Read pokoot KIYITUT 12 Bible Online

KIYITUT 12 - pokoot bible

KIYITUT 12

¹Kingalana Miriam nko Aron Musa nyo gha, ompöwölo kip chepö Kusyin.

²Kïlö, “Köngölonï ECHOTYON so kuwerï Musa onkït? Möngölonunye kuwerï acha tïkwïlï?” Kïlïm ECHOTYON ngalekwa.

³Ki chi Musa nyo kitalas kïtïl pich löwïr cho kimi ngwïny.

⁴Kïlenchï ECHOTYON Musa nko Aron nko Miriam, “Omökan akwa kï sömök apkanakwa Ema.” Kïpa chane.

⁵Kïrökunö ECHOTYON pchöri polta akughyongö kuka Ema, akïkur Aron nko Miriam, kïpka chane kwodeny tagh.

⁶Kïlenchï ECHOTYON chane, “Atera ngalechï! Atomi werkoyonta nyo mi kwenunkwa, oporchinan kegh nyinte ompö sïwïyagh, angölonchan nyinte ompö kirwotïtogh.

⁷Wölo sis ompö mötworintenyan Musa, ompöwölo kotönön nyinte kuntöghoghchï piköchan pipö Israel.

⁸Kïlenyona ongölonan nko nyinte kïsïwïyanïn amelö ompö tuwïn, kikïsïwa nyinte wölo alatan ECHOTYON. Ompö ne nyu tömowöghekwa angalanena nyo gha mötworintenyan Musa?”

⁹Kïnyala ECHOTYON ompö chane akïwechï kegh.

¹⁰Nyini kingeta poltonay paraku Ema, kïnam Miriam psenkwet kïrelit por lö, pöt le takarïs. Otini kiwaghaka Aron kuros Miriam akïsïwa lö, kinam psenkwet.

¹¹Kïlenchï Aron Musa, “Echotyontenyu, mekonecha sitöt ompöwölo kakighacha ngokï ompö sölwontön.

¹²Mekany kïlïkwï nyinte chi nyo kikïyï kima akïrarteghate kareranto portanyi.”

¹³Kïlokyï Musa ECHOTYON lö, “Osoghinyi, we Tororöt lö, sopö nyinte.”

¹⁴Wölo kïlenchï ECHOTYON Musa, “Antökösïngwïlchï paponyi nyinte tokoch, mökönyorunye arasï ompö osis mut nko odeny? Nya kekörchï nyinte sanypa möngot ompö osis mut nko odeny atolapay keyokwï ngat.”

¹⁵Kïlenyona kekörchï Miriam sanypa möngot ompö osis mut nko odeny, amelö kitökïwï pich ntökïtenö kïmïla Miriam.

¹⁶Kïngeta nyu Aserot ntökwit surkwen pö Paran, kïmang atoni.