Read pokoot KIYITUT 21 Bible Online

KIYITUT 21 - pokoot bible

KIYITUT 21

¹Nyini kilïm chichï pö Kanan pöytoghinto Arad nyo kimöngöy Nekep* lö kipkonöy pipö Israel kuweru Atarim, kïwö kïporyeghö chane akïnam walaka.

²Kuwolwolchï pipö Israel ECHOTYON lö, “Ato imuktewechanyi kerïntena pïchï, onyoran kanastinekwa nyoman.”

³Kïterchï ECHOTYON chane akutö kïrïnta pipö Kanan, kïpar pipö Israel chane akunyar kanastine, kekurö kaynata atoni Orma.

⁴Kïngeta pipö Israel kutïng pö Or akutang Nanam nyo pïrir, kuwit rotyo Edom, wölo kïmeghö pich mutïnö ompö or.

⁵Kïngwïrngwïronchï pich ECHOTYON nko Musa akïlö, “Ompö ne tamïtunenechakwa Misri kepkana kemeghyechinö surkwen wölo möminye omisyö anta pögh. Kikulilecha ompö omisyonï, lenye kwïle!”

⁶Kuyokwï ECHOTYON moroyut cho ghach kïlït kwenu pich, kïsïr pich kïmeghö pipö Israel cho chang.

⁷Kïpka pich wölo mi Musa akïlenchï, “Kakighacha ngokï otï kakïngalanecha ECHOTYON nyo gha nko nyi, sagha ECHOTYON atökïchengenecha moroyut chï.” Kïsagh nyu Musa ECHOTYON ompö pich.

⁸Kïlenchï ECHOTYON Musa, “Igha moroyo karïn aikach sökotïn, chi anka tïkwïl nyo kasïr moroya akïtopön moroyononi kïsöpöy.”

⁹Kilenyona kwigh Musa moroyo tay akukach ket nyo sakate, chi anka tïkwïl nyo kasïr moroya akïtopön moroyo tay kïsöpöy.

¹⁰Kïwï pipö Israel akïpa kïmang Opot.

¹¹Akïwuwö Opot, kïpa kïmang Aparim ompö surkwen kongasispa rotyo Moap.

¹²Kïwuwö atoni akïpa kïmang mpöghoghyo Sered.

¹³Kïngeta atoni akïpa kïmang Arnon wölona ompö surkwen nyo köwö ntökwit rotyo pipö Amori, mi Arnon kwenu rotyot nyo pö Moap nko pipö Amori.

¹⁴Nka nyay ngölono Kitapu Poryotïno ECHOTYON, “Kanasyanta Waep nyo mi Supa nko mpöghoghöyi Arnon,

¹⁵nko wölo kïröytegho ompö mpöghoghöyi choni kipa ntökwit kanasyanta Ar, akutang rotyo Moap.”

¹⁶Kïwuwö atoni kïwuchï Peer kö pö pögh, wölo kimwochineghö ECHOTYON Musa lö, “Ghamïta pich löwïr atotönön chane pögh.”

¹⁷Kitum nyu pipö Israel tumï, “Kosunö we kompa pögh, töketumchinöcha!

¹⁸Kö pö pögh nyo kipal pöytoghï. Nyo kipal kintöghoghi pich, kïpala lipö paytagh nko lïkipkökwa.” Kïwuwö surkwen akïpa ntökwit Matana.

¹⁹Kïngeta Matana ntökwit Naaliel, kïngeta Naaliel ntökwit Pamot,

²⁰kïngeta Pamot ntökwit mpöghogh nyo mi koro Moap ntökwit kutïng pö Piska parak pörtoy okumpö surkwen.

²¹Atolapay kïyonta pipö Israel pich wölo mi Sion pöytoghinto Amori kïlenchï,

²²“Pïswecha kewera korengu, acha nko kyakicha amökiwerechanye paren anta pareni sapipun amökïgheghechanye pögheku, kiwerecha or akonga pat ntöketïlacha korengu.”

²³Wölo kïtagh Sion kuwer pipö Israel korenyi, kutuyö pikachi löwïr akïwö kutang Yaas wölnö le surkwen akïporyeghö pipö Israel.

²⁴Wölo kïpar pipö Israel pikachi cho chang akïcheng kore kïngeta lalwa Arnon ntökwit Yapok nko koro pipö Amon, wölo kiripote tya rotyo pipö Amon.

²⁵Kïcheng nyu pipö Israel kanastina pipö Amori akïpayta ompö Espon nko kanastine walaka cho mïnkech.

²⁶Espon kï kanasyanta Sion pöytoghinto pipö Amori nyay kiporyegho pöytoghinto Moap akïchenga kore ntökwit lalwa Arnon.

²⁷Kïlenyona kitum tumicha lö, “Apkana Espon, nya ketek ngat. Nya kughyö Sion.

²⁸Kinagh asistanka Espon, kinam ma kanasyanta Sion. Akunyar kanasyanta Ar nyo pö Moap nko yetïntino roroköyi Arnon.

²⁹Heywey Moap! Kyowonyekwa cho osoghöy Kemos! Kigh werkachi pïnot, kïlïkwï tipichi naman ompö Sion pöytoghinto Amori.

³⁰Kikuwonyö monekwa, kïngeta Espon ntökwit Dipon. Akïngeta Nasyin ntökwit Nopa nyo lekïto Medepa.”

³¹Kïmang nyu pipö Israel koro Amori.

³²Kïyonta Musa pich kïghot Yaser, kïnam pipö Israel Yases nko kanastine cho mïnkech akïyon pipö Amori cho kimi wölini.

³³Atolapay kïwöghökisyö pipö Israel akïpa kutang Pasyan, kungwïn Ok pöytoghinto Pasyan nko pikachi atökïporyeghö chane ompö Edrey.

³⁴Wölo kïlenchï ECHOTYON Musa, “Mewagh nyinte, ompöwölo kotönön nyinte moriku nko pikachi löwïr nko kore, idonyi nyinte wölo kidenyi Sion pöytoghinto pipö Amori nyay kimöngöy Espon.”

³⁵Kïpar nyu pipö Israel Ok nko werkachi nko pikachi löwïr, möminye chi ompö akong nyo kingötï, atolapay kïmïl kore.