Read pokoot KIYITUT 14 Bible Online

KIYITUT 14 - pokoot bible

KIYITUT 14

¹Kuteghyö nyu pich akïriryö löwïr aghononi.

²Kïngwïrngwïronchï pich löwïr Musa nko Aron akïlenchï chane, “Kitö ngwangwa kemeghyechinöcha koro Misri anta surkwen!

³Ompö ne tökumïtwecha ECHOTYON koronï, lö so tökewonyenöcha ompö chok? Kïnömöy korucha nko monïnge. Möngwangwanye ye kemïlisyö Misri?”

⁴Atolapay kilenchï kegh, “Kekïla kintöghoghin akemïlisyö Misri.”

⁵Kiwirchï kegh ngwïny Musa nko Aron ompö nyitat ompö tawu pipö Israel löwïr.

⁶Kïpalpal sïrokökwa Yoswö wero Nun nko Kalep wero Yepune, cho kimi nko pïchay kipa kïghotisyö,

⁷akïlenchï pipö Israel, “Karam nyoman koronini kikïpecha keghot.

⁸Atochamecha ECHOTYON, kumïtecha akïkonecha koronini yintegho chö nko kumat.

⁹Nyo magh nyo gha atagh ECHOTYON amawagh pipö pö koronini, ompöwölo kïrïntocha chane le kwïle. Mi ECHOTYON nko acha melö tökïtïng chane kingörokut, kïlenyona mowöghisyö.”

¹⁰Wölo kïlö pipö Israel, kewirena koghïn pïchï, wölo panini lawel kïsïwa pïchay ororyo ECHOTYON nyo kilïwï ompö paraku Ema kulïwchï pipö Israel löwïr.

¹¹Kïlenchï ECHOTYON Musa, “Sösanïn pïchï nko oyï su? Akïtöghöy kughananïn nko oyï, kïrökegh koporchan chane töngönchintin cho chang?

¹²Oyonchinan chane sömewut cho ghach achengan mïlatengwa, wölo oghinyi lïkuna papoto punton nyo wow akï awes kïtïl chane.”

¹³Wölo kïlenchï Musa ECHOTYON, “Kimïtunenyi pïchï Misri ompö owesyengu. Nyini kalïm nyu pipö Misri kïgh nyo keghchinyi piköku,

¹⁴mwochini nyu pïchï möngöy koronï. Kikikïlïm pïchï lö iminyi nko acha akesïwinyi otini keghyongö poltengu parakuncha aintöghoghwechanyi pöghet ompö pchöri polta nko pchöri ma ompö oghö.

¹⁵Ato iparanyi ye pïchï, kïlentöy puntonï cho kikïlïm ororyengu,

¹⁶keparanyi piköku ompö surkwen ompöwölo melö kemukanyi ntemït chane kwit kor nyo kiyomisyinyi chane.

¹⁷Osoghinyi ye nyu Echotyon lö porwecha owesyengu aigh kïrïp kegh nko kiyomisötengu nyo kimwaghanyi lö,

¹⁸ ‘Melö nyölo ECHOTYON lawel, tïng chomnyogh nyo möminye söröm akïlöstoghchini pich ghöyityö nko lelutkökwa. Töko monïng ghöyïntino papotïnekwa pïnta nyo pö sömök nko nyo pö angwan.’

¹⁹Osoghinyi ye ECHOTYON lö mötoghchinö pïchï lelutkökwa, kïrïp kegh nko chomyengu nyo möminye söröm le ato kilöstoghchinyi chane kïngeta kïpkana Misri.”

²⁰Kïlö nyu ECHOTYON, “Kolöstoghchan chane ompö saghatengu.

²¹Wölo kïle ato osöpan nko ororyenyan nyo kinyïghï ngwïny,

²²möminye chi ompö akong ompö pïchï kikïsïwa ororyenyan nko töngönchintin cho kyaghan ompö Misri nko ompö surkwen, wölo kikïtyamanïn chane kïnyïl taman akïtagh kïterwanïn.

