Read pokoot KIYITUT 16 Bible Online

KIYITUT 16 - pokoot bible

KIYITUT 16

¹Kinam kegh asistanka Kora wero Isar nyo pö ka Koat ompö ara Lawi nko pich sömök cho pö ara Rupen, Datan nko Apiram nko werpö Elyap nko On wero Pelet

²atolapay kïtagh Musa. Kitagh tïkwïl kintöghoghi Israel cho le 250 cho ororöch.

³Kipka löwïr tawu Musa nko Aron akïlenchï chane, “Kapekwa tya! Pö pïchï löwïr ECHOTYON, akï mi ECHOTYON nko acha löwïr. Ompö ne nyu tosïtökwa kegh parak ompö pïchï pö ECHOTYON löwïr?”

⁴Nyini kilïm Musa ngalechï, kïkïtïng akïsagh

⁵akïlenchï Kora nko pich cho kimi nko nyinte, “Porwecha asïyech tökwoghö ECHOTYON lö ngo nyo le nyenyi, akï ngo nyo tïlil, ighöy ECHOTYON chichoni, kïrikyï nyinte.

⁶Acheng asïyech tökwoghö nököghon nyi nko piköku

⁷atö ngeset ori nko tïkwïn cho ngutoy cho onyïn asït ato kïpelo amöros. Atökenkïtunö lö ngo ompö acha nyo kikïkïl ECHOTYON, kyapekwa tya we pipö Lawi!”

⁸Kïlenchï Musa Kora, “Atere nyu werpö Lawi!

⁹Ononekwa so lö kïgh nyo mïnïng, otini kakïlekwa Tororöt pö Israel ompö kwenu pipö Israel atö arikakwa nyinte apöghisyeghekwa Ema nyo mi ECHOTYON* apöghisyechï pipö Israel löwïr?

¹⁰Kikwighekwa ECHOTYON orikyïnö nyinte nko werkökwa löwïr cho pö Lawi, tomökekwa ye nyu olïkune tïsï tïkwïl!

¹¹Kïlenyona kaghakwa kïgh nyo töghöy ECHOTYON otï ghamït kegh söpïchï, ngo Aron nyï kongwïrngwïronchikwa nya?”

¹²Kïyonta Musa chi kïkurï Datan nko Apiram, wölo kïlö chane, “Mökïpkonechanye.

¹³Ilentenyi so kïgh nyo mïnïng nyini kimïtunechanyi kor nyo yintegho chö nko kumat, atetïghecha ompö surkwen? Akwanyï imökenyi ye lïkune kirwokintencha?

¹⁴Amelö kemïtechanyi ompö Keta kor nyo yintegho chö nko kumat atomönye konechanyi paren nko pareni sapipun kemïla, ilentenyi ye so olïsecha? Mökïpkonechanye.”

¹⁵Kïnarek Musa akïlenchï ECHOTYON, “Mecham ropöwo pïchï. Möminye kïgh nyo gha nyo koghchan chane, amöminye ompö sïkïryö akong nyo kachengan chane.”

¹⁶Atolapay kïlenchï Musa Kora, “Ingwïn asïyech nko söpïchtöngu nko Aron tawu ECHOTYON.

¹⁷Ipu chi tïkwïl ompö akwa töwutyenyi akutö tïkwïn cho ngutoy cho onyïn atökutöteghö ato kïpelo amöros.”

¹⁸Kïcheng chi tïkwïl töwutyenyi akutö ngeset ori nko tïkwïn cho ngutoy cho onyïn akughyongo kuka Ema nko Musa nko Aron.

¹⁹Atolapay kutuyö Kora pïchay löwïr akughyongö tawu Musa nko Aron ompö kuka Ema nyo mi ECHOTYON. Panini lawel kungwïnchï chane löwïr ororyo ECHOTYON,

²⁰atolapay kïlenchï ECHOTYON Musa nko Aron,

²¹“Osirenö kegh pïchï atö awangan chane lömïs ato mölownye.”

²²Kïkïtïng Musa nko Aron akïlö, “We Tororöt, ichinyi Tororöt nyo pö söpon, ato igh chi akong ngokï, inörekyinyi pich löwïr?”

²³Kïlenchï ECHOTYON Musa,

²⁴“Mwochinö pich owuwenö atolekïtö möngo Kora nko Datan nko Apiram.”

²⁵Kïwö nyu Musa nko poyi Israel wölo mi Datan nko Apiram.

