Read pokoot KIYITUT 15 Bible Online

KIYITUT 15 - pokoot bible

KIYITUT 15

¹Kïlenchï ECHOTYON Musa,

²lenchïnö pipö ne Israel otini katakwa kor nyo omöngekwa nyo okonokwa kïrïp ngalechï.

³Otötenekwa egh anta kech anta aran le ropöwon nyo kïpelöy anta le amöros nyo kiwalwal chi lö otötoy anta nyo kacham chi ompö mïkulöwunyi nyinte anta nyo pö ichontin cho tïlilöch, le kïgh nyo ngutoy nyo karam ompö ECHOTYON.

⁴Ipu nyu chi wawa kech le ropöwon nyo kïpelöy ompö ECHOTYON nko pïsya cho pö kilo akonga cho kikinyornyoryö nko mwaghpa nyo pö lita akonga, le ropöwo pagh nko kumi sapipun cho pö lita akonga.

⁶Anta ato makal, ketötoy pïsya cho pö kilen odeny cho kikinyornyoryö nko mwagh nyo pö nïsï lita le ropöwo pagh,

⁷nko lita akonga nko nisï cho pö dipay* ngutogh nyo pö amörosnï kï mïloy ECHOTYON.

⁸Ato kitötoy egh le ropöwon nyo kïpelöy anta amöros nyo kipuntegho kiwalwalat anta ropöwo pöghisyö ompö ECHOTYON.

⁹Ketötoy nyu tïkwïl kilen sömök cho pö pïsya cho kikinyornyoryö nko mwagh nyo pö liten odeny

¹⁰nko liten odeny cho pö dipay le ropöwon nyo kïpelöy. Ngutogh nyo pö amörosnï kïmïlöy ECHOTYON.

¹¹Kighöy nyu lenyoni ompö egh anka tïkwïl anta makal anta wawa kech anta wawa aran anka tïkwïl.

¹²Ato tösisyö kyaki cho kakïropta, kïtösisyot ropöw kïrïp kegh nko chongïntöngwa.

¹³Ighöy chi anka tïkwïl lenyoni nyo pö Israel ato tötoy ropöw cho kïpelöy le ngutogh nyo mïlöy ECHOTYON.

¹⁴Ato mi ton nyo möngöy nko akwa ato kempuröy nyo tangogh anta nyo kogh, akömököy kutoni ECHOTYON ropöwonto ma le ngutogh nyo mïloy ECHOTYON, kwighöy nyinte lenyini oghekwa.

¹⁵Kirurut kï akonga ompö akwa nko to cho omöngekwa tïkwïl, kirurut nyo pö kokay ompö pïnwöyikwa löwïr, ompöwölo kïle wölo alatekwa, kïlata choni to ompö tawu ECHOTYON.

¹⁶Karkegh kirurut nko kiyomisut cho le chikwa nko cho pö pich cho möngöy nko akwa.

¹⁷Kilenchï ECHOTYON Musa

¹⁸Kirurut cho kirïpöy pipö Israel otini ket kor nyo kitöni ECHOTYON chane.

¹⁹Akwotini kamakwa omisyö anka tïkwïl nyo kengwïna koronini, otötonekwa nyu ropöwon otöni ECHOTYON.

²⁰Ato oghekwa makatin ompö paghekwa cho tagh, otötö makatine chini tagh kïpöyitu ECHOTYON le ropöwon nyo kiwiswisöy. Oghekwa tïkwïl lenyoni ompö paghekwa cho otïghokwa ghat.

²¹Otönekwa ECHOTYON makatyan nyo pö paghekwa cho tagh le ropöwon nyo karam ompö pïnwöyikwa kokay.

²²Wölo ato alelakwa marïpa kirurutchini löwïr kimwochï ECHOTYON Musa

²³anta maghakwanye lenyini kimwochï ECHOTYON Musa kïngata otini kikonï ECHOTYON kirurut kokay ompö pïnwöyikwa löwïr.

²⁴Ato igha lelutyö ompöwölo melö kenkït pipö Israel, kutötoy nyu chane egh, le ropöwon nyo kïpelöy le ngutogh nyo mïlöy ECHOTYON nko ropöwo pagh nko dipay nko kwagha nyo pö ropöwo ngokï kïrïp kegh nko kirurut.

²⁵Ighöy nyu tïsin linyogh ompö pipö Israel atökelöstoghchï, ompöwölo kilel chane, ipu nyu chane ropöwontengwa nyo kipelöy nko ropöwo ngokï ompö tawu ECHOTYON.

²⁶Kïmötoghchini pipö Israel löwïr nko to cho möngöy nko chane, ompöwölo kilel chane löwïr.

²⁷Ato igh chi ngokï amelö ompö kwötyin, kïroptoy nyinte söpölyon nyo tïng köny akonga le ropöwonto ngokï.

²⁸Ighöy nyu tïsin linyogh ompö tawu ECHOTYON atökutïlil chichay kalel otini kegh ngokï amenkïtï, atökelöstoghchï ngokichi.

²⁹Kirurut kï akonga ompö chi nyo kegh ngokï amelö ompö kwötyin, ato kö chi pö Israel anta ton nyo möngöy nko chane.

³⁰Wölo chi nyo ighöy ngokï ompö kwötyin, ato kö chito kore anta kö ton, keyono chichona kwenu pikökwa ompöwölo kemwa ECHOTYON.

³¹Ompöwölo kasas ngölyonto ECHOTYON akïtïl kirurutkachi ompö kwötyin, mi parakunyi ghöyityenyi.

³²Otini kitö kimi pipö Israel surkwen, kenyorï chi asakonga nyo kilöy kwen ompö asispa Sapato.

³³Kemït nyinte wölo mi Musa nko Aron nko pipö Israel löwïr.

³⁴Kerip nyinte ompöwölo kitomönye kenkïtï kïgh nyo kidoy nyinte.

³⁵Kïlenchï nyu ECHOTYON Musa, “Mïchini kepar chichoni, wiro pipö Israel löwïr nyinte koghïn ompö sanypa möngot.”

³⁶Kumït nyu pipö Israel löwïr nyinte sanypa möngot akïwira nyinte koghïn le ato kimwochï ECHOTYON Musa.

³⁷Kïlenchï ECHOTYON Musa,

³⁸“Mwochinö pipö Israel kïnöpchï sowow sïrokökwa kelyön, akïnöpchï pörköyö nyo orus, agh lenyoni ompö pïnwöyikwa löwïr.

³⁹Atö kilïku sowowchoni kinonut ompö akwa. Otini kasïwekwa ananakwa ngalechan akonyït, tömarïpakwa kinonut pö mïkuliskökwo nko pïrchin pö konyikwo.

⁴⁰Nonwekwa nyu sowowchï arïpakwa kirurutköchan alïkukwa chichan kokay.

⁴¹Ochan ECHOTYON Tororötïnkwa nyo kyamïtunenekwa koro Misri, atö alïkwan Tororötïnkwa. Ochan ECHOTYON Tororötïnkwa.”