²³Metönye chane kor nyo kyoyomisyan papotïnekwa. Mölïtönye chane cho kisasanïn.

²⁴Wölo ompöwölo kitïng Kalep mïkulögh nyo sis akitas tagh nyinte kïkonyïtanïn, omïtan nyinte ntökwit koronini kiwö kïghot akïmïlöy monechi koronini.

²⁵Möngöy pipö Amalek nko pipö Kanan mpöghoghöyi. Waghakena ye nyu asïyech aiwö itang surkwen wölnö portoy Nanam nyo Pïrir.”

²⁶Kïlenchï ECHOTYON Musa nko Aron,

²⁷“Ngwïrngwïronchinanïn mwokïyichï pö pich nko oyï su nya? Kyaghakan ompö ngwïrngwïrönötengwa!

²⁸Mwochinö nyu chane lö, ‘Kïle ato osöpan, oghwokwa kïgh nyo katepakwa.

²⁹Omeghokwa kïghömï mïntïruchkökwa surkwen akï ompöwölo kongwïrngwïronchanïkwa, möminye ompö akwa chi nyo tïng könyis tömönut odeny kutok nyo itöy koronini,

³⁰wölo möminye ye nyu chi ompö akong nyo itöy koronini kyoyomisön lö omöngekwa, kïpoto Kalep wero Yepune nko Yoswö.

³¹Wölo opan monekwa, chï olentekwa lïku naman, ntökwit koronï kataghakwa, akïlïku korengwa.

³²Wölo omeghyechinekwa cho le akwa surkwen.

³³Lïku monekwa mösöw ompö surkwen könyis tömönut angwan akuwongu ompöwölo kimotïngetekwanye kighanat, ntökïtenö kïma nyo pö söröm ompö akwa.

³⁴Onyorukwa nyarïl ompö könyis tömönut angwan akwompö ghöyïnto ngokikwa, lïku asis akong köny akonga kïrïp kegh nko osiswechini le tömönut angwan kyaghotakwa kore, atosöwunökwa lö gha nyoman kelelchï ECHOTYON.’

³⁵Ani ECHOTYON nyo kamwagh lö, oghwokwa lenyoni akwa pïchï ghach kotuyekwa aghwanïn ghöyityö, omeghyechinekwa surkwenï lömïs.”

³⁶Kipara ECHOTYON sömew pïchay kiyonta Musa kïpa kïghot koronay, wölo kipu lökoy cho ghach cho kigh pich kïngwïrngwïronchï ECHOTYON.

³⁸Ompö ghotichay le taman nko odeny, Yoswö nko Kalep wero Yepune cho kingötï opïn.

³⁹Kïmwochï Musa pipö Israel ngalechay kamwa ECHOTYON, kïlokyö chane nyoman.

⁴⁰Kïngetyö nyini le tökwogha asis nyo kirïptoy akïpusta wölo le kamas akïlö, “Kïpetecha ye nyu kelïtöy koronini kimwa ECHOTYON, ompöwölo kikeghacha ngokï.”

⁴¹Wölo kïlö Musa, “Ompö ne ye nyu tolelchinökwa ECHOTYON? Melö tökumukisyot ngalechoni!

⁴²Mapa atömowonyö ompö tawu punkökwo ompöwölo möminye ECHOTYON nko akwa.

⁴³Mi tawunkwa pipö Amalek nko pipö Kanan akïrïntonokwa chane, ompöwölo melö torïpekwa ECHOTYON, nyo makïminye nyinte nko akwa.”

⁴⁴Wölo kïmak chane kïpusta kamas, kïrkegh kitomönye kïweghö Santuku Muma* möngot nko Musa.

⁴⁵Atolapay nyu kïrokï pipö Amalek nko pipö Kanan cho kimöngöy komos, akiporyeghö chane akiparata ntökwit Orma.