Read pokoot KIYITUT 20 Bible Online

KIYITUT 20 - pokoot bible

KIYITUT 20

¹Kwit pipö Israel löwïr surkwen pö Sin arawa tagh akïmang Kades, kïröpösyï Miriam Kades, akerorchï wölini.

²Kimöminye nyu pögh cho pö pich, kighamït kegh pich akwompö paraku Musa nko Aron

³akïngwïrngwïronchö lö, “Kitö ngwangwa kemeghenöcha nko werköcha ompö tawu ECHOTYON ompö Ema.

⁴Ompö ne tamïtunakwa söpïchï pö ECHOTYON surkwenï? Atökemeghyenö nko kyakicho?

⁵Ompö ne tamïtunenechakwa Misri kepkana koronï gha le nyï mömi kïgh nyo rïro? Möminye pagh nko makany nko sapipun nko makumanka* amöminye ompö pögh tïkwïte cho kïgheghöy.”

⁶Kïngeta nyu Musa nko Aron söpïch pö Israel akutang kuka Ema nyo mi ECHOTYON* akïkïtïng. Kungwïnchï chane ororyo ECHOTYON.

⁷Kïlenchï ECHOTYON Musa,

⁸“Chenga lïkïyay ompö tawu ECHOTYON aituyö pïchï löwïr, nyi nko Aron aingölonchï ghatyaninö ompö tawungwa ato kipkana pögh ghatyanini cho gheghöy pïchï nko kyakikwa.”

⁹Kïwö Musa kïcheng lïkïyay ompö tawu ECHOTYON lenyini kömwochï ECHOTYON.

¹⁰Kighomityï Musa nko Aron pipö Israel tawu ghatyanay akïlenchï chane, “Atere kon penyichï, kimukecha so kekonokwa pögh ompö ghatyanï?”

¹¹Atolapay kïsyol Musa ewunyi akulïwö lïkïyay ghatyanay kïnyïl odeny, kïpka pögh cho kigha pïchay nko kyakikwa.

¹²Kïlenchï ECHOTYON Musa nko Aron, “Ompöwölo melö kaghananïkwa aparta ororyenyan ompö tawu pipö Israel, momïtekwanye nyu pïchï ntökwit kor nyo kyoyomisön lö otönan chane.”

¹³Kighisyö choni ompö pögho Meripa, wölay kingwïrngwïronchineghö pipö Israel ECHOTYON, akuporchï ECHOTYON chane tïlilyenyi.

¹⁴Kïyonta Musa pich ompö Kades kïpa wölo mi pöytoghinto Edom, akïlenchï, “Chï kï werkökwa pipö Israel. Inkïtönyi kömpölelut cho kikïnyorucha,

¹⁵ainkïtönyi wölo kipetïta papotïnecha Misri akemangacha Misri nyo kogh, kuchopecha kong pipö Misri nko papotïnecha,

¹⁶akï otini kikïlokyicha ECHOTYON, kïlïm lokecha akuyokï malaykayan nyo kimïtunenecha koro Misri, kïmicha ye nyu Kades kanasyan nyo mi rotyengu.

¹⁷Kïsomecha ye nyu lö pïswecha kewera korengu, acha nko kyakicha, amökiwerechanye paren anta pareni sapipun amökïgheghechanye pögheku, kiwerecha or akonga melö kïmostocha okumpö tagh anta akumpö löt ntöketïlacha korengu.”

¹⁸Kïlö Edom, “Mochömwokwanye awera korencha. Kwato amwaghakwa lö kiweröy, ongwïnan oporyeghenokwa nyo mötïny.”

¹⁹Kïlenchï pipö Israel nyinte, “Kiwerecha or akonga onkït, kïnyïl ato kïgheghacha nko kyakicho pögheku, keghokucha, wölo nya keweracha kwïle.”

²⁰Kïlö Edom, “Memukonye awerakwa, kïpka lenyini pipö lïk kïporyö.

²¹Kilenyona kïwöghökisyö pipö Israel akïpa ore anka ompöwölo kitagh Edom kuwer chane korenyi.”

²²Kïpegha pipö Israel Kades ntökwit kutïng pö Or rotyo Edom.

²³Kïlenchï ECHOTYON Musa nko Aron ompö kutïng pö Or rotyo Edom.

²⁴“Metönye Aron kor nyo kyoyomisön lö otönan pipö Israel, meghöy nyinte ompöwölo kyapenyakwa ngölyontenyan ompö pögho Meripa.

²⁵Mïta Aron nko werïnyi Eleasar kutang kutïng pö Or,

²⁶aingwïs sïro pö Aron cho pö tïsintön ailokyï Eleasar, ompöwölo meghchini Aron wöloni.”

²⁷Kwigh Musa lenyini kimwa ECHOTYON, kïpa kutïng pö Or kïsïwïyi pipö Israel löwïr.

²⁸Kïngwïs Musa sïro pö Aron cho pö tïsintön akulokyï Eleasar, kïmeghchï Aron kutïng parak, kïrökï nyu Musa nko Eleasar ompö kutïngay.

²⁹Nyini kïsöwï pipö Israel löwïr lö kikïma Aron, kïlokyö chane löwïr ompö osis tömönut sömök akwompö nyinte.