röyön. Kipetöy nyu pich tökwoghö kïkwoghöy akïnga anta tora könö kïlïkwï pïsya, atolapay kugha akwigh makatin cho tïwörör. Ki körökegh onyïniengwa nko nyo pö makatyan nyo kakigha mwaghpa arol.

¹⁰Kïlïm Musa pich cho kilokyot ompö korikwa akimi chi tïkwïl kuketo emenyi. Kïnarek Musa ompöwölo kinyölechï ECHOTYON pich

¹¹akïlenchï ECHOTYON, “Ompö ne teghwaninyi nyo gha le nyï? Akwompö ne tömonyorwan chömchin ompö wölo iminyi? Ompö ne tetönaninyi nïkisyo pïchï löwïr.

¹²Melö ani nyo kyagh chane anta oyiy! Ompö ne temökenyi osïtön chane le monïng ntökwit kor nyo kiyomisyinyi papotïnekwa?

¹³Onyorchinan onö pany cho otönan pïchï löwïr? Kötïlchanïn lö kïmököy pany cho kyomöy.

¹⁴Momukanye ntoghyongchï pïchï onkït, nïkis tya ompö ani.

¹⁵Ato ighwaninyi le nyï, iparanïn pat, ompöwölo mochömanye osïwïyi ngal cho lata chï.”

¹⁶Kïlenchï ECHOTYON Musa, “Kïlwanïn pich 70 cho le kintöghoghi Israel cho konyïtote aimïtï chane Ema aikany kughyongö atoni nko nyi.

¹⁷Orökunan nyu atangalanan nko nyi achengan mïkulöwunï kokoninyi kareran atönön chane. Atökïsït chane tïkwïl nïkisyonï pö pich itïngnyi atömesïtönyi onkït.

¹⁸Mwochinö ye nyu pich lö, ‘Otïlilö kegh atama peny asïyech, ompöwölo kolokyikwa ECHOTYON lö, “Ngo nyo konecha peny nyo kyomöy? Wechï kikïmicha nyo karam ompö Misri!” Konekwa ye nyu ECHOTYON peny nyo omöy.

¹⁹Amelö omekwa asis akonga anta osis odeny anta osis mut anta osis taman anta osis tömönut odeny.

²⁰Wölo omekwa arawa löwïr ntökïtenö opïghyenökwa lö, kïng akulilakwa. Ompöwölo kataghakwa ECHOTYON nyo mi nko akwa atïlchikwa nyinte alekwa, “Ompö ne tökepkanenacha Misri?’ ”

²¹Kïlenchï Musa ECHOTYON, “Omitan yi nko pich 600,000. Kelenyi otöni chane pany cho omöy ompö arawa akonga?

²²Tïch nko kechir cho tya cho kïyengöy tökïmïchï pïchï? Ekï mïchini chane ompö kaghagh cho mi nanam ato kïghamït?”

²³Kïlenchï ECHOTYON Musa, “Melö mïnïng owesyenyan. Isïwïyenyi ye nyu lö, igho kïgh nyo kamwaghan nya anta ewo.”

²⁴Kïwö nyu Musa kïmwochï pich ngal cho kimwa ECHOTYON, akutuyö poy 70 akumït kïpa Ema.

²⁵Kïrökunö ECHOTYON polta akïngölonchï nyinte akïcheng kareranpa mïkulögh nyo kitïng nyinte akutö poyichay le 70. Nyini kilït chane mïkulöwunay, kutor kïngorsyö, wölo melö nyo kogh.

²⁶Kidong pich odeny möngot ompö kintöghoghichay cho kimapacha Ema, choni kï Eldad nko Medad, kilït chane mïkulögh, tïkwïl, kutor kïngorsyö ompö möngot.

²⁷Kurïp karöchïnin akong akïwö kïmwochï Musa lö, “Mi Eldad nko Medad kïngorsïyi ompö möngot.”

²⁸Kïlö Yoswö wero Nun nyo kipöghisyechini Musa, “Echotyontenyu Musa, taghena chane.”

²⁹Wölo kïlenchï Musa nyinte, “Ichinyi so söstoghin ompö ani? Opï ketö ECHOTYON pikachi löwïr mïkulögh nyo ighöy chane kïngorsyö.”

³⁰Atolapay kïmïla nyu Musa nko poyichay pö Israel kutang möngot.

³¹Kuyokwï ECHOTYON yomat nyo kipunö alurïtin nanam akïkany kupilchï möngot. Kinyïghï möngot kuwitwit akïtas tagh kilomiten cho chang kïngeta möngot.

³²Kïkwagh pich asisoni alurïtin kwimön kïyech nko asisto odeny, akï chi nyo kikwagh cho ngörï kï nyo kinyorï kilen 1,000. Kuyomchï nyu chane möngot.

³³Otini kitökïmi chane kwomöy panye kïnyala ECHOTYON ompö pïchay akïpara chane sömew.

³⁴Kekurö atoni Kiprot Atapa ompöwölo kikïtïpchï pich atoni cho kitïng mïnyas nyo pö peny.

³⁵Kïngeta pïchay Kiprot Atapa ntökwit Aserot akïmang atoni.