Read pokoot KIYITUT 23 Bible Online

KIYITUT 23 - pokoot bible

KIYITUT 23

¹Kïlenchï Palaam Palak, “Tekwanïn yi ato kïpelo amöros cho le mut nko odeny aikonanïn eghin mut nko odeny nko mökol mut nko odeny.”

²Kwigh Palak le ato kimwa Palaam, kïropta Palak nko Palaam egh nko makal ompö ato kïpelo amöros wölini nko wölini.

³Kïlenchï Palaam Palak, “Ghyongenö yi mi amörostöngu nyo kïpelöy, atowan aros ekungwïnöy ECHOTYON kuryomöy nko ani atomwowun kïgh anka tïkwïl nyo keporwanïn ECHOTYON.” Kïwö nyinte kïpus ato le kamas.

⁴Kuryam ECHOTYON nko Palaam, kïlenchï Palaam ECHOTYON, “Katekan ato kïpelo amöros cho le mut nko odeny, aroptan egh nko makal ompö anka tïkwïl.”

⁵Kutö ECHOTYON kuti Palaam ngölyon akïlenchï “Mïlena wölo mi Palak aimwochï ngalechï.”

⁶Kïmïla Palaam akïnyorï Palak ghyongo ataye mi ropöwontenyi nyo kakïpel nko kintöghoghi Moap.

⁷Kutor Palaam kïngalan, kïlö, “Kemïtunenanïn Palak pöytoghinto Moap, Ompö Sirya, angwïnan kutïngkoti kongasis. Kïlechanïn, ‘Nyonö chïpkanïn Yakopo, nyonö gheghchinö pipö Israel.’

⁸Ochïpan lö ne chi ato tomönye kïchïp Tororöt? Ogheghchinan lö ne chi nyo megheghchïnye ECHOTYON?

⁹Osïwïyan nyinte ompö kutïngkot kimi to, otopönteghonan chane komos. Pich cho mi opïn, amelö kiyïtïtoy punton walaka!

¹⁰Ngo nyo muköy ntökuyit chongïn pö pipö Yakopo? Chang chane nyoman tenö ngayam. Nya ameghan le chi pö man, akïlïkwï sörömunyan le nyo pö chi pö Tororöt.”

¹¹Kïlenchï Palak Palaam, “Ne nyï keghwaninyi nya? Kolentan kamïtunyi techïpö pungköchan, kwanyï ye kengwïnanyi isoyön chane.”

¹²Kïlö Palaam, “Melö so mïchinanïn amwa ngölyon nyo mwowanïn ECHOTYON?”

¹³Kïlenchï Palak Palaam, “Nyonö kepe nko ani wölo imukenyi sïwïye pipö Israel cho ngörï, techïpkante chane.”

¹⁴Kumït nyinte ntökwit pareni Sopim, paraku kutïng pö Piska, kïtek ompö atoni ato kïpelo amöros cho le mut nko odeny akïropta egh nko makal ompö anka tïkwïl.

¹⁵Kïlenchï Palaam Palak, “Ghyongenö yi mi amörostöngu nyo kïpelöy, owan aryam nko ECHOTYON ompö otinö.”

¹⁶Kuryam ECHOTYON nko Palaam, kutö ECHOTYON kuti Palaam ngölyon akïlenchï, “Mïlena wölo mi Palak aimwochï ngalechï.”

¹⁷Kïmïla Palaam akïnyorï Palak ghyongo ataye mi amörostanyi nyo kakïpel nko kintöghoghi Moap. Kïtep Palak nyite lö, “Kölö ne ECHOTYON?”

¹⁸Kutor Palaam kïngalan lö, “Palak ngeta we wero Sipor, aiter ngalechï omwoghan.

¹⁹Melö lenye Tororöt chi nyo mïröy put? Amelö lenye chi nyo wöghököy ngalechi. Ato kimwa kwighöy akupuntoy kïgh nyo kiyomis.

²⁰Kikïlenchanïn osoyönö, akikusoyön nyinte amelö towöghökan.

²¹Masïwanye ECHOTYON ghöyityö ompö Yakopo anta nyarïl ompö Israel. Mi ECHOTYON Tororötïngwa nko chane, lentöy chane pöytoghintengwa ECHOTYON.

²²Kimïtuna ECHOTYON chane Misri, tïng owesyö nyo le nyo pö so.

²³Nyoman möminye ponintön paraku Yakopo. Amöminye chesoköynön nyo muköy Israel. Ngölono pich ye nyu Yakopo nko Israel. Kïlentöy, ‘Arosa kïgh nyo kegh Tororöt.’

²⁴Köromöch pïchï le ngötïny nyo tïng wara, ngötïny mörïwönye ngwïny ntökïtenö kwam pentanyi, akïgha kisönkö.”

²⁵Kïlenchï Palak Palaam, “Mechïp, amesoyön chane.”

²⁶Wölo kïwöghökï Palaam Palak lö, “Momwowunyinye so lö, oghan kïgh anka tïkwïl nyo mwoghöy ECHOTYON.”

²⁷Kïlenchï Palak Palaam, “Nyonö kepe amïtïn woptö anka, töptoy chömunyi Tororöt chïpkaninyi chane ompö wölini.”

²⁸Kumït Palak Palaam ntökwït kutïng pö Peor parak wölo portoy okumpö surkwen.

²⁹Kïlenchï Palaam Palak, “Tekwante yi ato kïpelo amöros cho le mut nko odeny aikonanïn eghin mut nko odeny nko mökol mut nko odeny.”

³⁰Kwigh Palak lenyini kimwochï Palaam, akïropta egh nko makal ompö ato kïpelo amöros anka tïkwïl.