Read pokoot KIYITUT 24 Bible Online

KIYITUT 24 - pokoot bible

KIYITUT 24

¹Otini kisïwa Palaam lö, kimököy ECHOTYON kusoyön nyinte pipö Israel, mökïwönye Palaam kïyar chepsoköynön lenyay tagh, wölo kïparta okumpö surkwen.

²Kïsïwa pipö Israel kimang kïrïp kegh nko ortïnekwa, kïlït nyinte mïkulöwu Tororöt,

³kutor kïngalan lö, “Ngölyonto Palaam wero Peor, ngala chi nyo rosïtoy lasiny.

⁴Nyo lïmöy lasiny kïgh nyo mwoghöy Tororöt nyo sïwïyi sïwïyaghpa Kimuktoghin akurosïtoy konyichi.

⁵Karamach kïtya emeni Yakopo nya.

⁶Karkegh nko mpöghoghöy cho koghöch, anta paren cho mi lalwa kamas anta keti walaka cho ngutöy nyo karam cho kikatkat ECHOTYON, anta tarakit cho mi lalwa kamas

⁷Nyoru rop kïtenö osis, akïnyoru kösïghechi pögh cho chang. Wow pöytoghintenyi kïtïl Akak, akesölöy paytaghtanyi.

⁸Kimïtuna Tororöt chane Misri, tïng owesyö le so. Metukönye pipö punton cho le pungkachi, körpesöy koyekwa kilikwï mïrngany, akïwut chane kurel ompö kotichi.

⁹Kirï kulïpesa le ngötïny akï lata ngötïny nyo tïng wara, ngo nyo otyegho? Soyönote chi nyo soyönöy pipö Israel kï chïpote chi nyo chïpöy chane.”

¹⁰Kïnörekyï Palak Palaam nyoman akïlenchï, “Kyokurinyi nyonö chïpö pungköchan, kwanyï ye kesoyönönyi kïnyïl sömök.

¹¹Kïlenyona ngeta nyu wïyö korengu, kyomisön lö okonyïtinyi wölo katagheninyi ECHOTYON nyorunö konyït.”

¹²Kïlechï Palaam Palak, “Olentan kyomwochan piköku chay kiyokunyi wölo omitan lö,

¹³‘Kïrkegh kïkonanïn Palak konyi nyo kinyïghï silpa nko koltin, kïmotïlanye ngölyonto ECHOTYON, agh kïgh nyo karam anta nya gha ompö machatenyan kegh akï kïgh nyo kamwa ECHOTYON omwoghan lenyini.’

¹⁴“Kïlenyona rosa, kamïlan ye nyu korenyu, wölo tera omwowun kïgh nyo ighchini pïchï piköku ompö osis cho pkonöy.”

¹⁵Kutor Palaam kïngalan lö, “Ngölyonto Palak wero Peor, ngala chi nyo rosïtoy lasiny.

¹⁶Ngala chi nyo lïmöy ngala Tororöt akunkït chïreryö nyinte nyo Töror Tya, nyo sïwïyi sïwïyaghpa Tororöt Kimuktoghin, rïwotoy mu akurosïtoy konyichi.

¹⁷Osïwïyan nyinte wölo tökïlow, otopönan nyinte wölo melö lekït. Pusuno tapogh Yakopo akungwïno pöytoghintö Israel, nyo pöröy kintöghoghi Moap akuwany ara Set.

¹⁸Rïntoy Edom nko Seir akïchenga kore, tösöy tagh Israel kïrïntoy.

¹⁹Ngwïno pöytoghintö Yakopo, akuwany pich cho köngötï ompö kanastin.”

²⁰Kura nyu Palaam pipö Amalek ompö sïwïyaghtanyi akutor kïngorsyö lö, “Kipö tagh Amalek ompö punton löwïr, wölo kinyoröy kupot kokay.”

²¹Kïsïwa ompö sïwïyaghtanyi pipö Kenin akutor kïngalan lö, “Kïrkegh kïripote wölo imöngenyi, akïmi kongu ghatoy,

²²wölo kiwongöy pipö Kain, otini kanamakwa pipö Asyur.”

²³Kïngalan Palaam ngat lö, “Heywey, ngo nyo söpöy otini kegh Tororöt lenyoni?

²⁴Pkono melinö Kitim akïpar Asyur nko Eper, wölo kïpöröy chane tïkwïl.”

²⁵Atolapay kïnap kegh Palaam akïwö korenyi, kïwö Palak katanyi tïkwïl.