Read pokoot KIYITUT 18 Bible Online

KIYITUT 18 - pokoot bible

KIYITUT 18

¹Kïlenchï ECHOTYON Aron, “Nyi nko werköku nko pipö Lawi cho opoy ngoki cho rumunö ighisyö nyo pö Ema, wölo nyi nko werköku cho opoy ngoki cho rumunö ighisyo Tïsintön.

²Mïtuna pikökwa cho pö ara pipö Lawi atökïpöghisyö nko nyi akungarakïn ato iminyi nko werköku ipöghisïyi ompö Ema nyo mi ECHOTYON.*

³Pöghisyewokwa chane akwigh pöghisyewut walaka ompö Ema, wölo mörikyïninye chane karïn cho mi wölay Tïlil Tya anta ato kïpelo amöros, atömömeghö chane nko akwa tïkwïl.

⁴Ighöy chane ighisyö nko akwa akïrip ighisyö anka tïkwïl nyo mi Ema, möminye chi anka nyo pöghisïyi nko akwa.

⁵Ighöy nyi nko werköku ighisyö ompö wölay Tïlil tya nko ato kïpelo amöros atömönörekyï ECHOTYON ngat pipö Israel.

⁶Ani nyo kakïl werkökwa pipö Lawi ompö kwenu pipö Israel, ropöw chane ompö nyi, cho kakitö chane ECHOTYON atökïpöghisyö ompö Ema.

⁷Wölo nyi nko werköku opïn cho opöghisïyi le tïsï ompö ato kïpelo amöros nko ompö Wölo Tïlil Tya.* Kokonokwa pöghisyo tïsintön le ropöwon, atorikyï chi kïtïkon karichay tïlilöch, ketïghöy.”

⁸Kïlenchï nyu ECHOTYON Aron, “Kyokoninyi ropöw cho kikekonanïn cho kikekïl, kokoninyi nko moneku kïlïkwï karerantönkwa kokay.

⁹Lïku chï chikwa ompö ropöw cho tïlilöch tya, ropöwo pagh nko ropöwo ngokï nko ropöwo ghaktay, kïgh anka tïkwïl nyo tïlil nyo kakïropkanïn, kïlïku nyengu nko werköku.

¹⁰Omokwa nyu chï wölay tïlil tya, omöy monïngö cho le wor opïn, tïlilöch chï ompö akwa.

¹¹Kokonakwa tïkwïl ropöw cho kiwiswisöy cho konanïn pipö Israel, nyi nko moneku cho le wor nko tipïn ompö osiswekwa löwïr. Omöy chi anka tïkwïl nyo kiketïlil ompö akwa.

¹²Okonokwa tïkwïl mwada nyo karam nko dipay* cho karamach nko paghe cho potagh cho karamach cho ropchini pich ECHOTYON.

¹³Chikwa löwïr, chi tïkwïl nyo tïlil ompö akwa kwomöy.

¹⁴Kïgh anka tïkwïl nyo kikengot ompö Israel kï nyengu.

¹⁵Poret anka tïkwïl nyo pö chi nko twatan anka tïkwïl nyo pö kïgh nyo satate nyo kïropchini ECHOTYON kï lïku nyengu, wölo iolenyi poret nyo pö chi nko nyo pö tyony nyo le sïmnyon.

¹⁶Kyolo nyu ropïyeni silpa cho le mut, kïrïp kegh nko ropïyen cho kikïpöghisyegho ompö asisoni.

¹⁷Wölo molönye chi twatan cho pö tïch nko kechir nko ngaror ompöwölo tïlilöch chane akïlïku amörostin. Isonenyi kisönkökwa ato kïpelo amöros, airopta sunetkö le ropöw ompö ma, le ngutogh nyo mïlöy ECHOTYON.

¹⁸Lïku chikwa panye, pempö takat nyo pö chat pö okumpö tagh cho kitötoy le amöros pö kiwiswisöt.

¹⁹Okoninyi nko werköku nko tipiku, ropöw löwïr cho karamach cho konanïn pipö Israel kokay. Nyï kï muma* nyo pö kokay nyo le nyinyan nko nyi nko moneku.”

²⁰Atolapay kïlenchï ECHOTYON Aron, “Möminye kïgh nyo imïlenyi amöminye korö nyo inyorunyi. Ochan karerantöngu achan mïlatengu ompö pipö Israel.”

²¹Kïlö ECHOTYON, “Kyotönön pipö Lawi kareran pö taman anka tïkwïl nyo pipö Israel kïlïkwï mïlatengwa, ompö ighisyengwa nyo ighöy ompö Ema nyo mi ECHOTYON.

²²Melö riköy nyu pipö Israel walaka Ema nyo mi ECHOTYON atomanam ngokï akïmeghö.

²³Wölo pipö Lawi cho pöghisïyi ompö Ema nyo mi ECHOTYON akï nömöy chane ngokikwa, lïku nyï kirurut pö kokay ompö monekwa tïkwïl. Amöminye mïlata nyo nyoru pipö Lawi ompö kwenu pipö Israel.

²⁴Ompöwölo kyotönön chane kareranpa taman nyo konanïn pipö Israel le ropöwon nyo karam kïlïkwï mïlatengwa. Kïlenyona mötïngcha chane mïlat ompö kwenu pipö Israel.”

²⁵Kïlenchï nyu ECHOTYON Musa,

²⁶“Lenchinö pipö Lawi, otini konyorukwa kareranpa taman ompö pipö Israel nyo kikonokwa ECHOTYON kïlïkwï mïlatenkwa, oropchinekwa ECHOTYON kareranpa taman ompö ori.

²⁷Kiyitöy nyu ropöwechoni le pagha ngorin chini tagh nko dipay.

²⁸Kilenyona otötokwa lenyoni ropöw cho pö ECHOTYON ompö kareranpa taman cho konokwa pipö Israel, atolapay otönökwa Aron ropöwechï.

²⁹Ompö ropöwechini löwïr onyorukwa, oroptokwa nyu cho karamach akïtïlilöch.

³⁰Kilenyona ilenchininenyi chane, otini karoptekwa cho karamach ompö ropöwekwa löwïr, kipöyitu pipö Lawi chinö köngötï.

³¹Omekwa nyu nko monekwa chinö köngötï ompö wop anka tïkwïl, ompöwölo pö choni ighisyenkwa nyo oghekwa ompö Ema nyo mi ECHOTYON.

³²Amelö tökïnömokwa ngokï, ato karoptekwa cho karamach ompö löwïr. Wölo orip kegh nyu atömosïmnyon ropöwechoni tïlilöch pö pipö Israel ato amakwa kïtömö keropchï ECHOTYON ropöwe cho karamach, tömomeghö.”