Read pokoot KIYITUT 28 Bible Online

KIYITUT 28 - pokoot bible

KIYITUT 28

¹Kïlenchï ECHOTYON Musa,

²Kura lö kökonanïn ropöw ompö osiswechini kiketat ropöwo omisyö ompö ma nko tïkwïn cho ngutoy cho onyïn ompö ani, akaman lasiny kirurutchï.

³Chï kï ropöw cho otönikwa ECHOTYON kïnomnyö ompö ma, wara kechir odeny cho le mökol cho tïng köny akonga akïlïpopöch.

⁴Kïroptoy akonga tökwoghö keropta anka mönon,

⁵kïroptoy nyu nko pïsya cho pö kilö akonga cho kikinyornyoryö nko lita akonga nyo pö mwagh nyo karam.

⁶Ropöwon nyï nyo pö chik nyo kïpelöy lachim, nyo kikïnya ketöteghö kutïng pö Sinay le ropöwonto omisyö, nyo ngutogh nyo mïlöy ECHOTYON.

⁷Ropöwe cho pö dipay* kï lita akonga, cho imïlchinenyi ato kïpelo amöros ompö wawanay pö kech tagh.

⁸Iroptonyi waweto kech nyinö anka mönon le nyaye pö tökwoghö, kïmi nko ropöwo dipay. Nyoni tïkwïl kï ropöwonto pagh nyo ngutogh nyo mïloy ECHOTYON.

⁹Oroptokwa ompö asispa Sapato, wara kechir odeny cho tïng köny akonga akïlïpopöch nko kilen odeny cho pö pïsya cho kikinyornyoryö nko mwagh nko mi ropöwo dipay.

¹⁰Kitötoy ropöw kïpelöy ompö asispa Sapato anka tïkwïl, kisis ropöwechay pö chik nko ropöwo dipay.

¹¹Oropchinekwa ECHOTYON ropöw cho kïpelöy ompö relïntino oroyekwa: ngartin odeny nko makal akonga nko wara kechir mut nko odeny cho le mökol cho tïng köny akonga akïlïpopöch.

¹²Nko pïsya cho kakinyornyoryö nko mwagh kïlïkwï ropöwo pagh nko pïsya cho pö kilen sömök ompö egh akonga nko kilen odeny ompö makalu,

¹³nko kilö akonga cho pö pïsya cho kikinyornyoryö mwagh kïlïkwï ropöwo pagh cho pö wawa kech anka tïkwïl.

¹⁴Liten odeny cho pö ropöwo dipay ompö egh akonga nko lita akonga nko nisï ompö makal nko lita akonga ompö wawa kech. Lata nyoni wölo kidoy röpöw cho kïpelöy ompö asispa tagh nyo pö arawa anka tïkwïl ompö köny akonga kïmïkul.

¹⁵Kïropchini ECHOTYON tïkwïl kwagha nyo pö ropöwonto ngokï ompö ECHOTYON, kisis ropöwontonay kïpelöy chik nko dipay.

¹⁶Asispa taman nko angwan nyo pö arawa tagh kï Pasaka* nyo pö ECHOTYON.

¹⁷Ompö asispa taman nko mut nyo pö arawanï, kï Ichon nyo kyomöy makatin cho puryö mumar ompö osis mut nko odeny.

¹⁸Ompö asisto tagh nyo pö ichontönï, otuyokwa ompö tuyogh nyo tïlil, möminye ighisyö nyonikïny nyo kighöy.

¹⁹Wölo otötö ropöw ompö ma le ropöwon nyo kïpelöy ompö ECHOTYON, ngartin odeny nko makal akonga nko wara kechir mut nko odeny cho tïng köny akonga cho lïpopöch.

²⁰Iroptonyi tïkwïl pïsya cho kikinyornyoryö nko mwagh le ropöwo pagh, pïsya cho pö kilen sömök ompö egh akonga, kilen odeny ompö makal,

²¹airopta kilö akonga ompö wawa kech anka tïkwïl cho le mut nko odeny.

²²Iropta tïkwïl kwagha le ropöwonto ngokï töku tïlilokwa.

²³Iroptonyi chï kïsis ompö ropöw cho kïpelöy tökwoghö chik.

²⁴Iropchinenyi ECHOTYON omisyö nyo ngutöy nyo karam lenyoni chik ompö osis mut nko odeny. Iroptonyi chi kïsis ompö nyay kïpelöy chik nko ropöwecho kigheghöy.

²⁵Otuyokwa ompö asispa mut nko odeny ompö tuyot nyo tïlil amagh ighisyo anka tïkwïl.

²⁶Ompö asispa tagh pö Ichon pö Ilö, otötokwa ropöwo pagh. Atuyokwa asagh ECHOTYON, amagh ighisyo anka tïkwïl.

²⁷Otötonekwa ropöwon nyo kïpelöy le ngutogh nyo mïlöy ECHOTYON: Ngartin odeny nko makal akonga nko wara kechir mut nko odeny cho le mökol cho tïng köny akonga cho lipopöch.

²⁸Iroptonyi tïkwïl pïsya cho kikinyornyoryö nko mwagh le ropöwo pagh, pïsya cho pö kilen sömök ompö egh akonga nko kilen odeny ompö makal,

²⁹nko kilö akonga ompö wawa kech akonga,

³⁰nko kwagha le ropöwonto ngokï nyo tïlilokwa.

³¹Iropta chï nko ropöwo cho kigheghoy kïsis ompö ropöw cho kïpelöy chik nko ropöwo pagh.