Read pokoot KIYITUT 22 Bible Online

KIYITUT 22 - pokoot bible

KIYITUT 22

¹Kïwï pipö Israel akïpa kïmang tömko Moap Yordan antakwagh atolekïtö Yeriko.

²Nyini kilïm Palak pöytoghinto Moap wero Sipor wölo kida pipö Israel pipö Amori,

³kïnam tapan Moap nyoman, akuwa pipö Israel ompöwölo kimöngörïcha pipö Israel.

⁴Kïlenchï pipö Moap kintöghoghi Midyan, “Wongöy pïchï tïkwïn cho mi koronï le ato omöy egh sus cho mi paren.” Ompöwölo ki pöytoghinto Moap Palak wero Sipor osiswechoni,

⁵kïyonta nyu pich kïpa wölo mi Palaam wero Peor nyo kimi Petor atolekïtö lalwa Yuparet ompö koro Amaw akïlenchï, “Achï pich cho kapkana koro Misri, akinyïghï chane wop tïkwïl akïmököy kïchengöy kore.

⁶Chang chane kïtïlecha, kïlenyona nyonö lawel atechïpkante pïchï, ompöwölo owesöch chane kïtïlecha atökemukacha ana kerïntena chane akeyona kore, ompöwölo onkïtön lö nyo kechïpönyi kïchïpoy, akï nyo kesoyönönyi kusoyöno.”

⁷Kïlenyona kïpa poyi Moap nko cho pö Midyan wölo mi Palaam akwipöy ropöw, akïmwochï nyinte ngölyonto Palak.

⁸Kïlenchï Palaam pïchay, “Oruyenö aghonete wölete atomwowokwa asïyech ngölyon nyo kamwa ECHOTYON.” Kïruyö nyu kintöghoghichay pö Moap wölini.

⁹Kungwïn Tororöt wölo mi Palaam akïtep lö, “Ngo pïchï mi nko nyi?”

¹⁰Kïlenchï Palaam Tororöt, “Keyokwï chane Palak pöytoghinto Moap wero Sipor wölo omitan lentöy,

¹¹‘Kanyïghï kore kïmïkul pich cho kapkana Misri, nyonö nyu chïpkanïn pïchï, töptoy ana omukan oporyeghö chane ayona kore.’ ”

¹²Kïlenchï Tororöt Palaam, “Metöp ntewö nko chane, amechïp pipö Israel, ompöwölo soyönote chane.”

¹³Kïnget Palaam tökwoghö akïlenchï pïchay pö Palak, “Omïlisyenö korengwo ompöwölo katagh ECHOTYON owan nko akwa.”

¹⁴Kïmïlisyö pïchay pö Moap akïlenchï Palak, “Katagh Palaam kungwïn nko acha.”

¹⁵Kïyonta nyu Palak ngat kintöghoghi walaka cho chang kïtïl chay pö tagh akïkonyïtote kitïl chay potagh.

¹⁶Kïpa wölo mi Palaam akïlenchï, “Kölö Palak wero Sipor, mekany kïratïn kïgh nyonikïny, mengwïn wölo omitan.

¹⁷Okoninyi konyït nyo wow, owunyi kïgh anka tïkwïl nyo kemökenyi, nyonö chïpkante pïchete.”

¹⁸Wölo kïwöghökyï Palaam mötwori Palak lö, “Kïrökegh kïkonanïn Palak konyi nyo kinyïghï silpa nko koltin, kïmotïlanye ngölyonto ECHOTYON Tororötïnyan, nyo melö otösan anta achïchuk kïgh nyo mïnïng anta nyo wow.

¹⁹Wölo osomokwa lö oruyenö aghonete wölete, atö atepan ECHOTYON töptoy ana mi kïgh nyo sis nyo mwowanïn.”

²⁰Kungwïn chï Tororöt Palaam aghononi akïlenchï, “Ato kapka pïchï kïkurinyi, iwö nko chane, wölo igh le ato komwowunyi.”

