Read pokoot KIYITUT 25 Bible Online

KIYITUT 25 - pokoot bible

KIYITUT 25

¹Otini kimi pipö Israel kïmöngöy Syitim, kutor pich kwigh cheporesnan nko tipö pipö Moap.

²Kitach chane koruchoni ompö ichontino amörostin, ompöwölo kikïsogho tororötino pipö Moap, kyam pïchoni omisye akïkïtïngchï tororötïnekwa.

³Kunomnyö kegh Israel nko Paal* nyo pö Peor akwigh ECHOTYON kïnarek.

⁴Kïlenyona kïlenchï ECHOTYON Musa, “Chenga kintöghoghi pïchï lapay aitïgh chane kïmeghö kulïwu asis ompö tawu ECHOTYON atökïweghö nörekyo ECHOTYON pipö Israel.”

⁵Kïlenchï Musa kirwoki pipö Israel, “Tïghö chi anka tïkwïl piköku cho kikunomnyö kegh nko Paal nyo pö Peor.”

⁶Kwipï chi pö Israel akong konyi korka nyo pö Midyan kïsïwïyi Musa nko pipö Israel löwïr ato kimi chane kïlokyegho kuka Ema nyo mi ECHOTYON.*

⁷Nyini kisïwa Pineas wero Eleasar wero Aron, nyany le tïsin kïnget nko ngotïnyi akïpïstö pïchay

⁸akïrïp chichay pö Israel ntökwit konyi ori akïpar chichay nko kokonay kechïchuk nyu sömewonay kimi kuwongöy pich,

⁹wölo kikitïgh pich cho le 24,000.

¹⁰Kïlenchï ECHOTYON Musa,

¹¹“Melö tonörekyinan pipö Israel ompö kïgh nyo kegh Pineas wero Eleasar wero Aron tïsin. Katagh nyinte tororötin walaka kïpoto ani, nka nyoni manyaranye pipö Israel ompö nyölotyenyan.

¹²Kïlenyona mwochinö nyinte lö, ‘Oman muma* nko nyinte nyo pö kalya,

¹³nyinte nko monechi cho töpkonöy, lïku chane Tïsï kokay, ompöwölo kitagh pung pö Tororöt akwigh kelöstoghchï pipö Israel lelutkökwa.’ ”

¹⁴Chichay pö Israel kikïpar nko korka nyo pö Midyan kï Simri wero Salu, kintöghoghinto ara pipö Simion.

¹⁵Kikuro korkononi Kospi chepö Sur nyo kile kirwokinto Midyan.

¹⁶Kïlenchï ECHOTYON Musa,

¹⁷“Pokyinö pipö Midyan aipar chane,

¹⁸ompöwölo kilïsakwa ompö Peor nko ompö Kospi nyay kikïpar osiswechay kiwang pich sömewö ompö Peor.”