Read pokoot KIYITUT 19 Bible Online

KIYITUT 19 - pokoot bible

KIYITUT 19

¹Kïlenchï nyu ECHOTYON Musa nko Aron,

²“Nyï kï kirurut nyo kamwa ECHOTYON. Omwochinö pipö Israel kïkonï mösör nyo pïrir nyo tenate akï lïpop, nyo tomönye kerötyï mïchoki,

³atökwa Eleasar nyo le tïsin. Kïkötöy nyu mösöru kutang sanypa möngot akeyeng ompö tawin Eliasar.

⁴Chengöy nyu Eleasar tïsin kisönko mösor akwistö kutang tawu Ema nyo mi ECHOTYON* kïnyïl mut nko odeny.

⁵Kïpelöy nyu mösöru kïmïkul nko menyonte nko kisönkö nko eghyante ompö tawu tïsin.

⁶Atolapay kïcheng tïsin törokwö nko rötutyo ket cho kïkuro isop* nko pörköy cho pïröch akïwirchï mayay kipelo mösör.

⁷Atolapay kuwun Tïsin sïrokachi nko portanyi atökumï kïlït möngot, akïlïku nyinte sïmnyon ntökwit mönon.

⁸Chi nyo kapel mösör, kuwunöy sïrokachi nko portanyi, akïlïku nyinte sïmnyon ntökwit mönon.

⁹Römöy chi nyo melö sïmnyon areniko tany, akutö ato karam ompö sanypa möngot atö keror ompö pipö Israel löwïr atö ketasta pögho kitïlilöt cho chengöy ngokï.

¹⁰Akï chi nyo karam arenichoni, kömïchini kuwun sïrokachi, akïlïku sïmnyon ntökwit mönon. Nyï kï kirurut nyo pö kokay ompö pipö Israel nko to cho möngöy nko chane.

¹¹“Chi nyo kanam mïntïrïch, kïlïku sïmnyon ompö osis mut nko odeny.

¹²Mïchini kuwun kegh nyinte, ompö asispa sömök nko asispa mut nko odeny atökïtïlilit, wölo atometïlilnye kegh nyinte ompö asispa sömök nko nyo pö mut nko odeny, kïmötïlilitunye.

¹³Atonam chi mïntïrïch ametïlilnye kegh, kusïmnyonöy Ema nyo mi ECHOTYON akepesyegho pipö Israel. Lïku chichoni sïmnyon kokay ompöwölo tomönye keso nyinte pögho kitïlilöt.

¹⁴“Atomeghchï chi Ema, kïlïku sïmnyon chi tïkwïl nyo kömi ori nko nyo kölïtï ori ompö osis mut nko odeny.

¹⁵Nko karïn lapay cho melö kökörote kutïwa, cho mi Ema.

¹⁶Atonam chi nyo kakïpar anta nyo kama kwïle ompö sany anta nam chi kowo chi anta pïrïmpo chi kïlïku sïmnyon ompö osis mut nko odeny.

¹⁷Ompö pich cho le sïmnyon, kïchengu aren cho pö amöros nyo kakïpel aketasa pögh cho yintoy.

¹⁸Atolapay kïcheng chi nyo melö sïmnyon isop akulut pögh akwisö Ema nko tïkwïn tawin cho mi ori nko pich cho mi ori nko chi nyo kinam mïntïrïch anta kowö anta pïrïm.

¹⁹Iso nyu chi nyo tïlil pich cho le sïmnyon ompö asispa sömök nko nyo pö mut nko odeny, atolapy kutïlil nyu chichay asisoni, kuwun nyu chichay sïrokachi akïmïlchï kegh pögh akïtïlilit atoröytö asis.

²⁰“Wölo chi nyo le sïmnyon ametïlilnye kegh, keyono kwenu pipö Israel ompöwölo mesönye chi nyinte pögho kitïlilöt. Sïmnyonöy chi nyo lata nyoni Ema ECHOTYON.

²¹Lïku nyï kirurut ompö akwa kokay, mïchini kuwun chi sïrokachi nyo istoy pöghechay pö kitïlilöt akï chi nyo nömöy pögho kitïlilöt kïlïku sïmnyon ntökwit mönon.

²²Kïgh anka tïkwïl nyo kanam chi nyo le sïmnyon kïlïku sïmnyon, akwato nam chi anka kïyoni, kïlïku nyinte sïmnyon ntökwit mönon.”