Read pokoot KIYITUT 13 Bible Online

KIYITUT 13 - pokoot bible

KIYITUT 13

¹Kïlenchï ECHOTYON Musa,

²“Kïla pich cho le kintöghoghï ompö ortïnekwa, kïngetunö ortïna Israel kï taman nko odeny aiyonta kïghot koro Kanan nyo otönan pipö Israel.”

³Kwigh Musa le ato kimwa ECHOTYON, kïyonta kintöghoghichï ompö surkwen pö Paran: [Or] — [Kintöghoghin] Rupen — Syamua wero Sakur Simion — Syapat wero Ori Yuda — Kalep wero Yepune Isakar — Ikal wero Yosep Epraim — Osyea wero Nun Penchamen — Palti wero Rapu Saplon — Kadiel wero Sodi Manase — Kadi wero Susi Dan — Amiel wero Kemali Asyer — Setur wero Mikael Naptali — Napi wero Popsi Kad — Keuel wero Maki.

¹⁶Chï kï kaynötut pö pich cho kiyonta Musa kïpa kïghot kore. Kiwaghach Musa kayna Osyea wero Nun kïlïkwï Yoswö.

¹⁷Otini kiyontoy Musa chane kïpa kïghot Kanan, kïlenchï chane, “Ape atanga Nekep,* apusta koro komos.

¹⁸Atorosunö lö, nen kore, aros lö, ekï owesöch piko korononi kïtya anta chang kïtya.

¹⁹Arosï lö, karam koronini möngöy chane nya anta gha arosï lö, möngöy chane kanastin cho tekote nya antö ewo,

²⁰atorosunö lö, karam nyïngwïtyante nya anta gha arosï lö, mi wuw anta ewo. Onyökönitu apï akweko koronini.” Ki osiswo sapipun cho pö tagh choni ato kirïröy.

²¹Kïpa kïghot kore kutorö surkwen pö Sin ntökwit Reop atolekïtö ato kïlïto Amat.

²²Kïpa nyo tagh kutang Nekep* ntökwit Epron wölo kimöngöy pipö Aiman nko Syesyay nko Talmay monïngo Anak. Kikïtek Epron könyis mut nko odeny kïtomö ketek Soan ompö Misri.

²³Kïpa ntökwit mpöghoghyo Eskol, kïtör ompö atoni morïna ket pö sapipu nyo kinam kurur, akïrötyï pich odeny ket akïsït. Kipï tïkwïl makumanka* nko makany.

²⁴Kekurö atoni mpöghoghyo Eskol akwompö morïnanoni pö ket pö sapipun cho kitörö pipö Israel atoni.

²⁵Otini kiwonyö osiswö tömönut angwan kimïlisyö chane.

²⁶Kïpka wölo mi Musa nko Aron nko pipö Israel löwïr ompö surkwen pö Paran nyo mi Kades, kwipchï chane lökoy akuporchï chane akwechay kipunö koronini.

²⁷Akïlenchï chane Musa, “Kakïghotacha koronini, kesïwecha lö, yintegho chö nko kumat akwachï akwa koronini.

²⁸Wölo owesöch pich cho möngöy koronini, akï echön kanastinekwa akïtekote nyoman. Akïmöchonicha pat, kökïsöchicha monïngo Anak koronini.

²⁹Möngöy pipö Amalek Nekep kïmöngöy pipö Ititi nko Yepusi nko pipö Amori wölo le okumpö kamas, kïmöngöy pipö Kanan wölo riköy nanampa Kwen nko sörömu lalwa Yordan.”

³⁰Kïmwochï Kalep pich cho kïtïlchini Musa kïsisyö akïlö, “Kepustena lawel akecheng kore, ompöwölo kïtïngeticha owesyö nyo kïrïntoy.”

³¹Kïlö pich cho kipa nko Kalep, “Mökimukechanye keporyone nko pïchoni ompöwölo owesöch chane kïtïlecha.”

³²Kïmwochï chane putintön pipö Israel ompö paraku koronay kipa chane kïghot, lö, “Möminye omisyö nyo mïchini pïchoni mi koronini akikïsïwecha pich cho koghöch ompö koronini.

³³Akesöchicha korononi Nepilim, monïngo Anak cho pkono Nepilim, akikïlatecha peron ompö chane.”