²¹Kïnap kegh Palaam ato le asïyech, kïrat sïkïryenyi akïwö nko kintöghoghichay pö Moap.

²²Wölo kïnyala ECHOTYON ompöwölo kiwö Palaam, kughyongö malaykayanta ECHOTYON or kïkarta nyinte kïwegho otini Palaam sïkïryenyi akimi nko mötworichi odeny,

²³Nyini kisïwa sïkïryonay malaykayanta ECHOTYON kughyongo or akïnömöy chok, kïmasta kïlït wuw. Kïmuny Palaam sïkïryonay akuyokï kutïngï or.

²⁴Kughyongö malaykayantanay pö ECHOTYON or ato marich ompö para sapipun akimi nïyetwö woptine kwodeny.

²⁵Nyini kisïwa sïkïryonay malaykayantanay pö ECHOTYON kïyumchï kegh nayat, kïngongogh kel pö Palaam nayatunay, kïmuny Palaam sïkïryonay ngat.

²⁶Kïwö malaykayantanay pö ECHOTYON tagh ngat, akughyongö or ato marich ato kimemukonye kewöghökisyeghö ketang ewu tagh anta ewu löt.

²⁷Nyini kisïwa sïkïryonay malaykayantanay pö ECHOTYON, kïrï ngwïny, kïnyala Palaam akïmuny sïkïryonay.

²⁸Kïngany ECHOTYON kuti sïkïryonay, kïngalan kïlenchï Palaam, “Kaghunyi ne temunganinyi le nyï kïnyïl sömök?”

²⁹Kïlenchï Palaam sïkïryonay, “Ompöwölo kepirönenaninyi, ntökotïngetan chok kötökaparinyi.”

³⁰Kïlenchï sïkïryonay Palaam, “Mochanye so sïkïryengu nyo keweghonyi chik? Mi ato kyawunyi le nyete asistanka?” Kïlö Palaam, “Ewo.”

³¹Kïngany ECHOTYON konyi Palaam kïsïwa malaykayanta ECHOTYON kughyongo or akïnömöy chok, kungïrukö Palaam akïkïtïng.

³²Kïlenchï malaykayantanay pö ECHOTYON Palaam, “Ompö ne temungönyi sïkïryengu le nyï kïnyïl sömök? Ani nyo kangwïn akarta orengu, ompöwölo ghach ortïneku ompö tawunyan.

³³Kasïwanïn sïkïryengu, akïmörkölo kutang kamas kïnyïl sömök. Ntömö kigh lenyoni, kötökyaparinyi apïstan sïkïryonï.”

³⁴Kïlenchï Palaam malaykayantanay, “Kaghan ngokï ompöwölo melö konkïtön lö, keghyongenyi or ikartanïn. Ye nyu ato gha ompö nyi owan, omïlenan kaw.”

³⁵Kïlenchï malaykayantanay Palaam, “Wïyönyi nko pïchï, wölo ingalan ngölyon nyo omwowunyi.” Kïwö nyu Palaam nko pïchay.

³⁶Nyini kilïm Palak lö mi Palaam kungwïnöy, kïwö kïtarok nyinte kanasyanta Moap nyo mi sörömu rotyo Arnon.

³⁷Kïlenchï Palak Palaam, “Kilïkwï ne tömengwïnanyi atanya kyokurinyi panto tagh? Kinonenyi so lö melö omukan okonyïtinyi lasiny?”

³⁸Kïlenchï Palaam Palak, “Kangwïnan ye nyu, wölo imitenyi melö otïngetan owesyö, ongölonan pat kïgh nyo kömwowanïn ECHOTYON lö, mwagha.”

³⁹Kïwö Palaam nko Palak kutang Kiryat Usot.

⁴⁰Kïyeng Palak amöros pö egh nko kech akutö Palaam nko kintöghoghï cho kimi nyinte tïkwïl.

⁴¹Kumït Palak Palaam asis nyo kïrïpöy ntökwit Pamot Paal ato kimuköy kisïwïyi pipö Israel.