²⁶Akïlenchï pich, “Owuwenö wölo mi Emeni pïchï ghach amaswany tïkukwa atömomeghö ompö ngokikwa.”

²⁷Kïwuwö nyu pich atolekïtö emeni Kora nko Datan nko Apiram, kungwïn Datan nko Apiram akughyongö kukoti emenikwa nko korukwa nko monekwa.

²⁸Kïlö Musa, “Onkïtukwa ye nyu lö, ECHOTYON nyo keyokwanïn agh tïkuchï löwïr, melö kaghan ompö machatenyan.

²⁹Ato meghö pïchï le ataye kömegho pich, amönyorïnye sitöt kungwïna wölo mi Tororöt, kï melö keyokwanïn ECHOTYON.

³⁰Wölo ato igh ECHOTYON kïgh nyo kitomönye kelïm, akïyata ngwïnya akulum chane nko tïkukwa akïröytö chane ngwen kïsöpchot, atonkïtunökwa nyu lö kasas pïchï ECHOTYON.”

³¹Nyini kiwang Musa ngalechï kïyata ngwïnya atay kimi Datan nko Apiram,

³²akulum chane nko tïkukwa löwïr nko pipö Kora nko tïkukwa.

³³Kïlenyona kïröytö chane ngwen kïsopchot nko tïkukwa akulum ngwïnya chane kuwonyechï wölini.

³⁴Kïryagh pipö Israel löwïr cho kimi atoni otini kilïm riratengwa akïlö, “Keryagha atömelumech ngwïnya tïkwïl!”

³⁵Kuyokwï ECHOTYON ma nyo kipel pïchay le 250 kitïng tïkuchay ngutoy cho onyïn.

³⁶Atolapay kïlenchï ECHOTYON Musa,

³⁷“Mwochinö Eleasar wero Aron tïsin, kïcheng törenichay mi kwenu pïchay könöghö aistö ngesetkö, ompöwölo tïlilöch törenichoni,

³⁸kitïlilöchitu ompöwölo kikitöteghö ato kïpelo amöros. Kïlenyona chenga töreni pïchï cho kikïtïgh akwompö ngokikwa aitang le sanin cho kïkörtegho atekarteghena ato kïpelo amöros. Lïku nyu nyoni kiporunöt ompö pipö Israel.”

³⁹Kïcheng Eleasar Tïsin törenichay akïkany ketang le sanin cho kïkörtegho ato kïpelo amöros.

⁴⁰Kilïkwï nyoni kinonut ompö pipö Israel atö mömi chi nyo melö pö ara Aron nyo ngwïnöy kïpelchini ECHOTYON tïkwïn cho ngutöy cho onyïn ompö ato kïpelo amöros. Atömökighchï le Kora nko pikachi, le ato kimwochï ECHOTYON Eleasar kuwerï Musa.

⁴¹Wölo kïngwïrngwïronchï pich Musa nko Aron ompö asis nyo kirïptoy kïlentöy, “Kaparakwa pipö ECHOTYON.”

⁴²Akwotini kituyö kegh pich akïsyölchï Musa nko Aron, kïwöghökisyö kïparta okumpö Ema nyo mi ECHOTYON, kïlö kiros kilum polta Emanay akungwïnchï ororyo ECHOTYON.

⁴³Kïwö Musa nko Aron kutang tawu Ema nyo mi ECHOTYON,

⁴⁴kïlenchï nyu ECHOTYON Musa,

⁴⁵“Ngetena kwenu pïchï atö awangan chane ye.” Kïkïtïng Musa nko Aron,

⁴⁶akïlenchï Musa Aron, “Chenga aitö ngeset ori ompö ato kïpelo amöros, atolapay itö tïkuchay ngutoy cho onyïn parak aiwö lawel wölo mi pich aitïlil chane, ompöwölo kikïnyala ECHOTYON akikutor sömewö.”

⁴⁷Kwigh nyu Aron lenyini kimwochï Musa, akurïp lawel wölo mi pich, wölo kikikutor sömewonay kwam pich, kïropta tïkuchay ngutoy cho onyïn ompö paraku pïchay akutor kutïlil pich.

⁴⁸Kughyongö nyu nyinte kwenu pich cho kimeghö nko cho sötote, kuwonyö nyu sömewonay.

⁴⁹Pich cho kitïgh sömewö kï 14,700, Kisis chay kimeghö nko Kora.

⁵⁰Kïkany kuwonyö sömewö, kimïla Aron wölo mi Musa ompö kuka Ema nyo mi ECHOTYON.