Read pokoot KIYITUT 27 Bible Online

KIYITUT 27 - pokoot bible

KIYITUT 27

¹Kïpka nyu osiswechoni tipö Selopead wero Eper wero Kiliad wero Makir wero Manase wero Yosep, kaynötut pö tipchoni kï: Mala nko Noa nko Okla nko Milka nko Tirsa.

²Kughyongö chane tawu Musa nko tïsin Eleasar nko kintöghoghï nko pipö Israel löwïr ompö kuka Ema nyo mi ECHOTYON* akïlö,

³“Kima paponcha ompö surkwen, amelö kimi kwenu pïchay pö Kora kitagh ECHOTYON, kima nyinte ompö ngokichi onkït akimötïngnye worö.

⁴Ompö ne nyu tökimach kupot kaynata paponcha ompö Israel akwompöwölo kimötïngnye worö? Okonecha mïlat ompö kwenu piko ompö paponcha.”

⁵Kwip Musa ngalekwa tawu ECHOTYON.

⁶Kïlenchï ECHOTYON Musa,

⁷“Kamwa man tipö Selopead, tönö chane mïlat ompö kwenu piko ompö papongwa, nya kïlïkwï nyingw mïlata papongwa.

⁸Mwochinö pipö Israel lö, ‘Atoma chi amötïngnye worö, otöninekwa mïlatenyi cheptanyi.

⁹Ato motïngnye tipïn, kïmïlöy werkökwa.

¹⁰Atomötïngnye werkökwa, kïmïlöy wor werkökwa.

¹¹Atomötïngnye werkökwa wor, kïmïlöy tïlyengwa nyo lekït kïlïkwï nyenyi. Ripöy pipö Israel nyï le kirurut nyo kamwa ECHOTYON.’ ”

¹²Kïlenchï ECHOTYON Musa, “Pustena kutïngï pö Aparim tetopönö koroninö otönan pipö Israel.

¹³Otini ketopönö nyi nyu, imeghenyi le werïnkwa Aron,

¹⁴ompöwölo kyotighintönchikwa kwodeny ngölyontenyan ompö surkwen pö Sin, atay kingwïrngwïrönchanïn pipö Israel löwïr ompö Meripa, ataghakwa apartena ororyenyan nyo tïlil ompö tawungwa.” Merïpa kï kö pö pögh nyo mi Kades ompö surkwen pö Sin.

¹⁵Kïsagh Musa ECHOTYON lö,

¹⁶“ECHOTYON Tororöt pö söpon, osoghinyi lö kïla chi nyo ntöghoghchini pïchï,

¹⁷nyo ntöghoghchini chane kipa poryot akuyokwï, atömölïkwï piköku kechir cho mötïnye mösöwön.”

¹⁸Kïlenchï ECHOTYON Musa, “Chenga Yoswö wero Nun, chi nyo tïng mïkulöwu Tororöt aikanagh moriku mötïnyi.

¹⁹Nya kughyongö nyinte tawu tïsin Eleasar nko pipö Israel löwïr aitö nyinte pöghisyononi ompö tawungwa.

²⁰Itönenyi nyinte owesyengu atökïterchï nyinte pipö Israel löwïr.

²¹Eleasar tïsin nyo mwochini nyinte machatenyan otini katepa ompö Urim nko Tumim.* Akï nyinte nyo mwochini Yoswö nko pipö Israel ngal löwïr.”

²²Kwigh Musa lenyini kimwochï ECHOTYON nyinte, kïkany kughyongö Yoswö tawu tïsin Eleasar nko pipö Israel löwïr.

²³Akukanagh morichi möt pö Yoswö akuyomis nyinte lenyini kimwochï ECHOTYON Musa.